الجزء الأول
Time's up … Have a nice night
هزاع: اخيرا....
خليفة: فيني أرقاد………
هزاع: عفوا؟؟؟؟؟!!! ما بتسير صحارى؟؟؟؟؟؟
خليفة: وين؟؟؟؟؟؟ مضيع الشيبة اهناك؟؟؟؟؟
راشد: اه لو سمعك الشيبة…….ترقد اسبوع بالمستشفى…..
خليفة: لو سمعني…… و لو تفيد الاحتمالية و التمني و ..
هزاع: ردينا للنحو…. بس بس عنبوه خيانة عيني عينك ..مب جنك امس رامس انك بتسير صحارى……..
خليفة: متعايز يا ريال…..من الصبح و احنا اهنيه كلاسات ورا بعض و بريك نص ساعة زين نرتاح فيها والشركة مب محصلة غير الجامعة الامريكية ندرس فيها؟؟
راشد: هي حلوة..بس دوام كراف شو بنسوي ؟؟؟؟ و الشباب في الحشرة ما يقصرون….
خليفة: الحين بسير اسبح و العب شوي بالنت….
هزاع: يا موتك عالنت….. ارحم حالك شوي…اتحوط ويانا اليوم؟؟
راشد: والله ما كذبت يا هزاع 24 ساعة مجابل النت و يا ريت شي مفيد …..جات بس
هزاع: يالله خلوف…شل بعمرك نظهر الميغا…. نتشاوف بعد نص ساعة…
خليفة: شو؟؟؟ سوري…اسف…نيه .........كوميندساي….باي لغة اقولك ….ما اقدر…و للعلم خفينا من الجات و الحين مشرف منتديات و هب فاضي…. و تعرف الشغول؟؟
راشد: شو السالفة! جني اشوف الشمس تشرق مرة ثانية…و لا يمكن خداع بصر…..خليفة راعي البنات والجات مشرف منتديات شو حال الدنيا؟؟
خليفة: رشود يا السبال مب تارس عينك؟؟؟
راشد: تارسنها و زود…ما تشوف عيونيه كبار؟؟؟ و يلعب بعيونه
خليفة: ههههه ….لوووووول…. كعكعكعكع…. ضحك …لافينغ…سانتا….هاشيه….نضحك وياك خلاص بطني تعورني….نتشاوف باجر….وداعة الله….
………………..
………………..
………………..
الشباب هب مخلين خليفة بحاله…..طنازة و سوالف و قراض…. ما ينلامون لان خليفة حبوب ومسولفجي ويحب الناس…وما يعصب من التطنيز…وعمره 19 و جبيلته شحي…يدرس على حساب ادنوك… والحين هو يدرس لغة بامريكية الشارجة وراعي بنات عقولة الشباب… ومن ناحية الشكل…عذاب…عيونه عسلية و شعره اسود فاحم….متوسط الطول بس عريض
هزاع: ولد عم خليفة وعمره 19 …. شرات خليفة بالشكل….بس هادي و حبوب…و يحب التمشي و الشعر
راشد: من العين وعمره 18 وجبيلته نيادي…مصخرجي عووود ولسانه شرات السيف ..محد سلم منه و محترف حواطة ..بالاول كان هو و خليفة ما يدانون عسب لسان راشد ..(بعد السب يكون الحب(
والثلاثة يدرسون لغة ضمن مجموعة من الشباب عسب يدرسون هندسة في بريطانيا
………………..
………………..
………………..
خليفة و يالس ينشف راسه بالحمام يسمع تلفونه يرن….
" منو الفاضي يتصل الحين"
يالس يتحرطم …بس من لمح اسم المتصل…رد بسرعة "مرحب ملايييين الا بلاييين و لا يسدن بذمتيه"
جابر: مرحب باجي….اعلومك بوزايد؟؟؟
خليفة: اعلوم الخير…اشحالك و اشحال عربانك؟؟؟ عساهم الا بخير؟
جابر: بخيرما نشكي باس..اخبار الشحوح؟؟؟
خليفة: بخير و نعمة…..وينك لا تتصل و لا تتكرم بمسج؟؟
جابر: انا القاطع يا ويه الفلس….متى اخر مرة شفتك فيها؟؟؟؟
خليفة: ممممممممم…بالعمرة…ليش؟؟(باستهبال(
جابر: هيييييه..الظاهر ان غراشيب الامريكية فروا راسك…
خليفة: الا ما يفرون الراس…وين ما تصد تشوف غرشوب.....عاد شو الحل؟؟
جابر: ههههههه…..ما فيك حيلة….
خليفة: بو حمد..من متى ضربك الشوق صوبي؟؟؟
جابر: والله زين ذكرتني….طلبتك قول..
خليفة (يقطع كلامه): تم
جابر: تعجبني,…… الخميس الياي عرس اخوي سالم….و ان شا الله انشوفك اهناك….
خليفة: من عيوني….كم خييلي وياي؟؟؟؟
جابر: فديتك انا…..انشوفك عخير ان شا الله….وراي عييايز….
خليفة: الله يكون بعونك….
جابر: شي بالخاطر..
خليفة: سلامتك و شوفتك..
جابر :وداعة الله….
………………..
جابر الخييلي ربيع خليفة روح بالروح كانواا ربع ايام جامعة الامارات بس بعدها سار خليفة بعثة ادنوك… وما نسى ربعه في العين…
. ………………..
خليفة: والله انكم فاضيين بدرجة وزير.ما حصلتوا غير الهندية ترقمونها...هههههههههه جاسم..الصراحة تكسر الخاطر..بطني تعورني..
جاسم: النحاسة من ويهك طبت علينا .....و الا احلا البنات يموتون بالتراب اللي ادوسه...
خليفة: مبين...حتى الهنود انجبروا فيك...
ونقع هو و هزاع من الضحك ما قدروا يمسكون اعمارهم....
جاسم و هو بينفجر من الغيظ : بتسكت و لا انعال بحلجك..
خليفة: لا انت و لا عشرة من امثالك يرفعون النعال في ويهي...و انا بن عبدالله الشحي
جاسم: يا الله شو بلاني بالشحوح....لو يالس مع الربع بالقهوة ابرك لي..
هزاع: انف عليك.....غيرك يقول فديت الشحوح و انت تقول شو بلاني..... هب منك..من الهندية..!!
خليفة انفجر من الضحك و احمر ويه جاسم من القفطة.....
خليفة: اه بطني....بسكم يالله...
هزاع: شو بتشوفون بالسينما؟؟
خليفة: كل الافلام مملة...مالي بارض..دشوا انتوا...
جاسم: استوت الخايسة.....ادش يعني ادش...
خليفة: دشوا على حسابي...المهم افتك ...ولو تباني بارقم لك احلا بنت بعد..
جاسم: و ان سويتها لك مني اللي تباه..
خليفة: خلاص ابا رقم الهندية....و يضحك ....بس تحدي ...و خلال دقيقة...احلا بنت تتصل بك الحين
جاسم: اوكي
سار خليفة اللي ما حصل غير هالوسيلة..عشان يفتك من حشرة السينما.......
جاسم و هو يطالع ساعته.....مرت نص دقيقة...سمع تلفونه يرن رنة و سكت...
هزاع و جاسم يطالعون بعض.....مستغربين.
اتصل بالرقم اللي ظهر له....
جاسم: مرحب الساع
البنت: مرحبتين....كيف الحال؟؟؟؟
جاسم: بخير و نعمة..اشحالج.؟
البنت: الحمدلله....انت اللي لابس كندورة كركمية؟؟؟
جاسم فج حلجه....سويتها يا خليفة......
هييييييه ممكن اشوفج مرة ثانية؟؟؟؟
البنت: انا بستار بكس..الطاولة الثالثة عاليسار.....لابسة شيلة بني عاسود....
جاسم و هب مصدق عمره...سار و يوم شاف البنت...انصدم لان البنت من الحلاة تعق الطير من السما....الله يغربلك يا خليفة..قردنت البنت و طيرت عقلي....
خليفة سار صوب خور راس الخيمة اللي عند المنار....يالس يفكر في حاله...........بعد 3 شهور بيسافر يدرس برع.......الله يعيينه.......
ويلس يشل(يعطي راكان جدومي و يروح عنه(
سلامي للي فالبال طاريه***و ما غاب عني فكري لو ثواني
و اقول يا غايب وين ما تسال***سالت عنك جبال القوافــــي
و سالت الطير بالسما عالي***هل مريت على ديار الحيبيبي
و سالت غراشيب البلاد يا *** غرشوب هل سمعت بخير خلي
خلي لو يدرون المزاايين عنه***فيه من الزين مخشعنـــــــي
كان يشل و هب حاس بعمره لانه خارج نطاق التغطية....
والبنات هب مصدقين اعمارهن..."فدييييته...صوته حلو...من وين هالمزيون...الخ" و بعدها شل بعمره وسار صوب الشباب و سلم عليهم و سار البيت .......
ــــــــــــــــــــــــــــــــــــــــــــــــــ
خليفة و هو داش يالس يغني..
"ما لوم نفسي ياللي عافت لذيذ الزاد...من علتي دمعتي من ناظري تنهل...
مريم: يا ويييييييل حالي......و انا اقول من هو العاشق الولهان..............
خليفة: يا سااحر العينيين ما ترحم........القلب من حبك غدا مغرم......
عايشة: شكله الريال متخشع......
خليفة: الا الغير و الشيفت و الدفريشن متكسرين و المكينة متكسرة...
ام خليفة: يا ويييلي.....منو ها اللي ما يعرف يسوق؟؟؟
خليفة و يلوي على امه.........: لا فدييتج بس يالسيين نتمصخر.............
ام خليفة: الحمدلله.....تحريت حد مسوي حادث.......
خليفة: الا حمود وينه؟؟؟؟........البيت صخة؟
ام خليفة: تشوفه يالس ويا هالشلة اللي عند الدكان......
خليفة: اوكي....بسير ايبه.........
وظهر خليفة و كان يالس يتمشى و لين وصل الدكان........شاف الشلة يالسة تدوخ.......بس اللي فجر اعصابه ان اخوه يالس يدوخ وياهم........
ومن شاف محمد اخوه طفا الجيكارة و هو يرتجف من الخوف.........
خليفة مسك اعصابه........و قرر يستعمل وياه اسلوب العقل..............
خليفة: محمد........تعال اباك شوي.......
محمد: ان شا لله........يالله يا جماعة برخصتكم............
خليفة اول ما قرب منه اخوه شم ريحته اللي ما تنشم ..........
خليفة يطالع اخوه.........: اسمعني و افهم الكلام عدل.......تدش البيت سييييييييدة و تسبح و تبدل ثيابك واغسل اسنانك من ريحة الجكاير.........انا ناطرنك في الاستيشن..........اوه.....و البس و اكشخ بنسير المنار...
محمد: منار هالحزة؟.
خليفة: الساعة ما يات حتى 8.........يالله تحرك............اباك برمسة بالدرب.........
محمد و هو يرتجف: ان شا لله.......
وركض محمد البيت و خليفة يتمشى وراه.....و يالس يفكر بطريقة تبعد محمد عن هالشلة..
خليفة: ما شي غير هالاسلوب..........
ورتب له كل شي..
………………..
محمد هو اخو خليفة ....عمره 17 سنة..من ام ثانية توفت وكان عمره 3 سنين..لكن ما عليه كلام اذا بيصور بالكاميرا..يموت بالتصوير........يشبه خليفة طبق الاصل......بس الفرق ان عيون محمد سودا......
………………..
........و بعد نص ساعة كانوا طافوا مينا صقر سايرين راس الخيمة........
محمد خايف من ردة فعل خليفة و خليفة سااكت...
خليفة: عنبوه الفقر......ما عندك عطور مثل الناس؟؟
محمد: هه.....لا ما عندي..........
خليفة: افتح السدة شوف اللي يعيبك و اتعطر منه...بس لا تخلصه......
محمد حاول يرسم ابتسامة على ويهه...........
" يالله يعدي الموضوع على خير........ما اتوقع على خير.....خليفة عصبي مثل ابوي...لالالا...خليفة اهدا.......بس شو بيسوي؟؟؟؟.........يا ريتني تميت في البيت.....ابرك لي من القعدة اليوم...الله يغربلك يا فهد.....ما حصلت تقولي الا اليوم؟؟؟" محمد و هو يرمس عمره.
سار خليفة البنك و سحب له بيزات....و بعدها ساروا مركز المنار..........
ودشوا كارفور....و محمد ساكت........و راحوا صوب الكمبيوترات........
وعاد اشتغلت رمسة الانجليزي اللي ما فهم محمد منها حرف و هو يلحق خليفة مثل العبيط و لا يدري شو السالفة..
وشاف اخوه يالس يشتري لابتوب و طابعة و سكانر و كاميرا ديجيتال....و محمد مستحي يرمس اخوه بعد ما شافه يدوخ......و لا ساله عن شو بيسون....
وودوا الاغراض السيارة و بعدها ساروا باريس غاليري......
خليفة: محمد....شو اسم العطر اللي عيبك؟
محمد: هه.......ما اادري....ها االذهبي.......
خليفة: اها عرفته....بو حرفين سي متقاطعين......يسمونيه شانيل...
ويهز محمد براسه هييه......و اشترى له عطرين و نظارة شمسية حلللوة و بعدها سار خليفة يبا يفصل حق عمره كنادير..
خليفة: محمد تباني افصل لك؟؟؟؟
محمد: هه....ما ادري ........... كيفك...
خليفة: سالتك سؤال محدد......تبا و لا لا؟
محمد: هييييه.....
خليفة: خذ قياسه و فصل له 6 و انا 2.......و ابا الاربعا الياي مخلصة....
محمد: خليفة...مب جنه وايد 6؟؟؟
خليفة يطالعه بنظرة: .......يوم بتكبر....20 كندورة ما بتكفي.......سير اتنقى لك كم من سفرة حلوييين ....
محمد: ان شا الله.........
ـــــــــــــــــــــــ
و بعد ما ظهروا من المنار و بالدرب وقف خليفة عند الرمس......
خليفة: تعرف تسوق؟؟؟
محمد: هه....هيييه اعرف.......
خليفة: راوينا شطارتك.....
وبدل وياه.....و خليفة يالس يطالع من الدريشة........
خليفة: محمد............من متى انت تمشي ويا هذيلا ؟
محمد: و هو يرتجف....من اسبوعين.......
خليفة: و من متى تدوخ؟
محمد: من اسبوع.........
خليفة: لحقت عليك الحمدلله..........اسمعني يا محمد.........هاي الشلة ان مشيت وياها ما بتشوف عمرك الا في مستشفى او سجن او قبر............بس اللوم مب عليك........علي انا لاني ما امشيك وياي ولا اخذك وياي مولات و سينما.......او حتى يلسنا ويا بعض...........تعرف ليش ماخذ هالاغراض؟؟؟
محمد: ما ادري؟؟.....عشانك هيه......
خليفة: شفت كيف انك ما اتدري عني شي.......انا عندي كمبيوتر مكتب و لابتوبين..........ها اللابتوب ماخذنه لك انت.....و بقية السامان كله لك....بايلس اعلمك كيف تشتغل عالكمبيوتر............و يبت لعمري احلى كاميرا ديجيتال.......تصويرها عجيييب والزووم يا ويييييل حالي.... و لا اروع.....
محمد من سمع كاميرا بيصيح...: ممكن اشوفها بس؟؟؟
خليفة يبا يتمصخر عليه: طاع ويهك تقول فلاش كاميرا...سوري كاميرتي راهية.....
محمد: بس لو من بعيييد..
خليفة ناقع من الضحك..............: صدج انك طمة......هالكاميرا لك انت......انا مالي حاية فيها... ويبت لك طابعة من الزين و سكانر عشان تستعملهم بالتصوير..
محمد لو الشور له يستعرض الحين من الفرحة........
خليفة: اسمعني...........انا تراني مشرف منتدى.......لكن ما اعرف شي بالتصميم............شو رايك تشارك ويانا...بسجلك و كل شي....و بيب لك برامج تصمم صور على كيف كيفك........ما بتحس بالوقت .. ولا شلة و لا هم يحزنون...
محمد: تم..............
وارتاح لانه حس انه عنده اخو يقدر يستند عليه وقت الحاية.........اخو يهتم فيه ويشوف وين مصلحته....
خليفة: اوه نسيت.......اصبر شوي وين سار الكيس؟؟؟؟
محمد: اي كيس؟؟
خليفة: يوم انا رحت اقضي شغيلة اشتريت حاية........اوه هذا هو.......
محمد: شو ها؟؟؟
خليفة: ايدد تلفون نوكيا......و حصلت رقم تلفون............جان حصلت احسن عنه خبرني ....فيه 5 ارقام متشابهة.....و ورا بعض...كنت ياييبنه حق عمري.....بس تفداك..
محمد يبا يعق عمره من الفرحة.............هذا الاخو و لا بلاش.......
خليفة: محمد..............بقولك شي..............اياني و اياك انك ترابع هذيلا..........انا ما يبت كل هذا الا عشان ما اباك تضيع منا..
محمد: فالك طيب..........
خليفة: نسيييت........اسمعني...........الخميس الياي بتسير وياي العين و ريولك فوق راسك.......
محمد: العين؟؟؟!!!!! شو نسوي اهناك؟
خليفة: عرس اخو ربيعي...........ابا ايول شوي.......احس ان مفاصلي مصدية............
محمد: فدييييييتك اخوي...........هذا الكلام و لا بلاش.......
خليفة:يالله ساعدني نزل اغراضك غرفتك......و لا تسوي حشرة........ترا ابوي راقد و ما يحب حد يوعيه...
و يلسوا يرتبون الاغراض و خليفة يطالع كبت محمد اللي ثيابه عادية............
خليفة: ذكرني باجر نسير بن ظاهر و جيوردانو...........
محمد: ان شا الله..........
و دخلوا بعدها عالنت و يلس محمد يتعلم من خليفة.......و فتح له ايميل و سوى المسن و نزل له فوتوشوب 7 عربي و يلس يتعلم من خليفة كل شي و احساسه ويا هالشي اللي يتسمى لابتوب..
خليفة: الحين بعلمك كيف كاميرا الديجيتال.........و يلس يعلمه و كيف يصور و يكبر
خليفة يطالع الساعة: شييييييييت الساعة 3...........يالله وقت الرقدة...تصبح على خير.........
محمد: و انت من اهله........
وبعدها تمدد محمد عالسرير..........يالس يفكر باخوه.......لو ابوه درا بيذبحه...بس خليفة كان غيير........والله ما قدرت انطق كلمة من القفطة و اسلوبه الهادي...ما توقعت اخوي جيييييييه.........بسنا من ايام الصياعة.....باجر من الفير بسير اصور من قمة اليبل...والله باتخبل.......كاميرا ديجيتال و لي انا بس...
ــــــــــــــــــــــــــ
خليفة متمدد عالسرير..........
قرا فرحة الدنيا في عيون اخوه الصغير يوم يالسين يركبون الاجهزة..............المهم يبعد عن الشلة...
ويشل التلفون و يقرا مسج من رقم غريب....." فدييت من مر على بالي.....و سلب روحي من كفن جسدي"
خليفة: منو ها بعد؟؟؟؟ و يتصل و يرد عليه واحد....
...:هلا
خليفة: منو انت؟
...........: اه؟؟؟؟؟خليفة عن الاستهبال؟؟
خليفة: منو انت الحين؟؟؟؟ و هو معصب
...........: انا محمد اخوك والله
خليفة: اه؟؟؟ و من وين يبت هالرقم؟
محمد: اه؟؟؟؟ توك ماعطني اياه؟؟؟
خليفة: متى عطييتك رقم انا؟؟؟
محمد: يايينك الغرفة..........
خليفة و مستغرب....و دش عليه محمد....
خليفة: شو السالفة؟؟
محمد: هذا الرقم تونك ماعطني اياه...و حكا له السالفة.........
خلييفة: ايييييييوه..........يالله اقلب ويهك.........باجر ورانا نشة من الصبح.........ابا اسير دبي بتحوط....
واهنيه قرا في عيون اخوه رجا"دخيلك خذني"
خليفة و يكمل كلامه: جان بتسير ويانا حيابك....انا و هزاع و انت ..........يالله سير ارقد.........
ـــــــــــــــــــــــــــــــــــــــــــــــ
محمد و ناش من الفير يالس يصور النخل بكاميرا الديجيتال......و يصور النخل من تحت و يصور العشب.........ولين ما طلعت له عبارة ان الذاكرة فل.....فرد البيت و هو يالس يتحرطم.....و يلس ينزل الصور عاللابتوب....و يلس يطالعها و يختار اللي يباها..........و دشت عليه مريم.....
مريم: اوف....شو ها؟؟؟؟ من وين يبت كل هذا؟؟؟؟
محمد و هو متشقق: و ربج بعد.........
مريم: محمد...ارمسك جد......امس بالليل ما كان عندك هالاشياء.......اصبر .....شو ها العطر؟؟؟؟؟ ياااي ريحته واايد حلوة......شو السالفة حمود.....ما احيدك تعرف عالكمبيوتر...شو استويت بوكيمون وتطورت؟؟؟؟
ودش خليفة هذيج الساعة: صباح الخير.....ها اشوفك قاعد تسوي شي.....ليكون صورت؟
محمد: اسكت....كاميرا و لا اروع.........فديييتك اخوي......صورت لك الطوي و لا اروع..شوف هالصورة شو رايك فيها؟؟
خليفة: اوف....بس تكون احلا لو حاط الكاميرا على ستاند........تكون ثابتة......باشتري لك واحد جان تبا...
محمد: بس ما مداني اصور 20 صورة الا و الذاكرة امتلت......شو اسوي؟؟
خليفة: ايووه....بسييطة باشتري بطاقة ذاكرة تصور 100 صورة جان تبا...و رزليوشن اقوى بعد......يالله جهز عمرك....ورانا دبي....
مريم: نعم....و اشعنى ما تاخذوني.......و ثانيا ليش ماخذ كل هذا لحمود و احنا طاف؟
خليفة: شفت محمد كيف البنات يغارون.............خذها قاعدة...بنت ما تغار من عشر طعش المستحيلات..اذا الام تغار من بنتها اذا كان ابو البنت يدلعها اكثر من حرمته......عيل شو بتقول عن مريوم الدبة....
مريم: عفوا...منو الدبة؟؟؟؟....والله لاخبر عليك ابوي.......
خليفة: خبريه..........
ويرن تلفون محمد....و ظهر من الغرفة ...و مريم تطالع و هي فاجة حلجها...
مريم: خليفة ها مب جنه تلفون؟؟؟
خليفة: عيل شو بيكون يعني؟؟؟؟ زنوبة؟؟؟
مريم: من وين ياب التلفون..........؟؟
خليفة: انا ماخذ له كل ها الاغراض............لا تخافي....
و دشت ام خليفة و تشوف الخبصة.....
ام خليفة: خليفة......ليش هالاغراض اللي ماخذنها لمحمد و البنات ما يبت لهم شي...؟؟
خليفة: لا حوول...ردينا.....اماية.....خافي ربج امه متوفية......ليش حاقدة عليه جيه؟؟؟
ام خليفة: ما تشوف ابوك كيف مدلعنه........و مهتم فيه اكثر من البنات.......
خليفة: خافي ربج اماية.....هذا امانة في رقبتنا......انا اخوه الكبير اذا ما اهتميت فيه ...اخلي عيال الشوراع يهتمون فيه؟؟
ام خليفة: جهنم الحمرا تاكله......
مريم: خليفة.......اباك تاخذني الكويتي ابا اشتري عباية.
خليفة: اذا اليوم اسف....بسير دبي......
ام خليفة: و شعندك في دبي؟؟؟؟
خليفة: شغيلات ويا هزاع..........
ام خليفة: لو تاخذ وياك هالحيوان يكون زيين.....
خليفةو بدا يعصب....: دامه حيوان....فانا و عيالج كلنا حيوانات...لان ابوي هو ابوه.....
ام خليفة: فدييت بناتي.....بس يسمعون كلامي.....اما انت لا........
خليفة: اماية...خافي ربج....ليش تعاملين محمد جيه.......كله لانج ما تطيقين امه؟؟؟....و لانه وارث عن امه خير وايد؟؟؟
ام خليفة: هيييييه ما اطيقها........
خليفة: اندله طريق دبي وين...افك عمري من الصدعة......
وسار غرفته و اتصل بمحمد يقوله يلبس بيظهرون..........بس اللي ما يعرفه خليفة ان محمد كان ورا الباب يسمع اللي صار..
وسار محمد يسبح و اول ما دش بدا يصيح......ام خليفة دومها تعامله جيه.........مثل الحيوان في البيت.. ومر طيف امه فباله......و زاد صياحه.......
" وينج اماية....والله مشتاق اقولج اماية.......تركتيني لهاي الدنيا......ابا انش بالليل اسير غرفتج و تقولين لي..ها وليدي بلاك...تعال ارقد يمبي.....والله ابا احضنج لو دقيقة....لا بس ثانية تكفيني.....من وعيت في هالدنيا و اسمع ربعي في المدرسة......اماية قالت لي....اماية سوت.....اماية تباني.....و انا اتم ساكت...وين امي.....ابوي قال لي...ان امي عند الله.....ما كنت ادري شو يعني هالكلام؟؟؟.........ابا اقوم الصبح اشوفج يالسة تقرين قران....ابوس راسج و اقولج صباح الخير.......ابا اسمع وليدي...تتريق؟؟؟...من وعيت و ام خليفة ما تطيقني......انا شو ذنبي؟؟؟؟..هل لاني يتيم؟؟؟...لو مت وراج مب احسن...افتك من هالدنيا و بلاويها.."
و سمع دق عالباب و كان خليفة حاشر الدنيا..........يالله حمود خلص.....
وبدل و لبس و كشخ و ظهروا........
وفي الدرب لبيت هزاع...
خليفة: ما لك من كلام امي..........الله يهديها بس........
محمد: تعودت على هالكلام......
خليفة: ان شا الله تتغير........المهم...انت علمي صح؟
محمد: هيييه.....
خليفة: و كيف درجاتك......؟؟
محمد: تحت المتوسط.....
خليفة: افا....اسمعني عدل.........اباك ترفع الراس.......عندك ثانوية عامة.......لا تخلي البيت يشغلك..ركز بدراستك....شوف كم يبت انا.....93 علمي....و الحمدلله وفقني الله في ادنوك....و ان شا الله بسافر بريطانيا..
محمد: انا ابا ادرس كمبيوتر........
خليفة: بسك....تبا كمبيوتر.......عندي لك واسطة بيطرشوك امريكا تدرس 4 سنين بكالوريوس..بس شد حيلك عدل......و ان رفعت الراس......لك مني اللي تباه........لو تبا مرسيدس كوبي فالك الطيب......
محمد: خليفة.....موتر ما يهمني......ابا اثبت لامك و خواتي اني مب حيوان........ابا اكون انسان لي قيمة في هالدنيا...
خليفة سكت احتراما لرغبة اخوه........و لين وصلوا لهزاع و شلوا باعمارهم دبي.......
......
شو بتكون علاقة محمد بام خليفة؟؟؟....
وليش هالكره اللي شالتنه ام خليفة لمحمد؟؟؟؟؟
((الجزء الثاني)).~..
بو خليفة و ام خليفة يالسين يتغدون ويا بناتهم...
بو خليفة: وين خليفة و محمد؟
مريم: ساروا دبي الملاعين...
بو خليفة: طمي لسانج داخل حلجج و ما ابا اسمع هالرمسة مرة ثانية........هذيلا اخوانج..
ام خليفة: اخوهم مب اخوانهم....
بو خليفة: جان مب تارس عينج ولدي محمد تندليه بيت اهلج..
ام خليفة: هذا الولد ما يستحي.....يطول لسانه علي..ويقولي انتي عيوز مخرفة.......ان ما ادبته انا بادبه..
بو خليفة: هو ولدي مب ولدج.....و ثانيا مالكم شغل فيه..............الولد يتيم....راعوا شعوره......
ام خليفة: يتيم مب يرفع خشمه علينا........مثل امه امنة.....خقاقة عالفاضي..
بو خليفة: امنة هاي تسواج وتسوى طوايفج كلها..من خذيتها لين توفت الله يرحمها ما نكدت فيني .....و اطيب خاطري..
ام خليفة: الحمدلله افتكينا..........
بو خليفة: ذيل الكلب ما يعتدل............و بتمين حيوانة باسلوبج هذا طول عمرج..........
وشل بعمره و سار يرقد...
عايشة: اماية.....لأيش ابوي كله بصف حمود مب ويانا لو مرة........
مريم: تشوفيه طمعان في الخير اللي ورا حمود.......
ام خليفة: ماعليه يا حمود......انا وراك و الزمن طويل.......
ـــــــــــــــــــــــــــــــــــــــــــ
بو خليفة يالس في النخل و يتذكر ايام امنة الله يرحمها...هيييه يا امنة..وينج..ياما خففتي علي من مصايب..و ياما تسنديني يوم ارد من الشغل تعبان...تذكرين يوم كنتي تحتشرين يوم اطلع الظهر ابا اشوف العمال في النخل..تحتشرين علي......شو لازمنك....عابلهم العصر....الحين ارتاح..........والله بزعل منك عبدالله..واتنهد.....كنتي لي السند و العون في كل مصايبي........الله يعينك يا محمد على هاي الحرمة...حريم الفريج مب طايقينها هي و بناتها.......بس خليفة الوحيد اللي يشبهني....حتى ان اخوي بو هزاع يشاورني نزوج خليفة الحين...الناس لو الشور لها تبا تتضارب عليه........محمد...ما ادري شو مصيره يوم رابع هذيلا........مب متاكد من الرمسة اللي سمعتها من بو سالم ان محمد يدوخ..بشوفه يوم بيي من دبي..........
ـــــــــــــــــــــــــــــــــــــــــــ
خليفة: محمد....متى اخر مرة زرت خالتي مريم؟؟؟
محمد: خالتي مريم؟؟؟ .......من سنة..........والله مشتاق لها....
خليفة: ترا هذا بيتها.......شو رايك ننزل؟؟؟
هزاع: خلاص.....انا بقضي شغيلة فمركاتو و بييكم بعدين.....
خليفة: خلاص عيل....بينا كول....يالله نزلنا محمد.....
و نزلوا عند بيت مريم اللي هي خت امنة الوحيدة.....و دقوا الجرس وشوي فتح عليهم الباب احمد ولد مريم ..
احمد: هلا والله.......خليفة اهنيه.........مرحب الساع...اقرب شعنه ما دقيت علي؟؟؟
خليفة: امتسح رقمك من عندي بالغلط.......قريب ان شا الله.......
احمد: اصبر ها جنه حمود ولد خالتي....
محمد: اصغر عيالك حمود.......
احمد: عادي يا ريال.......اقربوا...
وقربهم ميلس الرياييل......و سار يزقر امه و ييب القهوة.....
و شوي دشت مريم ام احمد...
ام احمد:هلا والله بريحة الغالييين........اشحالك يا وليدي......
محمد و هو لاوي على خالته......: الحمدلله خالتي...بخير و سهالة...اشحالج انتي؟
ام احمد: بخير ما نشكي باس........هلاا والله بخليفة......اشحالك ربك الا بخير و سهالة؟
خليفة: بخير دامج بخير ام احمد......
ام احمد: والله تولهت عليك وايد يا محمد.....اتصلت اكثر من عشر مرات.....و يقولون لي محد...شو عمتك فاطمة وياك؟
محمد: الحمدلله...كل شي تمام...
ام احمد: يا ولدي يا محمد....فاطمة و اعرفها عدل.........ادري انها ما اطيق طاري اسمك حتى..ليش ما تسكن عندي اهنيه في دبي؟؟؟
محمد: ما اقدر افارق ابوي يا خالتي.......
ام احمد: الله يرحمج يا امنة......نفس طباع امك بالضبط.....ياما نصحتها تبعد عن فاطمة...وتقول......ما اقدر افارق عبدالله........ (وبدت دموعها تنزل..(
محمد: خالتي.......احكي لي عن اماية..؟؟
خليفة يطالع محمد متعيب من الكلام....لها الدرجة امه ما تفارق ذكراه...........و يطالع خالته.......
ام احمد: اصبر شوي..........عندي لك شي ابا اعطيه لك من زمان..........دقيقة...
و ظهرت من الميلس ودش احمد يقهويهم........و دشت ميثا اخت احمد و عمرها 16سنة..وكانت مستحية..
ميثا: سلام عليكم...
خليفة و محمد: و عليكم السلام و رحمة الله و بركاته........اشحالج ميثوه؟
ميثا: بخير طاب حالك.....اعلومكم؟
محمد: بخير و الحمدلله...........شو الدراسة وياج؟
ميثا: تمام...........
احمد: ميثا.......قربي صحن الكنافة من عيال خالتج......(لان امنة هي ام خليفة بالرضاعة(
ميثا: ان شا الله........و بعدها ترخصت و سارت غرفتها........
محمد يالس يطالع الباب اللي ظهرت منه ميثا......
احمد: ها خليفة....مبروك عالاشراف.........اشوفك ناوي عالادارية......
خليفة: ان شا الله اكون اداري......خبرتك...
احمد: عن شو؟
خليفة: محمد مشارك ويانا في المنتدى......
احمد: في ذمتك.......شو اسمه؟؟؟.......ليكون صدى الاحزان؟؟؟
محمد: هيييه......كيف عرفت؟
احمد: انسيت اخبرك اني مشرف الجرافيك و التصوير.......شفت صورة اليوم الصبح من عضو يديد لنخلة...و كانت روعة..
محمد: الحمدلله........كنت متردد احطها و لا لا......بس قررت و حطيتها....
احمد: حط صور طبيعية واايد لان الناس تحتاجها واايد....ببحوثهم و لا خربطانهم...
ام احمد: السموحة عالتاخير......و كانت شايلة فريم صورة....
محمد من شاف الفريم بدا قلبه ينبض بسرعة......صورة منو بتكون فيها؟؟؟
ام احمد: يا وليدي هاي صورتك ويا امك و عمرك سنتين و نص...ٌقبل لا تتوفى امك ب6 شهور........كانت هاي الصورة الوحيدة لامك لان ابوك ما يبا حد يصور حريمه.....
محمد مد ايده و هي ترتجف.....هاي صورة امي؟؟؟....ما اصدق.....صورتها ضبابية فذاكرتي.....كيف شكلها؟؟؟..
و من قلب الفريم يشوف الصورة انصدم....كانت الصورة لامه شايلتنه في حضنها و يمبها خليفة يوم كان عمره 5 سنين......و كانت الابتسامة الحلوة مرسومة على شفاتها..
بدون ما يحس بدت دموع محمد تنزل مثل المطر........
" هاي امي الحين.....فدييتج اماية......والله مشتاق لج.......ابا اصيح في حضنج......"
وتموا اللي في الميلس كلهم ساكتين ......و قطع الصمت تلفون محمد و هو يرن......
محمد و هو يمسح دموعه......: الو مرحب الساع....
و ظهر من الميلس و سار الحديقة.....
ام احمد: الله يرحمج يا امنة .......الا اقول يا ولدي خليفة......كم رقم محمد.....تعرف ما فيني اتصل بالبيت و تعرف انت...
خليفة: رقمه هو $$$$$$$.......
احمد: شييييت....منو ظهر هالرقم.؟؟؟
خليفة: انا ظهرت له...
احمد: انزين تذكرني ولد خالتك ....
خليفة: ان شا الله. بحاول.....
و في الحديقة....
محمد: افا يا بو عسكور........لا ما اتوقع ان سلطان بيسويها..المهم سجل عندك رقمي..$$$$$$$....هي هذا هو...قول لا اله الا الله.......يالله سلم على حمدان...فداعت الله....
ويلس عند النافورة و تنهد..ويطالع الصورة بايده......و بدت دمووعه تنزل مرة ثانية......من يقول ان محمد اللي كان معروف عنه ان صايع المنطقة بكبرها تنزل دموعه تنزل جيه.......كان معروف عنه بالمشاكل ويا شباب المنطقة..فغليلة وشعم والجير..ما خلى حد الا اضارب وياه....و هذا الحين تنزل دموعه بسبب صورة..لكنها صورة امه الي انحرم من شوفتها و نطق كلمة اماية.......و رفع عينه يطالع النخل ......." هييه من يتوقع يا محمد ان دموعك بتنزل جيه".......
وحس بحركة جريبة منه....افتر صوب الصوت...و تصنم.....كانت ميثا بنت خالته......و كانت دموعها تنزل..وقف و تم يطالعها.....و هي من شافته مسحت دموعها و ويهت صوب البيت...
محمد: ميثا.....
افترت ميثا صوبه....و من شافته بدت دموعها تنزل مرة ثانية....قرب صوبها......
محمد: ليش تصيحين ميثاني؟؟؟....انا ما استاهل دموع حد......احس ان مالي قيمة في هالدنيا......انا راعي مشاكل وضرابات.......و يقولون عني صايع و ما ايب غير البلاوي....
ميثا: جان مالك جيمة ما عطتك امي صورة خالتي امنة....
محمد تصنم فمكانه..كان يعتقد ان خالته متعاطفة وياه.....لانه يتيم.....بس كلمات ميثا جنها صفعة على ويهه..
ميثا: امي كل يوم تتصل فبيتكم تبا تسمع صوتك و تعرف احوالك.....و تصيح بالليل و تقول محمد يا ولدي ما اعرف عنك خبر ولا حال..رقدت عدل و لا لا؟؟..تعشيت زين؟؟؟......شو دراستك؟؟؟؟...واخرتها تقول جيه؟؟؟ليش تحس ان الناس متعاطفة وياك؟؟؟..امي تحبك مثل ما تحبني انا و احمد..
وبدت تصيح و دخلت البيت و دموعها مثل المطر....
محمد هب قادر يقول كلمة...
خليفة و اللي يشوف الموقف من بعيد و احمد يمبه.......
احمد: بعدك يا محمد تحس ان امي متعاطفة وياك؟؟؟؟
خليفة: لا تلومه...اللي يشوفه من امي العن.......و ان شا الله بيتغير........
احمد: ان شا الله........لازم نرفه عنه........هو يرمس بنات؟؟
خليفة: و لا يطيق سيرتهن.......شو الحل برايك؟؟؟
احمد: تعرف عند منو الحل؟؟؟؟
خليفة و هو يطالعه: منو ؟؟؟
احمد: ميثا..........
خليفة: شووووو؟؟ انت خبلة؟؟ تبا ميثا ترمسه بالتلفون؟؟؟
احمد: لااااا...شو خبلة انا؟؟؟؟........هييه عندك عالمسن.......فعط ايميلها لمحمد.......هي الوحيدة اللي تقدر تخفف عنه.....و بعدين هي بنت خالته....يعني بيخاف عليها مثل ما نحن نخاف عليها....
خليفة: خلاص عيل......برمسه اليوم..........بنسير الحين.......لازم اكون في البيت الساعة 8 لان ابوي يبانا برمسة..
احمد: يا ريال ......تم شوي بعدك......
خليفة: ما فيني .......بسير ازقره و بنتوكل.....
وترخصوا الجماعة و تم محمد طول الدرب ساكت.....و يطالع الصورة كل شوي......
ــــــــــــــــــــــــــــــــــ
بو خليفة: محمد....تعال اباك برمسة......و انت يا خليفة بعد تعال.
محمد: ان شا الله الوالد.......
و ساروا الميلس...
خليفة: خير ابوي.....
بو خليفة: كل خير ان شا الله...بس ابا اتاكد من رمسة سمعتها عن محمد....
محمد و خليفة يطالعون بعض
بو خليفة: محمد....سمعت انك تدوخ؟؟؟
اهنيه خليفة انصدم........شو بتكون ردة فعل ابوه.......محمد شو بيقول؟؟ بيجذب و لا بيعترف.....؟؟
محمد: هييه يا ابوي...
بو خليفة: و تقولها جدامي؟؟
محمد: بس كنت ادوخ......خليفة شافني و رمسني..وتركت الشلة اللي كنت وياهم..واشترى لي لابتوب و كاميرا عشان اشغل وقت فراغي و ما اظهر ويا هذيلا..
بو محمد: صدج هالكلام يا خليفة؟
خليفة: هيييه..بس يا ابوي لا تلومه.....السبب مني انا لاني ما اخذه وياي مكان و تاركنه لعيال الشوارع..لو اني اخذه وياي...جان ما صاحب هذيلا........بس الحين هو حلف يمين ما يلمس جيكارة و لا يرابع هذيلا..
بو خليفة و يالس يطالع محمد...
بو خليفة: طحت من عيني ...طحت من عيني يا محمد.........لكن الحين بعد هالرمسة......كبرت في عيني..وان شا الله تكبر اكثر و اكثر....و ترفع راسي في الثانوية العامة مثل ما سوى اخوك..ما اوصيك على دينك ونفسك...ام خليفة و طنشها.....بس لا تتركها لحالها......ترا خليفة بيسافر وبتكون انت سندهم...
محمد: ان شا الله يا الوالد.....و باذن الله لاخليك تمشي بين الناس وتقول هذا ولدي محمد رفع راسي ...ريال و النعم فيه و ينشد فيه الظهر..
وقام و حب راسه......
بو خليفة: اذا الله كتب لنا عمر.......(حس خليفة بنغزة)....تعرف يا خليفة ....محمد امانة في رقبتي لانه ولدي..هاي امانة من رب العالمين لكل ابو......عياله امانة في رقبته.......و انت و محمد و مريم و عايشة امانة في رقبتي......و الحمدلله حصلت من يعاوني على حمل هالامانة......خليفة....ما وصيك على اخوك....
خليفة: ان شا لله........فالك طيب...
بو خليفة: فالك ما يخيب.....يالله نسير نتعشى.....
محمد: ابوي ابا اراويك شي......
بو خليفة يطالع ولده......
وظهر محمد صورة امه....و من طاحت عيون بو خليفة عالصورة تم يطالع فيها و حس ان دموعه بتخونه فصد صوب الباب..
بو خليفة: الله يرحمج يا امنة....اكيد زرتوا خالتكم مريم في دبي؟
خليفة: هيييه....
بو خليفة: وشخبارها و شخبار عيالها....ان شا الله طيبين...
محمد: الحمدلله بخير و نعمة...
بو خليفة: يالله نسير نتعشى...بموت من اليوع....
و عالعشا...
ام خليفة: خليفة يا وليدي....تبا خبز؟
خليفة: هييه اماية...
ام خليفة: و انتوا يا بناتي؟؟؟
مريم: لا ما نبا....
بو خليفة: يا ولدي يا محمد....تعال ايلس يمبي .....شو دبي وياك اليوم؟
محمد: كشخة.......اشتريت قاعدة للكاميرا....و شوية سامان حق عمري......
بو خليفة: ما شا لله وياك كاميرا.......عاد بقفل النخل......24 ساعة بتكون فيها يالس تصور....
خليفة: ههههههههه.....ابوي هذا محمد...بيدشها بيدشها...لو فريت النخل في المريخ....
بو خليفة: هههههههههه.....تراه على ابوه.......حياته نخل....هب مثلك يا خليفة......كله حواطة بالمولات..
خليفة: ابوي .....انا المولات ما اسيرها الا مرة في الاسبوع و ان كثرت مرتين......و باقي الاسبوع في الامريكية ندرس..
بو خليفة: الا اتخبرك شو الدراسة وياك؟؟
خليفة: الحمدلله ماشية اوكي...
بو خليفة: و انت يا محمد....
محمد: ان شا الله بكون الاول....
ام خليفة: افلح في الامتحانات بعدين احلم بالعاشر.
بو خليفة: (و هو معصب) يوم الرياييل يرمسون............الحريم ينطمن..
ام خليفة: و شعنه ما سالت بناتي عن دراستهن؟؟؟ فايج بس لعيالك...و بناتك؟
بو خليفة: هه......من يخلصون البنات كل وحدة على بيت ريلها........
عايشة: ابوي....ابا كمل الجامعة.......
بو خليفة: ماشي جامعة.......تخلصون الثانوية و العرس بعدها باسبوع....نسيتي ان ولد عمج خالد خاطبنج..
ام خليفة: و شعنه مستعيل عالعرس...؟
بو خليفة: الريال رمسني اليوم يبا يعرس......و عطيته كلمة انه من تخلص ثانوية عامة بتعرس..
عايشة: ما ابا....
بو خليفة: بتعرسين يعني بتعرسين.....و لا والله ما اخليج تطبين المدرسة و ملجتج باجر....
ام خليفة: و هذا تقوله اذا ياب نسبة زينة بتييب له اللي يباه...و بنتي بتعرسها؟
بو خليفة(واصلة عنده): انتي ما تستحين....ليش تتنصخين الرمسة.........انتي شو؟؟؟؟شو من البشر انتي؟؟؟
خليفة: ابوي هدي اعصابك......عندك ضغط الدم.....
بو خليفة: اسمعي يا فاطمة....قلبي غاضب عليج ليوم القيامة.....
قام بو خليفة سار غرفته و هو معصب...
ام خليفة: شفت...انت السبب يا محمد
خليفة: اماية........شو يخص محمد بالسالفة؟؟؟؟......انتي نرفزيته........
ام خليفة قامت و راحت حجرتها.....
محمد ياي بيقوم و هو يطالع خواته......عايشة تنظاره بنظرة تعاطف...لكن مريم تطالعه بنظرة حقد.....
" يا ويلييي......عبدالله....بلاك؟؟"
خليفة و محمد طاروا من مكانهم..و ركضوا غرفة بو خليفة......كان بو خليفة طايح عالارض و ام خليفة تصيح فوقه..
خليفة يحس نبض ابوه.....و محمد يطالعه...
خليفة: قم شغل السيارة.....بنوديه الدختر....شكله ما يسر
طار محمد السيارة و شغلها و شاف خليفة شال ابوه و يركبه السيارة....
خليفة: قم انا بسوق....
وخليفة اللي ما يحس بالدنيا ابد و كل هدفه انه يوصل المستشفى بسرعة....
وطار بين السما و الارض لين وصل مستشفى صقر و دخلوا بو خليفة الطواري.....
وبعدها ب خمس دقايق.....طلع لهم الدكتور....
خليفة: بشر يا دكتور.....
الدكتور: عظم الله اجركم........الوالد عطاك عمره.....
تصنم محمد و خليفة من سمعوا هالعبارة......بدت دموع خليفة تنزل....لكن محمد..
محمد: لااااااااا......
و ضرب اليدار بكس بايده اليسار.......خليفة يمسك كتف اخوه
خليفة و يحصن اخوه: محمد.....خلاص ابوي رااح.......الله يرحمك يا ابوي......وصانا و راح......
محمد فج اخوه: خليفة....ابوي رااح....راااح.....
وطاح على اقرب كرسي و يلس يصيح بصمت و بدون صوت....بس دموعه تنزل......
الدكتور: لو سمحت ممكن كلمة...
خليفة: تفضل....
الدكتور: اصل الواد اخوك لازم يفحص دراعه....بص لونها الزاي.....يمكن فيها كسر......
خليفة: اوكي.......محمد......سير ويا الدكتور بيفحص لك ايدك.....
محمد يطالع ايده بحزن ....: ان شا الله...
خليفة واتصل بهزاع و خالد و خبرهم بالخبر و انصدموا بو هزاع و بو خالد.... و ساروا المستشفى و كملوا باقي الاوراق..
ومرت الليلة حزيينة و كئيبة على بيت بو خليفة بعد ما مات......و تم الدفن الفير......
في المقبرة..
هزاع: احسن الله عزاكم يا خليفة و محمد..
محمد: البقاء لله..........
بو هزاع: الله يرحمك يا اخوي......و يغمد روحك الجنة ان شا الله....
خليفة: امين .....
وكان سبب الوفاة انفجار شرايين في المخ و سبب نزيف داخلي قاتل.......
ومرت ايام العزا ثجييلة على عيال بو خليفة...و الناس من كل صوب يت تعزي..
مريم و عايشة ما وقفوا صياح ليلتين. و ام خليفة اللي ما ظهرت من غرفتها و يالسة تصيح.. ومحمد اللي وصية ابوه ترن في اذنه كل ما غاب ابوه عن باله.." ما اوصيك على دينك و نفسك..ام خليفة وطنشها.....بس لا تتركها بحالها......ترا خليفة بيسافر و بتكون انت سندهم..."
محمد: هيييه يا ابوي.......وصيتني باهلي و ان شا الله ما بخيب ظنك....
خليفة و هزاع و خالد و محمد و ربع خليفة يالسين في الميلس بعد ما روحت العرب.....
خليفة: يزاكم الله خير والله تعبانكم ويانا........
جابر: افا.....تعبكم راحة يا بو عبدالله..........و هذا الواجب
راشد: اي والله....صح لسانك يا جابر....و بعدين يا خليفة....ترا اللي بينا عيش و ملح..وهذا واجبنا كلنا...
خالد: بيض الله ويهوكم....ما قصرتوا......
جابر: يالله يا جماعة برخصتكم...
خليفة: مرخوص مررة....و اسمحلي ما اقدر ايي العرس....
جابر: معذور يا خليفة......و ان شا الله مرة ثانية...شي بالخاطر؟
خليفة: سلامتكم و شوفتكم.....
جابر: فداعت الله.......
ــــــــــــــــــــــــــــــــــــــــ
بعد سنة.......
"تعلن الخطوط الجوية البريطانية عن وصول رحلتها رقم *** من لندن هيثرو الى دبي" و تكرر النداء اكثر من مرة..
محمد: مرحب ملايييييييين و لا يسدن......نورت البلاد...
خليفة: منورة باهلها......
ويتخاشموا هو اخوه.....
محمد: مرحب الساع....رويشد و هوزيع اهنيه.....
هزاع: اصغر عيالك رويشد و هويزع...اشحالك؟
محمد: بخير ما نشكي باس......اعلومكم انتوا؟؟
راشد: ماشي....بس رقاد و ناطرين متى الرحلة....
محمد: منو ماشي؟؟؟؟...و شعنه ما توصلوه؟؟؟
راشد: ترا السيارة خربانة....فخليناه يمشي...ترا لازم يسوي رياضة.....
محمد: لا والله..و كم كيلو مشى؟؟
راشد: 2 كيلو قعدة و 2 رقاد و 4 سوالف...
خليفة: حوووووو شو يالسين تخربطون؟؟؟؟ يالله كل واحد يعرف وين دربه...
راشد: ادري انك بتتوله علي و بتييني ركض تقول فدييتك رشود والله متوله عليك....
خليفة: ههههههههههههه.....كفاية قعدة 8 شهور مجابل نيادي......
راشد: وصل جابر.....مرحب الساع جابر...
جابر:....هلا والله....نورت البلاد؟؟؟ حي الله العنقليز...
خليفة: منورة باهلها...........حنا عيال العرب...هب عنقليز يا الدب.....
جابر يوايهم......و يشل جنطة راشد.....
جابر: اسمع خلوف......الاسبوع هذا لازم تيي.......باجر ان شا الله عرس اخوي مبارك و ان شا الله تكونون موجودين....و اسمحولي تراني مستعيل....
هزاع: بالحل....و ان شا الله انكون على الموعد و كيب ان تتش....Keep in touch
محمد: خليفة...شو يخربط ولد عمنا هذا؟؟؟
خليفة: يعني خلنا على اتصال.........
محمد: اها.......يالله.....تندله درب راس الخيمة؟؟؟ قم فطست بالحر..
و في السيارة....
خليفة: ما شا الله..........رينج هه.........يعطيك خيرها و يكفيك شرها....
محمد: اميين.......
هزاع: منو خذلك اياه؟
محمد: خالتي مريم.....حلفت ان يبت فوق 95 بتاخذ لي رينج.......
خليفة: بيضتها و يبتها الحمدلله........
محمد: هيييه يا خليفة....انا من يوم وفاة المرحوم ابوي للحين.....وصيته ترن في اذني اجراس......كلما ارقد...اتذكر صورة امي و صوت ابوي..
ويترحمون عليه......
وتموا سوالف و اعلوم لين وصلوا راس الخيمة.....
ووصلوا هزاع و بعدها ساروا البيت...
خليفة: محمد.....انت مضيع؟؟؟....بيتنا الصوب الثاني.....
محمد: ترا فغيابك....استوت اشياء وااايد......و ما خبرتك عنها.....
حليفة: شووو؟؟؟ شو صار؟؟؟ حد صار فيه شي؟؟؟
محمد: لا الحمدلله الكل بخير و عافية........بخبرك بعد ما تسلم على الاهل......و تستريح من السفر...و لا اقول...باجر يوم بنسير عرس مبارك الخييلي بخبرك شو صار بالضبط...
خليفة: خلاص عيل......محمد......هذا مب جنه بيت ابوي اللي كان مسكن فيه امك؟
محمد: هييه....ترانا الحين نسكن اهنيه....انا و امي و مريم .....و عايشة و عرست...و انت تدري بهالشي..
خليفة: هييه ادري.....و رخصتهم يعرسون و ما ينطروني لاني احتمال اتاخر...اصبر....منو قصدك بامي؟؟؟؟ ليكون امي انا؟؟؟
محمد: (و هو يبتسم) هييييه هاي اماية اللي ما اقدر استغني عنها...
خليفة: محمد....ليكون سويت سحر؟؟؟؟
محمد: اعوذ بالله...(و يضحك)...لا سحر و لا هم يحزنون........بتييك السالفة..
ونزل خليفة من السيارة ويطالع البيت كيف متغير بعد كان مظلم و محد يمشي جريبه....الحين منور و النخل في كل مكان و ديزاين حلو......و اول ما دش شاف البيت اللي من داخل يهبل...فخامة و اثاث يخبل......
خليفة : محمد....وين غرفة اماية؟؟؟
محمد: على ايديك اليمين......بس وصلت...
خليفة يبا يفتح الباب و ايده ترتجف....و قبل لا يمسك مقبض الباب انفتح.....و كانت ام خليفة.....
خليفة تجمد فمكانه.......و امه تطالع في ويه ضناها خليفة اللي اشتاقت له و ليالي يلست تبكي و تصيح عشانه..واقف جدامها.....و كانت خصلة من شعر خليفة طايحة فوق عينه......مدت ام خليفة ايدها تعدل له شعره و تردها ورا اذنه.....و حضنته بقو و يلست تصيح و خليفة هب رايم يمسك عمره و دموعه......
خليفة: اشحالج اماية...ربج الا بخير.؟؟
ام خليفة: بخير و سهالة دام عيني تشوفك...اشحالك انت؟؟
خليفة: دام اني فدار زايد...فبخير و سهالة........استريحي.....
و دش محمد شال جنط خليفة.....
ام خليفة: هلا والله بولدي محمد....تعال ايلس يمبي....
محمد: ان شا الله اماية..بس افر جنط هالتنكر و ببيج فورا......
ام خليفة: بارك الله فيك..ها خليفة...ان شا الله ارتحت في الرحلة؟؟؟؟
خليفة مستغرب من كلام امه.....شو السالفة يا جماعة.....والله بستخف....
خليفة: هه.......ااااا..رقدت من طارت الطيارة لين وصلت....اشحالج انتي اماية؟؟؟ ان شا الله مرتاحة...
ام خليفة: دام محمد سندي وعوني..وخليفة ولدي وصل بالسلامة.....انا بخير و سهالة......تبا تتريق؟؟
خليفة: اوف......ابا خبز سفاع و عسل...و جبن...و مممم و بلا لييط و بيض و لقيمات...و لا تنسين قهوة..
ام خليفة: شكلك يووعان ...شو تاكل اهناك غير السقم......تعال شوف طبخ امك كم يسوى...
خليفة: يسوى الدنيا و ما فيها...بسير اسبح و اشل هالخرابيط اللي لابسنها.....
و سار يدور على غرفته......
خليفة: حمود ويا هالراس.....وين غرفتي؟؟؟؟
مريم: خليفة؟؟؟؟ لا ما اصدق عيوني...خلوف اهنيه؟؟؟؟
خليفة: عيونج جذابة....صدقي ربيعتج فطوم ...
مريم: اشحالك اخوي.....مبيض و محلو...شو السالفة؟
خليفة: تراني اغسل ويهي بكلوروكس كل يوم....
مريم: صدج والله؟؟؟؟!!!!
محمد: لاتصدقينه......عاد خلوف.... بنشوف دبات كلوروكس في غرقة مريم.....اونها تبا تبيض....
خليفة: تسويها....المهم وين غرفتي؟؟
محمد: اخر الممر..على يسارك.....تسبح بسرعة....ريحتك فايحة...جلدي.....تقول اشرف هندي المطعم.....
خليفة: كوميندساي....(اسف بالياباني(
محمد: ناندا هي ما روا..؟؟(شو اللي يصير بالياباني(
خليفة: بروح اسبح .....برب..
محمد: تيت...
مريم: حوووو شو يالسين ترمسون؟؟؟؟؟؟
محمد: شييفرة.......
مريم: شكلكم سبيتوني....بخير عليكم اماية....
محمد: خبريها.......تشوفيها بالمطبخ تسوي اكل حق هالتنكر.....
خليفة و هو ساير الحمام......: و لا انت الحين تقول شاحنة سكس وييل.
محمد: شوف راسك تقول نيسان منجلب....
خليفة: و لا خشمك تقول مدعمية كروزر....
محمد: من شابه اخاه فما ظلم....
خليفة: بعدين برد...بسير اسبح....
ويلسوا مريم و محمد في الصالة و احتشروا...دشت عليهم ام خليفة..
ام خليفة: بلاكم حاشرين الدنيا.....من صباح الله خير......قومي غسلي ثياب محمد..تشوفيه ما عنده ثياب ..
محمد: اماية...ترا ثيابي في الدوبي......و بسير ايبها عقب ساعة..
ام خليفة: و شعنة توديها للدوبي......عندك اختك خلها تتعلم شغل البيت.....الله يعينك يا هزاع..
مريم: يوم بسير بيت ريلي.....بتعلم شغل البيت..
خليفة: بلا كلام زيادة....سوي لي قهوة....
مريم: بسم الله....انت من وين طلعت؟؟
محمد: توني مظهرنه من تحت الكنبة...شو رايج؟
مريم: بشو؟؟....
خليفة: فحلجج اللي شرات حلج البعير....
مريم: انت تتمنى شرات حلجي......فدييت ثمي صغير و حلو.....
خليفة: هب لسان عليج.......محمد....اني لارى بعض القمل المخطط في شعر هذه الشمطاء..
محمد: و ما نفعل بها يا ابا الحارث؟؟
خليفة: اني لارى شر الشياطين و لعنات الللات و العزى يظهر من هذه القميلات اللعينة....اقطع راس هذه الجارية فورا..
مريم: شوو قمل؟؟؟ وين؟؟؟
خليفة: ما تشوفيه تحتج....صدج انج مقصة......و لا اقول....ابرة خياطة احسن....
مريم: مالت عليك......تبا تقطع راسي.......بيلس فوق قلبك....و تطلع لسانها....
خليفة: شو قالوا لج...قلبي كرسي يقعد فيه الساير و الياي؟؟؟
ام خليفة دشت وياها الريوق....: كلوا بالعافية.....و بسكم من الحشرة...
خليفة: الله يعافيج اماية......يا ربي...هذا الاكل و لا بلاش.........وخر يا حمود الدب....هذا الاكل لي انا وبس..
محمد: علة فوق قلبك..........كله من اماية....حد قالها تسوي ريوق و لا اروع؟؟
ام خليفة: انا مسوية لنا كلنا......يالله مريم اقربي و كلي شوي....مستوية قب
محمد: خليفة....هالبيض حقي...خلك باللقيمات بس....
خليفة: حلم ابليس بالجنة.......بيع خبز احسن...
محمد: اماية...شوفي خليفة يرفسني....
خليفة: انا رفستك؟؟؟؟ بس قرصتك انا...
ام خليفة: انا جني قلت كلوا و بسكم من الحشرة....
مريم: اماية...هذيلا من يجتمعوا ما يسكتون....خليهم....ما ينفع وياهم الكلام......
خليفة: لا حووول....شل ايدك قبل لا اقصها لك.....
محمد: والله زين تفكني منها......شو رايك؟؟؟
خليفة: ما طلبت شي ابد......فالك الطيب..........وين الساطور؟؟
ام خليفة: الله يهديكم يا عيالي......شو بلاكم؟؟؟
محمد: اماية...شوفيه يبا يقص ايدي.............و
Time's up … Have a nice night
هزاع: اخيرا....
خليفة: فيني أرقاد………
هزاع: عفوا؟؟؟؟؟!!! ما بتسير صحارى؟؟؟؟؟؟
خليفة: وين؟؟؟؟؟؟ مضيع الشيبة اهناك؟؟؟؟؟
راشد: اه لو سمعك الشيبة…….ترقد اسبوع بالمستشفى…..
خليفة: لو سمعني…… و لو تفيد الاحتمالية و التمني و ..
هزاع: ردينا للنحو…. بس بس عنبوه خيانة عيني عينك ..مب جنك امس رامس انك بتسير صحارى……..
خليفة: متعايز يا ريال…..من الصبح و احنا اهنيه كلاسات ورا بعض و بريك نص ساعة زين نرتاح فيها والشركة مب محصلة غير الجامعة الامريكية ندرس فيها؟؟
راشد: هي حلوة..بس دوام كراف شو بنسوي ؟؟؟؟ و الشباب في الحشرة ما يقصرون….
خليفة: الحين بسير اسبح و العب شوي بالنت….
هزاع: يا موتك عالنت….. ارحم حالك شوي…اتحوط ويانا اليوم؟؟
راشد: والله ما كذبت يا هزاع 24 ساعة مجابل النت و يا ريت شي مفيد …..جات بس
هزاع: يالله خلوف…شل بعمرك نظهر الميغا…. نتشاوف بعد نص ساعة…
خليفة: شو؟؟؟ سوري…اسف…نيه .........كوميندساي….باي لغة اقولك ….ما اقدر…و للعلم خفينا من الجات و الحين مشرف منتديات و هب فاضي…. و تعرف الشغول؟؟
راشد: شو السالفة! جني اشوف الشمس تشرق مرة ثانية…و لا يمكن خداع بصر…..خليفة راعي البنات والجات مشرف منتديات شو حال الدنيا؟؟
خليفة: رشود يا السبال مب تارس عينك؟؟؟
راشد: تارسنها و زود…ما تشوف عيونيه كبار؟؟؟ و يلعب بعيونه
خليفة: ههههه ….لوووووول…. كعكعكعكع…. ضحك …لافينغ…سانتا….هاشيه….نضحك وياك خلاص بطني تعورني….نتشاوف باجر….وداعة الله….
………………..
………………..
………………..
الشباب هب مخلين خليفة بحاله…..طنازة و سوالف و قراض…. ما ينلامون لان خليفة حبوب ومسولفجي ويحب الناس…وما يعصب من التطنيز…وعمره 19 و جبيلته شحي…يدرس على حساب ادنوك… والحين هو يدرس لغة بامريكية الشارجة وراعي بنات عقولة الشباب… ومن ناحية الشكل…عذاب…عيونه عسلية و شعره اسود فاحم….متوسط الطول بس عريض
هزاع: ولد عم خليفة وعمره 19 …. شرات خليفة بالشكل….بس هادي و حبوب…و يحب التمشي و الشعر
راشد: من العين وعمره 18 وجبيلته نيادي…مصخرجي عووود ولسانه شرات السيف ..محد سلم منه و محترف حواطة ..بالاول كان هو و خليفة ما يدانون عسب لسان راشد ..(بعد السب يكون الحب(
والثلاثة يدرسون لغة ضمن مجموعة من الشباب عسب يدرسون هندسة في بريطانيا
………………..
………………..
………………..
خليفة و يالس ينشف راسه بالحمام يسمع تلفونه يرن….
" منو الفاضي يتصل الحين"
يالس يتحرطم …بس من لمح اسم المتصل…رد بسرعة "مرحب ملايييين الا بلاييين و لا يسدن بذمتيه"
جابر: مرحب باجي….اعلومك بوزايد؟؟؟
خليفة: اعلوم الخير…اشحالك و اشحال عربانك؟؟؟ عساهم الا بخير؟
جابر: بخيرما نشكي باس..اخبار الشحوح؟؟؟
خليفة: بخير و نعمة…..وينك لا تتصل و لا تتكرم بمسج؟؟
جابر: انا القاطع يا ويه الفلس….متى اخر مرة شفتك فيها؟؟؟؟
خليفة: ممممممممم…بالعمرة…ليش؟؟(باستهبال(
جابر: هيييييه..الظاهر ان غراشيب الامريكية فروا راسك…
خليفة: الا ما يفرون الراس…وين ما تصد تشوف غرشوب.....عاد شو الحل؟؟
جابر: ههههههه…..ما فيك حيلة….
خليفة: بو حمد..من متى ضربك الشوق صوبي؟؟؟
جابر: والله زين ذكرتني….طلبتك قول..
خليفة (يقطع كلامه): تم
جابر: تعجبني,…… الخميس الياي عرس اخوي سالم….و ان شا الله انشوفك اهناك….
خليفة: من عيوني….كم خييلي وياي؟؟؟؟
جابر: فديتك انا…..انشوفك عخير ان شا الله….وراي عييايز….
خليفة: الله يكون بعونك….
جابر: شي بالخاطر..
خليفة: سلامتك و شوفتك..
جابر :وداعة الله….
………………..
جابر الخييلي ربيع خليفة روح بالروح كانواا ربع ايام جامعة الامارات بس بعدها سار خليفة بعثة ادنوك… وما نسى ربعه في العين…
. ………………..
خليفة: والله انكم فاضيين بدرجة وزير.ما حصلتوا غير الهندية ترقمونها...هههههههههه جاسم..الصراحة تكسر الخاطر..بطني تعورني..
جاسم: النحاسة من ويهك طبت علينا .....و الا احلا البنات يموتون بالتراب اللي ادوسه...
خليفة: مبين...حتى الهنود انجبروا فيك...
ونقع هو و هزاع من الضحك ما قدروا يمسكون اعمارهم....
جاسم و هو بينفجر من الغيظ : بتسكت و لا انعال بحلجك..
خليفة: لا انت و لا عشرة من امثالك يرفعون النعال في ويهي...و انا بن عبدالله الشحي
جاسم: يا الله شو بلاني بالشحوح....لو يالس مع الربع بالقهوة ابرك لي..
هزاع: انف عليك.....غيرك يقول فديت الشحوح و انت تقول شو بلاني..... هب منك..من الهندية..!!
خليفة انفجر من الضحك و احمر ويه جاسم من القفطة.....
خليفة: اه بطني....بسكم يالله...
هزاع: شو بتشوفون بالسينما؟؟
خليفة: كل الافلام مملة...مالي بارض..دشوا انتوا...
جاسم: استوت الخايسة.....ادش يعني ادش...
خليفة: دشوا على حسابي...المهم افتك ...ولو تباني بارقم لك احلا بنت بعد..
جاسم: و ان سويتها لك مني اللي تباه..
خليفة: خلاص ابا رقم الهندية....و يضحك ....بس تحدي ...و خلال دقيقة...احلا بنت تتصل بك الحين
جاسم: اوكي
سار خليفة اللي ما حصل غير هالوسيلة..عشان يفتك من حشرة السينما.......
جاسم و هو يطالع ساعته.....مرت نص دقيقة...سمع تلفونه يرن رنة و سكت...
هزاع و جاسم يطالعون بعض.....مستغربين.
اتصل بالرقم اللي ظهر له....
جاسم: مرحب الساع
البنت: مرحبتين....كيف الحال؟؟؟؟
جاسم: بخير و نعمة..اشحالج.؟
البنت: الحمدلله....انت اللي لابس كندورة كركمية؟؟؟
جاسم فج حلجه....سويتها يا خليفة......
هييييييه ممكن اشوفج مرة ثانية؟؟؟؟
البنت: انا بستار بكس..الطاولة الثالثة عاليسار.....لابسة شيلة بني عاسود....
جاسم و هب مصدق عمره...سار و يوم شاف البنت...انصدم لان البنت من الحلاة تعق الطير من السما....الله يغربلك يا خليفة..قردنت البنت و طيرت عقلي....
خليفة سار صوب خور راس الخيمة اللي عند المنار....يالس يفكر في حاله...........بعد 3 شهور بيسافر يدرس برع.......الله يعيينه.......
ويلس يشل(يعطي راكان جدومي و يروح عنه(
سلامي للي فالبال طاريه***و ما غاب عني فكري لو ثواني
و اقول يا غايب وين ما تسال***سالت عنك جبال القوافــــي
و سالت الطير بالسما عالي***هل مريت على ديار الحيبيبي
و سالت غراشيب البلاد يا *** غرشوب هل سمعت بخير خلي
خلي لو يدرون المزاايين عنه***فيه من الزين مخشعنـــــــي
كان يشل و هب حاس بعمره لانه خارج نطاق التغطية....
والبنات هب مصدقين اعمارهن..."فدييييته...صوته حلو...من وين هالمزيون...الخ" و بعدها شل بعمره وسار صوب الشباب و سلم عليهم و سار البيت .......
ــــــــــــــــــــــــــــــــــــــــــــــــــ
خليفة و هو داش يالس يغني..
"ما لوم نفسي ياللي عافت لذيذ الزاد...من علتي دمعتي من ناظري تنهل...
مريم: يا ويييييييل حالي......و انا اقول من هو العاشق الولهان..............
خليفة: يا سااحر العينيين ما ترحم........القلب من حبك غدا مغرم......
عايشة: شكله الريال متخشع......
خليفة: الا الغير و الشيفت و الدفريشن متكسرين و المكينة متكسرة...
ام خليفة: يا ويييلي.....منو ها اللي ما يعرف يسوق؟؟؟
خليفة و يلوي على امه.........: لا فدييتج بس يالسيين نتمصخر.............
ام خليفة: الحمدلله.....تحريت حد مسوي حادث.......
خليفة: الا حمود وينه؟؟؟؟........البيت صخة؟
ام خليفة: تشوفه يالس ويا هالشلة اللي عند الدكان......
خليفة: اوكي....بسير ايبه.........
وظهر خليفة و كان يالس يتمشى و لين وصل الدكان........شاف الشلة يالسة تدوخ.......بس اللي فجر اعصابه ان اخوه يالس يدوخ وياهم........
ومن شاف محمد اخوه طفا الجيكارة و هو يرتجف من الخوف.........
خليفة مسك اعصابه........و قرر يستعمل وياه اسلوب العقل..............
خليفة: محمد........تعال اباك شوي.......
محمد: ان شا لله........يالله يا جماعة برخصتكم............
خليفة اول ما قرب منه اخوه شم ريحته اللي ما تنشم ..........
خليفة يطالع اخوه.........: اسمعني و افهم الكلام عدل.......تدش البيت سييييييييدة و تسبح و تبدل ثيابك واغسل اسنانك من ريحة الجكاير.........انا ناطرنك في الاستيشن..........اوه.....و البس و اكشخ بنسير المنار...
محمد: منار هالحزة؟.
خليفة: الساعة ما يات حتى 8.........يالله تحرك............اباك برمسة بالدرب.........
محمد و هو يرتجف: ان شا لله.......
وركض محمد البيت و خليفة يتمشى وراه.....و يالس يفكر بطريقة تبعد محمد عن هالشلة..
خليفة: ما شي غير هالاسلوب..........
ورتب له كل شي..
………………..
محمد هو اخو خليفة ....عمره 17 سنة..من ام ثانية توفت وكان عمره 3 سنين..لكن ما عليه كلام اذا بيصور بالكاميرا..يموت بالتصوير........يشبه خليفة طبق الاصل......بس الفرق ان عيون محمد سودا......
………………..
........و بعد نص ساعة كانوا طافوا مينا صقر سايرين راس الخيمة........
محمد خايف من ردة فعل خليفة و خليفة سااكت...
خليفة: عنبوه الفقر......ما عندك عطور مثل الناس؟؟
محمد: هه.....لا ما عندي..........
خليفة: افتح السدة شوف اللي يعيبك و اتعطر منه...بس لا تخلصه......
محمد حاول يرسم ابتسامة على ويهه...........
" يالله يعدي الموضوع على خير........ما اتوقع على خير.....خليفة عصبي مثل ابوي...لالالا...خليفة اهدا.......بس شو بيسوي؟؟؟؟.........يا ريتني تميت في البيت.....ابرك لي من القعدة اليوم...الله يغربلك يا فهد.....ما حصلت تقولي الا اليوم؟؟؟" محمد و هو يرمس عمره.
سار خليفة البنك و سحب له بيزات....و بعدها ساروا مركز المنار..........
ودشوا كارفور....و محمد ساكت........و راحوا صوب الكمبيوترات........
وعاد اشتغلت رمسة الانجليزي اللي ما فهم محمد منها حرف و هو يلحق خليفة مثل العبيط و لا يدري شو السالفة..
وشاف اخوه يالس يشتري لابتوب و طابعة و سكانر و كاميرا ديجيتال....و محمد مستحي يرمس اخوه بعد ما شافه يدوخ......و لا ساله عن شو بيسون....
وودوا الاغراض السيارة و بعدها ساروا باريس غاليري......
خليفة: محمد....شو اسم العطر اللي عيبك؟
محمد: هه.......ما اادري....ها االذهبي.......
خليفة: اها عرفته....بو حرفين سي متقاطعين......يسمونيه شانيل...
ويهز محمد براسه هييه......و اشترى له عطرين و نظارة شمسية حلللوة و بعدها سار خليفة يبا يفصل حق عمره كنادير..
خليفة: محمد تباني افصل لك؟؟؟؟
محمد: هه....ما ادري ........... كيفك...
خليفة: سالتك سؤال محدد......تبا و لا لا؟
محمد: هييييه.....
خليفة: خذ قياسه و فصل له 6 و انا 2.......و ابا الاربعا الياي مخلصة....
محمد: خليفة...مب جنه وايد 6؟؟؟
خليفة يطالعه بنظرة: .......يوم بتكبر....20 كندورة ما بتكفي.......سير اتنقى لك كم من سفرة حلوييين ....
محمد: ان شا الله.........
ـــــــــــــــــــــــ
و بعد ما ظهروا من المنار و بالدرب وقف خليفة عند الرمس......
خليفة: تعرف تسوق؟؟؟
محمد: هه....هيييه اعرف.......
خليفة: راوينا شطارتك.....
وبدل وياه.....و خليفة يالس يطالع من الدريشة........
خليفة: محمد............من متى انت تمشي ويا هذيلا ؟
محمد: و هو يرتجف....من اسبوعين.......
خليفة: و من متى تدوخ؟
محمد: من اسبوع.........
خليفة: لحقت عليك الحمدلله..........اسمعني يا محمد.........هاي الشلة ان مشيت وياها ما بتشوف عمرك الا في مستشفى او سجن او قبر............بس اللوم مب عليك........علي انا لاني ما امشيك وياي ولا اخذك وياي مولات و سينما.......او حتى يلسنا ويا بعض...........تعرف ليش ماخذ هالاغراض؟؟؟
محمد: ما ادري؟؟.....عشانك هيه......
خليفة: شفت كيف انك ما اتدري عني شي.......انا عندي كمبيوتر مكتب و لابتوبين..........ها اللابتوب ماخذنه لك انت.....و بقية السامان كله لك....بايلس اعلمك كيف تشتغل عالكمبيوتر............و يبت لعمري احلى كاميرا ديجيتال.......تصويرها عجيييب والزووم يا ويييييل حالي.... و لا اروع.....
محمد من سمع كاميرا بيصيح...: ممكن اشوفها بس؟؟؟
خليفة يبا يتمصخر عليه: طاع ويهك تقول فلاش كاميرا...سوري كاميرتي راهية.....
محمد: بس لو من بعيييد..
خليفة ناقع من الضحك..............: صدج انك طمة......هالكاميرا لك انت......انا مالي حاية فيها... ويبت لك طابعة من الزين و سكانر عشان تستعملهم بالتصوير..
محمد لو الشور له يستعرض الحين من الفرحة........
خليفة: اسمعني...........انا تراني مشرف منتدى.......لكن ما اعرف شي بالتصميم............شو رايك تشارك ويانا...بسجلك و كل شي....و بيب لك برامج تصمم صور على كيف كيفك........ما بتحس بالوقت .. ولا شلة و لا هم يحزنون...
محمد: تم..............
وارتاح لانه حس انه عنده اخو يقدر يستند عليه وقت الحاية.........اخو يهتم فيه ويشوف وين مصلحته....
خليفة: اوه نسيت.......اصبر شوي وين سار الكيس؟؟؟؟
محمد: اي كيس؟؟
خليفة: يوم انا رحت اقضي شغيلة اشتريت حاية........اوه هذا هو.......
محمد: شو ها؟؟؟
خليفة: ايدد تلفون نوكيا......و حصلت رقم تلفون............جان حصلت احسن عنه خبرني ....فيه 5 ارقام متشابهة.....و ورا بعض...كنت ياييبنه حق عمري.....بس تفداك..
محمد يبا يعق عمره من الفرحة.............هذا الاخو و لا بلاش.......
خليفة: محمد..............بقولك شي..............اياني و اياك انك ترابع هذيلا..........انا ما يبت كل هذا الا عشان ما اباك تضيع منا..
محمد: فالك طيب..........
خليفة: نسيييت........اسمعني...........الخميس الياي بتسير وياي العين و ريولك فوق راسك.......
محمد: العين؟؟؟!!!!! شو نسوي اهناك؟
خليفة: عرس اخو ربيعي...........ابا ايول شوي.......احس ان مفاصلي مصدية............
محمد: فدييييييتك اخوي...........هذا الكلام و لا بلاش.......
خليفة:يالله ساعدني نزل اغراضك غرفتك......و لا تسوي حشرة........ترا ابوي راقد و ما يحب حد يوعيه...
و يلسوا يرتبون الاغراض و خليفة يطالع كبت محمد اللي ثيابه عادية............
خليفة: ذكرني باجر نسير بن ظاهر و جيوردانو...........
محمد: ان شا الله..........
و دخلوا بعدها عالنت و يلس محمد يتعلم من خليفة.......و فتح له ايميل و سوى المسن و نزل له فوتوشوب 7 عربي و يلس يتعلم من خليفة كل شي و احساسه ويا هالشي اللي يتسمى لابتوب..
خليفة: الحين بعلمك كيف كاميرا الديجيتال.........و يلس يعلمه و كيف يصور و يكبر
خليفة يطالع الساعة: شييييييييت الساعة 3...........يالله وقت الرقدة...تصبح على خير.........
محمد: و انت من اهله........
وبعدها تمدد محمد عالسرير..........يالس يفكر باخوه.......لو ابوه درا بيذبحه...بس خليفة كان غيير........والله ما قدرت انطق كلمة من القفطة و اسلوبه الهادي...ما توقعت اخوي جيييييييه.........بسنا من ايام الصياعة.....باجر من الفير بسير اصور من قمة اليبل...والله باتخبل.......كاميرا ديجيتال و لي انا بس...
ــــــــــــــــــــــــــ
خليفة متمدد عالسرير..........
قرا فرحة الدنيا في عيون اخوه الصغير يوم يالسين يركبون الاجهزة..............المهم يبعد عن الشلة...
ويشل التلفون و يقرا مسج من رقم غريب....." فدييت من مر على بالي.....و سلب روحي من كفن جسدي"
خليفة: منو ها بعد؟؟؟؟ و يتصل و يرد عليه واحد....
...:هلا
خليفة: منو انت؟
...........: اه؟؟؟؟؟خليفة عن الاستهبال؟؟
خليفة: منو انت الحين؟؟؟؟ و هو معصب
...........: انا محمد اخوك والله
خليفة: اه؟؟؟ و من وين يبت هالرقم؟
محمد: اه؟؟؟؟ توك ماعطني اياه؟؟؟
خليفة: متى عطييتك رقم انا؟؟؟
محمد: يايينك الغرفة..........
خليفة و مستغرب....و دش عليه محمد....
خليفة: شو السالفة؟؟
محمد: هذا الرقم تونك ماعطني اياه...و حكا له السالفة.........
خلييفة: ايييييييوه..........يالله اقلب ويهك.........باجر ورانا نشة من الصبح.........ابا اسير دبي بتحوط....
واهنيه قرا في عيون اخوه رجا"دخيلك خذني"
خليفة و يكمل كلامه: جان بتسير ويانا حيابك....انا و هزاع و انت ..........يالله سير ارقد.........
ـــــــــــــــــــــــــــــــــــــــــــــــ
محمد و ناش من الفير يالس يصور النخل بكاميرا الديجيتال......و يصور النخل من تحت و يصور العشب.........ولين ما طلعت له عبارة ان الذاكرة فل.....فرد البيت و هو يالس يتحرطم.....و يلس ينزل الصور عاللابتوب....و يلس يطالعها و يختار اللي يباها..........و دشت عليه مريم.....
مريم: اوف....شو ها؟؟؟؟ من وين يبت كل هذا؟؟؟؟
محمد و هو متشقق: و ربج بعد.........
مريم: محمد...ارمسك جد......امس بالليل ما كان عندك هالاشياء.......اصبر .....شو ها العطر؟؟؟؟؟ ياااي ريحته واايد حلوة......شو السالفة حمود.....ما احيدك تعرف عالكمبيوتر...شو استويت بوكيمون وتطورت؟؟؟؟
ودش خليفة هذيج الساعة: صباح الخير.....ها اشوفك قاعد تسوي شي.....ليكون صورت؟
محمد: اسكت....كاميرا و لا اروع.........فديييتك اخوي......صورت لك الطوي و لا اروع..شوف هالصورة شو رايك فيها؟؟
خليفة: اوف....بس تكون احلا لو حاط الكاميرا على ستاند........تكون ثابتة......باشتري لك واحد جان تبا...
محمد: بس ما مداني اصور 20 صورة الا و الذاكرة امتلت......شو اسوي؟؟
خليفة: ايووه....بسييطة باشتري بطاقة ذاكرة تصور 100 صورة جان تبا...و رزليوشن اقوى بعد......يالله جهز عمرك....ورانا دبي....
مريم: نعم....و اشعنى ما تاخذوني.......و ثانيا ليش ماخذ كل هذا لحمود و احنا طاف؟
خليفة: شفت محمد كيف البنات يغارون.............خذها قاعدة...بنت ما تغار من عشر طعش المستحيلات..اذا الام تغار من بنتها اذا كان ابو البنت يدلعها اكثر من حرمته......عيل شو بتقول عن مريوم الدبة....
مريم: عفوا...منو الدبة؟؟؟؟....والله لاخبر عليك ابوي.......
خليفة: خبريه..........
ويرن تلفون محمد....و ظهر من الغرفة ...و مريم تطالع و هي فاجة حلجها...
مريم: خليفة ها مب جنه تلفون؟؟؟
خليفة: عيل شو بيكون يعني؟؟؟؟ زنوبة؟؟؟
مريم: من وين ياب التلفون..........؟؟
خليفة: انا ماخذ له كل ها الاغراض............لا تخافي....
و دشت ام خليفة و تشوف الخبصة.....
ام خليفة: خليفة......ليش هالاغراض اللي ماخذنها لمحمد و البنات ما يبت لهم شي...؟؟
خليفة: لا حوول...ردينا.....اماية.....خافي ربج امه متوفية......ليش حاقدة عليه جيه؟؟؟
ام خليفة: ما تشوف ابوك كيف مدلعنه........و مهتم فيه اكثر من البنات.......
خليفة: خافي ربج اماية.....هذا امانة في رقبتنا......انا اخوه الكبير اذا ما اهتميت فيه ...اخلي عيال الشوراع يهتمون فيه؟؟
ام خليفة: جهنم الحمرا تاكله......
مريم: خليفة.......اباك تاخذني الكويتي ابا اشتري عباية.
خليفة: اذا اليوم اسف....بسير دبي......
ام خليفة: و شعندك في دبي؟؟؟؟
خليفة: شغيلات ويا هزاع..........
ام خليفة: لو تاخذ وياك هالحيوان يكون زيين.....
خليفةو بدا يعصب....: دامه حيوان....فانا و عيالج كلنا حيوانات...لان ابوي هو ابوه.....
ام خليفة: فدييت بناتي.....بس يسمعون كلامي.....اما انت لا........
خليفة: اماية...خافي ربج....ليش تعاملين محمد جيه.......كله لانج ما تطيقين امه؟؟؟....و لانه وارث عن امه خير وايد؟؟؟
ام خليفة: هيييييه ما اطيقها........
خليفة: اندله طريق دبي وين...افك عمري من الصدعة......
وسار غرفته و اتصل بمحمد يقوله يلبس بيظهرون..........بس اللي ما يعرفه خليفة ان محمد كان ورا الباب يسمع اللي صار..
وسار محمد يسبح و اول ما دش بدا يصيح......ام خليفة دومها تعامله جيه.........مثل الحيوان في البيت.. ومر طيف امه فباله......و زاد صياحه.......
" وينج اماية....والله مشتاق اقولج اماية.......تركتيني لهاي الدنيا......ابا انش بالليل اسير غرفتج و تقولين لي..ها وليدي بلاك...تعال ارقد يمبي.....والله ابا احضنج لو دقيقة....لا بس ثانية تكفيني.....من وعيت في هالدنيا و اسمع ربعي في المدرسة......اماية قالت لي....اماية سوت.....اماية تباني.....و انا اتم ساكت...وين امي.....ابوي قال لي...ان امي عند الله.....ما كنت ادري شو يعني هالكلام؟؟؟.........ابا اقوم الصبح اشوفج يالسة تقرين قران....ابوس راسج و اقولج صباح الخير.......ابا اسمع وليدي...تتريق؟؟؟...من وعيت و ام خليفة ما تطيقني......انا شو ذنبي؟؟؟؟..هل لاني يتيم؟؟؟...لو مت وراج مب احسن...افتك من هالدنيا و بلاويها.."
و سمع دق عالباب و كان خليفة حاشر الدنيا..........يالله حمود خلص.....
وبدل و لبس و كشخ و ظهروا........
وفي الدرب لبيت هزاع...
خليفة: ما لك من كلام امي..........الله يهديها بس........
محمد: تعودت على هالكلام......
خليفة: ان شا الله تتغير........المهم...انت علمي صح؟
محمد: هيييه.....
خليفة: و كيف درجاتك......؟؟
محمد: تحت المتوسط.....
خليفة: افا....اسمعني عدل.........اباك ترفع الراس.......عندك ثانوية عامة.......لا تخلي البيت يشغلك..ركز بدراستك....شوف كم يبت انا.....93 علمي....و الحمدلله وفقني الله في ادنوك....و ان شا الله بسافر بريطانيا..
محمد: انا ابا ادرس كمبيوتر........
خليفة: بسك....تبا كمبيوتر.......عندي لك واسطة بيطرشوك امريكا تدرس 4 سنين بكالوريوس..بس شد حيلك عدل......و ان رفعت الراس......لك مني اللي تباه........لو تبا مرسيدس كوبي فالك الطيب......
محمد: خليفة.....موتر ما يهمني......ابا اثبت لامك و خواتي اني مب حيوان........ابا اكون انسان لي قيمة في هالدنيا...
خليفة سكت احتراما لرغبة اخوه........و لين وصلوا لهزاع و شلوا باعمارهم دبي.......
......
شو بتكون علاقة محمد بام خليفة؟؟؟....
وليش هالكره اللي شالتنه ام خليفة لمحمد؟؟؟؟؟
((الجزء الثاني)).~..
بو خليفة و ام خليفة يالسين يتغدون ويا بناتهم...
بو خليفة: وين خليفة و محمد؟
مريم: ساروا دبي الملاعين...
بو خليفة: طمي لسانج داخل حلجج و ما ابا اسمع هالرمسة مرة ثانية........هذيلا اخوانج..
ام خليفة: اخوهم مب اخوانهم....
بو خليفة: جان مب تارس عينج ولدي محمد تندليه بيت اهلج..
ام خليفة: هذا الولد ما يستحي.....يطول لسانه علي..ويقولي انتي عيوز مخرفة.......ان ما ادبته انا بادبه..
بو خليفة: هو ولدي مب ولدج.....و ثانيا مالكم شغل فيه..............الولد يتيم....راعوا شعوره......
ام خليفة: يتيم مب يرفع خشمه علينا........مثل امه امنة.....خقاقة عالفاضي..
بو خليفة: امنة هاي تسواج وتسوى طوايفج كلها..من خذيتها لين توفت الله يرحمها ما نكدت فيني .....و اطيب خاطري..
ام خليفة: الحمدلله افتكينا..........
بو خليفة: ذيل الكلب ما يعتدل............و بتمين حيوانة باسلوبج هذا طول عمرج..........
وشل بعمره و سار يرقد...
عايشة: اماية.....لأيش ابوي كله بصف حمود مب ويانا لو مرة........
مريم: تشوفيه طمعان في الخير اللي ورا حمود.......
ام خليفة: ماعليه يا حمود......انا وراك و الزمن طويل.......
ـــــــــــــــــــــــــــــــــــــــــــ
بو خليفة يالس في النخل و يتذكر ايام امنة الله يرحمها...هيييه يا امنة..وينج..ياما خففتي علي من مصايب..و ياما تسنديني يوم ارد من الشغل تعبان...تذكرين يوم كنتي تحتشرين يوم اطلع الظهر ابا اشوف العمال في النخل..تحتشرين علي......شو لازمنك....عابلهم العصر....الحين ارتاح..........والله بزعل منك عبدالله..واتنهد.....كنتي لي السند و العون في كل مصايبي........الله يعينك يا محمد على هاي الحرمة...حريم الفريج مب طايقينها هي و بناتها.......بس خليفة الوحيد اللي يشبهني....حتى ان اخوي بو هزاع يشاورني نزوج خليفة الحين...الناس لو الشور لها تبا تتضارب عليه........محمد...ما ادري شو مصيره يوم رابع هذيلا........مب متاكد من الرمسة اللي سمعتها من بو سالم ان محمد يدوخ..بشوفه يوم بيي من دبي..........
ـــــــــــــــــــــــــــــــــــــــــــ
خليفة: محمد....متى اخر مرة زرت خالتي مريم؟؟؟
محمد: خالتي مريم؟؟؟ .......من سنة..........والله مشتاق لها....
خليفة: ترا هذا بيتها.......شو رايك ننزل؟؟؟
هزاع: خلاص.....انا بقضي شغيلة فمركاتو و بييكم بعدين.....
خليفة: خلاص عيل....بينا كول....يالله نزلنا محمد.....
و نزلوا عند بيت مريم اللي هي خت امنة الوحيدة.....و دقوا الجرس وشوي فتح عليهم الباب احمد ولد مريم ..
احمد: هلا والله.......خليفة اهنيه.........مرحب الساع...اقرب شعنه ما دقيت علي؟؟؟
خليفة: امتسح رقمك من عندي بالغلط.......قريب ان شا الله.......
احمد: اصبر ها جنه حمود ولد خالتي....
محمد: اصغر عيالك حمود.......
احمد: عادي يا ريال.......اقربوا...
وقربهم ميلس الرياييل......و سار يزقر امه و ييب القهوة.....
و شوي دشت مريم ام احمد...
ام احمد:هلا والله بريحة الغالييين........اشحالك يا وليدي......
محمد و هو لاوي على خالته......: الحمدلله خالتي...بخير و سهالة...اشحالج انتي؟
ام احمد: بخير ما نشكي باس........هلاا والله بخليفة......اشحالك ربك الا بخير و سهالة؟
خليفة: بخير دامج بخير ام احمد......
ام احمد: والله تولهت عليك وايد يا محمد.....اتصلت اكثر من عشر مرات.....و يقولون لي محد...شو عمتك فاطمة وياك؟
محمد: الحمدلله...كل شي تمام...
ام احمد: يا ولدي يا محمد....فاطمة و اعرفها عدل.........ادري انها ما اطيق طاري اسمك حتى..ليش ما تسكن عندي اهنيه في دبي؟؟؟
محمد: ما اقدر افارق ابوي يا خالتي.......
ام احمد: الله يرحمج يا امنة......نفس طباع امك بالضبط.....ياما نصحتها تبعد عن فاطمة...وتقول......ما اقدر افارق عبدالله........ (وبدت دموعها تنزل..(
محمد: خالتي.......احكي لي عن اماية..؟؟
خليفة يطالع محمد متعيب من الكلام....لها الدرجة امه ما تفارق ذكراه...........و يطالع خالته.......
ام احمد: اصبر شوي..........عندي لك شي ابا اعطيه لك من زمان..........دقيقة...
و ظهرت من الميلس ودش احمد يقهويهم........و دشت ميثا اخت احمد و عمرها 16سنة..وكانت مستحية..
ميثا: سلام عليكم...
خليفة و محمد: و عليكم السلام و رحمة الله و بركاته........اشحالج ميثوه؟
ميثا: بخير طاب حالك.....اعلومكم؟
محمد: بخير و الحمدلله...........شو الدراسة وياج؟
ميثا: تمام...........
احمد: ميثا.......قربي صحن الكنافة من عيال خالتج......(لان امنة هي ام خليفة بالرضاعة(
ميثا: ان شا الله........و بعدها ترخصت و سارت غرفتها........
محمد يالس يطالع الباب اللي ظهرت منه ميثا......
احمد: ها خليفة....مبروك عالاشراف.........اشوفك ناوي عالادارية......
خليفة: ان شا الله اكون اداري......خبرتك...
احمد: عن شو؟
خليفة: محمد مشارك ويانا في المنتدى......
احمد: في ذمتك.......شو اسمه؟؟؟.......ليكون صدى الاحزان؟؟؟
محمد: هيييه......كيف عرفت؟
احمد: انسيت اخبرك اني مشرف الجرافيك و التصوير.......شفت صورة اليوم الصبح من عضو يديد لنخلة...و كانت روعة..
محمد: الحمدلله........كنت متردد احطها و لا لا......بس قررت و حطيتها....
احمد: حط صور طبيعية واايد لان الناس تحتاجها واايد....ببحوثهم و لا خربطانهم...
ام احمد: السموحة عالتاخير......و كانت شايلة فريم صورة....
محمد من شاف الفريم بدا قلبه ينبض بسرعة......صورة منو بتكون فيها؟؟؟
ام احمد: يا وليدي هاي صورتك ويا امك و عمرك سنتين و نص...ٌقبل لا تتوفى امك ب6 شهور........كانت هاي الصورة الوحيدة لامك لان ابوك ما يبا حد يصور حريمه.....
محمد مد ايده و هي ترتجف.....هاي صورة امي؟؟؟....ما اصدق.....صورتها ضبابية فذاكرتي.....كيف شكلها؟؟؟..
و من قلب الفريم يشوف الصورة انصدم....كانت الصورة لامه شايلتنه في حضنها و يمبها خليفة يوم كان عمره 5 سنين......و كانت الابتسامة الحلوة مرسومة على شفاتها..
بدون ما يحس بدت دموع محمد تنزل مثل المطر........
" هاي امي الحين.....فدييتج اماية......والله مشتاق لج.......ابا اصيح في حضنج......"
وتموا اللي في الميلس كلهم ساكتين ......و قطع الصمت تلفون محمد و هو يرن......
محمد و هو يمسح دموعه......: الو مرحب الساع....
و ظهر من الميلس و سار الحديقة.....
ام احمد: الله يرحمج يا امنة .......الا اقول يا ولدي خليفة......كم رقم محمد.....تعرف ما فيني اتصل بالبيت و تعرف انت...
خليفة: رقمه هو $$$$$$$.......
احمد: شييييت....منو ظهر هالرقم.؟؟؟
خليفة: انا ظهرت له...
احمد: انزين تذكرني ولد خالتك ....
خليفة: ان شا الله. بحاول.....
و في الحديقة....
محمد: افا يا بو عسكور........لا ما اتوقع ان سلطان بيسويها..المهم سجل عندك رقمي..$$$$$$$....هي هذا هو...قول لا اله الا الله.......يالله سلم على حمدان...فداعت الله....
ويلس عند النافورة و تنهد..ويطالع الصورة بايده......و بدت دمووعه تنزل مرة ثانية......من يقول ان محمد اللي كان معروف عنه ان صايع المنطقة بكبرها تنزل دموعه تنزل جيه.......كان معروف عنه بالمشاكل ويا شباب المنطقة..فغليلة وشعم والجير..ما خلى حد الا اضارب وياه....و هذا الحين تنزل دموعه بسبب صورة..لكنها صورة امه الي انحرم من شوفتها و نطق كلمة اماية.......و رفع عينه يطالع النخل ......." هييه من يتوقع يا محمد ان دموعك بتنزل جيه".......
وحس بحركة جريبة منه....افتر صوب الصوت...و تصنم.....كانت ميثا بنت خالته......و كانت دموعها تنزل..وقف و تم يطالعها.....و هي من شافته مسحت دموعها و ويهت صوب البيت...
محمد: ميثا.....
افترت ميثا صوبه....و من شافته بدت دموعها تنزل مرة ثانية....قرب صوبها......
محمد: ليش تصيحين ميثاني؟؟؟....انا ما استاهل دموع حد......احس ان مالي قيمة في هالدنيا......انا راعي مشاكل وضرابات.......و يقولون عني صايع و ما ايب غير البلاوي....
ميثا: جان مالك جيمة ما عطتك امي صورة خالتي امنة....
محمد تصنم فمكانه..كان يعتقد ان خالته متعاطفة وياه.....لانه يتيم.....بس كلمات ميثا جنها صفعة على ويهه..
ميثا: امي كل يوم تتصل فبيتكم تبا تسمع صوتك و تعرف احوالك.....و تصيح بالليل و تقول محمد يا ولدي ما اعرف عنك خبر ولا حال..رقدت عدل و لا لا؟؟..تعشيت زين؟؟؟......شو دراستك؟؟؟؟...واخرتها تقول جيه؟؟؟ليش تحس ان الناس متعاطفة وياك؟؟؟..امي تحبك مثل ما تحبني انا و احمد..
وبدت تصيح و دخلت البيت و دموعها مثل المطر....
محمد هب قادر يقول كلمة...
خليفة و اللي يشوف الموقف من بعيد و احمد يمبه.......
احمد: بعدك يا محمد تحس ان امي متعاطفة وياك؟؟؟؟
خليفة: لا تلومه...اللي يشوفه من امي العن.......و ان شا الله بيتغير........
احمد: ان شا الله........لازم نرفه عنه........هو يرمس بنات؟؟
خليفة: و لا يطيق سيرتهن.......شو الحل برايك؟؟؟
احمد: تعرف عند منو الحل؟؟؟؟
خليفة و هو يطالعه: منو ؟؟؟
احمد: ميثا..........
خليفة: شووووو؟؟ انت خبلة؟؟ تبا ميثا ترمسه بالتلفون؟؟؟
احمد: لااااا...شو خبلة انا؟؟؟؟........هييه عندك عالمسن.......فعط ايميلها لمحمد.......هي الوحيدة اللي تقدر تخفف عنه.....و بعدين هي بنت خالته....يعني بيخاف عليها مثل ما نحن نخاف عليها....
خليفة: خلاص عيل......برمسه اليوم..........بنسير الحين.......لازم اكون في البيت الساعة 8 لان ابوي يبانا برمسة..
احمد: يا ريال ......تم شوي بعدك......
خليفة: ما فيني .......بسير ازقره و بنتوكل.....
وترخصوا الجماعة و تم محمد طول الدرب ساكت.....و يطالع الصورة كل شوي......
ــــــــــــــــــــــــــــــــــ
بو خليفة: محمد....تعال اباك برمسة......و انت يا خليفة بعد تعال.
محمد: ان شا الله الوالد.......
و ساروا الميلس...
خليفة: خير ابوي.....
بو خليفة: كل خير ان شا الله...بس ابا اتاكد من رمسة سمعتها عن محمد....
محمد و خليفة يطالعون بعض
بو خليفة: محمد....سمعت انك تدوخ؟؟؟
اهنيه خليفة انصدم........شو بتكون ردة فعل ابوه.......محمد شو بيقول؟؟ بيجذب و لا بيعترف.....؟؟
محمد: هييه يا ابوي...
بو خليفة: و تقولها جدامي؟؟
محمد: بس كنت ادوخ......خليفة شافني و رمسني..وتركت الشلة اللي كنت وياهم..واشترى لي لابتوب و كاميرا عشان اشغل وقت فراغي و ما اظهر ويا هذيلا..
بو محمد: صدج هالكلام يا خليفة؟
خليفة: هيييه..بس يا ابوي لا تلومه.....السبب مني انا لاني ما اخذه وياي مكان و تاركنه لعيال الشوارع..لو اني اخذه وياي...جان ما صاحب هذيلا........بس الحين هو حلف يمين ما يلمس جيكارة و لا يرابع هذيلا..
بو خليفة و يالس يطالع محمد...
بو خليفة: طحت من عيني ...طحت من عيني يا محمد.........لكن الحين بعد هالرمسة......كبرت في عيني..وان شا الله تكبر اكثر و اكثر....و ترفع راسي في الثانوية العامة مثل ما سوى اخوك..ما اوصيك على دينك ونفسك...ام خليفة و طنشها.....بس لا تتركها لحالها......ترا خليفة بيسافر وبتكون انت سندهم...
محمد: ان شا الله يا الوالد.....و باذن الله لاخليك تمشي بين الناس وتقول هذا ولدي محمد رفع راسي ...ريال و النعم فيه و ينشد فيه الظهر..
وقام و حب راسه......
بو خليفة: اذا الله كتب لنا عمر.......(حس خليفة بنغزة)....تعرف يا خليفة ....محمد امانة في رقبتي لانه ولدي..هاي امانة من رب العالمين لكل ابو......عياله امانة في رقبته.......و انت و محمد و مريم و عايشة امانة في رقبتي......و الحمدلله حصلت من يعاوني على حمل هالامانة......خليفة....ما وصيك على اخوك....
خليفة: ان شا لله........فالك طيب...
بو خليفة: فالك ما يخيب.....يالله نسير نتعشى.....
محمد: ابوي ابا اراويك شي......
بو خليفة يطالع ولده......
وظهر محمد صورة امه....و من طاحت عيون بو خليفة عالصورة تم يطالع فيها و حس ان دموعه بتخونه فصد صوب الباب..
بو خليفة: الله يرحمج يا امنة....اكيد زرتوا خالتكم مريم في دبي؟
خليفة: هيييه....
بو خليفة: وشخبارها و شخبار عيالها....ان شا الله طيبين...
محمد: الحمدلله بخير و نعمة...
بو خليفة: يالله نسير نتعشى...بموت من اليوع....
و عالعشا...
ام خليفة: خليفة يا وليدي....تبا خبز؟
خليفة: هييه اماية...
ام خليفة: و انتوا يا بناتي؟؟؟
مريم: لا ما نبا....
بو خليفة: يا ولدي يا محمد....تعال ايلس يمبي .....شو دبي وياك اليوم؟
محمد: كشخة.......اشتريت قاعدة للكاميرا....و شوية سامان حق عمري......
بو خليفة: ما شا لله وياك كاميرا.......عاد بقفل النخل......24 ساعة بتكون فيها يالس تصور....
خليفة: ههههههههه.....ابوي هذا محمد...بيدشها بيدشها...لو فريت النخل في المريخ....
بو خليفة: هههههههههه.....تراه على ابوه.......حياته نخل....هب مثلك يا خليفة......كله حواطة بالمولات..
خليفة: ابوي .....انا المولات ما اسيرها الا مرة في الاسبوع و ان كثرت مرتين......و باقي الاسبوع في الامريكية ندرس..
بو خليفة: الا اتخبرك شو الدراسة وياك؟؟
خليفة: الحمدلله ماشية اوكي...
بو خليفة: و انت يا محمد....
محمد: ان شا الله بكون الاول....
ام خليفة: افلح في الامتحانات بعدين احلم بالعاشر.
بو خليفة: (و هو معصب) يوم الرياييل يرمسون............الحريم ينطمن..
ام خليفة: و شعنه ما سالت بناتي عن دراستهن؟؟؟ فايج بس لعيالك...و بناتك؟
بو خليفة: هه......من يخلصون البنات كل وحدة على بيت ريلها........
عايشة: ابوي....ابا كمل الجامعة.......
بو خليفة: ماشي جامعة.......تخلصون الثانوية و العرس بعدها باسبوع....نسيتي ان ولد عمج خالد خاطبنج..
ام خليفة: و شعنه مستعيل عالعرس...؟
بو خليفة: الريال رمسني اليوم يبا يعرس......و عطيته كلمة انه من تخلص ثانوية عامة بتعرس..
عايشة: ما ابا....
بو خليفة: بتعرسين يعني بتعرسين.....و لا والله ما اخليج تطبين المدرسة و ملجتج باجر....
ام خليفة: و هذا تقوله اذا ياب نسبة زينة بتييب له اللي يباه...و بنتي بتعرسها؟
بو خليفة(واصلة عنده): انتي ما تستحين....ليش تتنصخين الرمسة.........انتي شو؟؟؟؟شو من البشر انتي؟؟؟
خليفة: ابوي هدي اعصابك......عندك ضغط الدم.....
بو خليفة: اسمعي يا فاطمة....قلبي غاضب عليج ليوم القيامة.....
قام بو خليفة سار غرفته و هو معصب...
ام خليفة: شفت...انت السبب يا محمد
خليفة: اماية........شو يخص محمد بالسالفة؟؟؟؟......انتي نرفزيته........
ام خليفة قامت و راحت حجرتها.....
محمد ياي بيقوم و هو يطالع خواته......عايشة تنظاره بنظرة تعاطف...لكن مريم تطالعه بنظرة حقد.....
" يا ويلييي......عبدالله....بلاك؟؟"
خليفة و محمد طاروا من مكانهم..و ركضوا غرفة بو خليفة......كان بو خليفة طايح عالارض و ام خليفة تصيح فوقه..
خليفة يحس نبض ابوه.....و محمد يطالعه...
خليفة: قم شغل السيارة.....بنوديه الدختر....شكله ما يسر
طار محمد السيارة و شغلها و شاف خليفة شال ابوه و يركبه السيارة....
خليفة: قم انا بسوق....
وخليفة اللي ما يحس بالدنيا ابد و كل هدفه انه يوصل المستشفى بسرعة....
وطار بين السما و الارض لين وصل مستشفى صقر و دخلوا بو خليفة الطواري.....
وبعدها ب خمس دقايق.....طلع لهم الدكتور....
خليفة: بشر يا دكتور.....
الدكتور: عظم الله اجركم........الوالد عطاك عمره.....
تصنم محمد و خليفة من سمعوا هالعبارة......بدت دموع خليفة تنزل....لكن محمد..
محمد: لااااااااا......
و ضرب اليدار بكس بايده اليسار.......خليفة يمسك كتف اخوه
خليفة و يحصن اخوه: محمد.....خلاص ابوي رااح.......الله يرحمك يا ابوي......وصانا و راح......
محمد فج اخوه: خليفة....ابوي رااح....راااح.....
وطاح على اقرب كرسي و يلس يصيح بصمت و بدون صوت....بس دموعه تنزل......
الدكتور: لو سمحت ممكن كلمة...
خليفة: تفضل....
الدكتور: اصل الواد اخوك لازم يفحص دراعه....بص لونها الزاي.....يمكن فيها كسر......
خليفة: اوكي.......محمد......سير ويا الدكتور بيفحص لك ايدك.....
محمد يطالع ايده بحزن ....: ان شا الله...
خليفة واتصل بهزاع و خالد و خبرهم بالخبر و انصدموا بو هزاع و بو خالد.... و ساروا المستشفى و كملوا باقي الاوراق..
ومرت الليلة حزيينة و كئيبة على بيت بو خليفة بعد ما مات......و تم الدفن الفير......
في المقبرة..
هزاع: احسن الله عزاكم يا خليفة و محمد..
محمد: البقاء لله..........
بو هزاع: الله يرحمك يا اخوي......و يغمد روحك الجنة ان شا الله....
خليفة: امين .....
وكان سبب الوفاة انفجار شرايين في المخ و سبب نزيف داخلي قاتل.......
ومرت ايام العزا ثجييلة على عيال بو خليفة...و الناس من كل صوب يت تعزي..
مريم و عايشة ما وقفوا صياح ليلتين. و ام خليفة اللي ما ظهرت من غرفتها و يالسة تصيح.. ومحمد اللي وصية ابوه ترن في اذنه كل ما غاب ابوه عن باله.." ما اوصيك على دينك و نفسك..ام خليفة وطنشها.....بس لا تتركها بحالها......ترا خليفة بيسافر و بتكون انت سندهم..."
محمد: هيييه يا ابوي.......وصيتني باهلي و ان شا الله ما بخيب ظنك....
خليفة و هزاع و خالد و محمد و ربع خليفة يالسين في الميلس بعد ما روحت العرب.....
خليفة: يزاكم الله خير والله تعبانكم ويانا........
جابر: افا.....تعبكم راحة يا بو عبدالله..........و هذا الواجب
راشد: اي والله....صح لسانك يا جابر....و بعدين يا خليفة....ترا اللي بينا عيش و ملح..وهذا واجبنا كلنا...
خالد: بيض الله ويهوكم....ما قصرتوا......
جابر: يالله يا جماعة برخصتكم...
خليفة: مرخوص مررة....و اسمحلي ما اقدر ايي العرس....
جابر: معذور يا خليفة......و ان شا الله مرة ثانية...شي بالخاطر؟
خليفة: سلامتكم و شوفتكم.....
جابر: فداعت الله.......
ــــــــــــــــــــــــــــــــــــــــ
بعد سنة.......
"تعلن الخطوط الجوية البريطانية عن وصول رحلتها رقم *** من لندن هيثرو الى دبي" و تكرر النداء اكثر من مرة..
محمد: مرحب ملايييييييين و لا يسدن......نورت البلاد...
خليفة: منورة باهلها......
ويتخاشموا هو اخوه.....
محمد: مرحب الساع....رويشد و هوزيع اهنيه.....
هزاع: اصغر عيالك رويشد و هويزع...اشحالك؟
محمد: بخير ما نشكي باس......اعلومكم انتوا؟؟
راشد: ماشي....بس رقاد و ناطرين متى الرحلة....
محمد: منو ماشي؟؟؟؟...و شعنه ما توصلوه؟؟؟
راشد: ترا السيارة خربانة....فخليناه يمشي...ترا لازم يسوي رياضة.....
محمد: لا والله..و كم كيلو مشى؟؟
راشد: 2 كيلو قعدة و 2 رقاد و 4 سوالف...
خليفة: حوووووو شو يالسين تخربطون؟؟؟؟ يالله كل واحد يعرف وين دربه...
راشد: ادري انك بتتوله علي و بتييني ركض تقول فدييتك رشود والله متوله عليك....
خليفة: ههههههههههههه.....كفاية قعدة 8 شهور مجابل نيادي......
راشد: وصل جابر.....مرحب الساع جابر...
جابر:....هلا والله....نورت البلاد؟؟؟ حي الله العنقليز...
خليفة: منورة باهلها...........حنا عيال العرب...هب عنقليز يا الدب.....
جابر يوايهم......و يشل جنطة راشد.....
جابر: اسمع خلوف......الاسبوع هذا لازم تيي.......باجر ان شا الله عرس اخوي مبارك و ان شا الله تكونون موجودين....و اسمحولي تراني مستعيل....
هزاع: بالحل....و ان شا الله انكون على الموعد و كيب ان تتش....Keep in touch
محمد: خليفة...شو يخربط ولد عمنا هذا؟؟؟
خليفة: يعني خلنا على اتصال.........
محمد: اها.......يالله.....تندله درب راس الخيمة؟؟؟ قم فطست بالحر..
و في السيارة....
خليفة: ما شا الله..........رينج هه.........يعطيك خيرها و يكفيك شرها....
محمد: اميين.......
هزاع: منو خذلك اياه؟
محمد: خالتي مريم.....حلفت ان يبت فوق 95 بتاخذ لي رينج.......
خليفة: بيضتها و يبتها الحمدلله........
محمد: هيييه يا خليفة....انا من يوم وفاة المرحوم ابوي للحين.....وصيته ترن في اذني اجراس......كلما ارقد...اتذكر صورة امي و صوت ابوي..
ويترحمون عليه......
وتموا سوالف و اعلوم لين وصلوا راس الخيمة.....
ووصلوا هزاع و بعدها ساروا البيت...
خليفة: محمد.....انت مضيع؟؟؟....بيتنا الصوب الثاني.....
محمد: ترا فغيابك....استوت اشياء وااايد......و ما خبرتك عنها.....
حليفة: شووو؟؟؟ شو صار؟؟؟ حد صار فيه شي؟؟؟
محمد: لا الحمدلله الكل بخير و عافية........بخبرك بعد ما تسلم على الاهل......و تستريح من السفر...و لا اقول...باجر يوم بنسير عرس مبارك الخييلي بخبرك شو صار بالضبط...
خليفة: خلاص عيل......محمد......هذا مب جنه بيت ابوي اللي كان مسكن فيه امك؟
محمد: هييه....ترانا الحين نسكن اهنيه....انا و امي و مريم .....و عايشة و عرست...و انت تدري بهالشي..
خليفة: هييه ادري.....و رخصتهم يعرسون و ما ينطروني لاني احتمال اتاخر...اصبر....منو قصدك بامي؟؟؟؟ ليكون امي انا؟؟؟
محمد: (و هو يبتسم) هييييه هاي اماية اللي ما اقدر استغني عنها...
خليفة: محمد....ليكون سويت سحر؟؟؟؟
محمد: اعوذ بالله...(و يضحك)...لا سحر و لا هم يحزنون........بتييك السالفة..
ونزل خليفة من السيارة ويطالع البيت كيف متغير بعد كان مظلم و محد يمشي جريبه....الحين منور و النخل في كل مكان و ديزاين حلو......و اول ما دش شاف البيت اللي من داخل يهبل...فخامة و اثاث يخبل......
خليفة : محمد....وين غرفة اماية؟؟؟
محمد: على ايديك اليمين......بس وصلت...
خليفة يبا يفتح الباب و ايده ترتجف....و قبل لا يمسك مقبض الباب انفتح.....و كانت ام خليفة.....
خليفة تجمد فمكانه.......و امه تطالع في ويه ضناها خليفة اللي اشتاقت له و ليالي يلست تبكي و تصيح عشانه..واقف جدامها.....و كانت خصلة من شعر خليفة طايحة فوق عينه......مدت ام خليفة ايدها تعدل له شعره و تردها ورا اذنه.....و حضنته بقو و يلست تصيح و خليفة هب رايم يمسك عمره و دموعه......
خليفة: اشحالج اماية...ربج الا بخير.؟؟
ام خليفة: بخير و سهالة دام عيني تشوفك...اشحالك انت؟؟
خليفة: دام اني فدار زايد...فبخير و سهالة........استريحي.....
و دش محمد شال جنط خليفة.....
ام خليفة: هلا والله بولدي محمد....تعال ايلس يمبي....
محمد: ان شا الله اماية..بس افر جنط هالتنكر و ببيج فورا......
ام خليفة: بارك الله فيك..ها خليفة...ان شا الله ارتحت في الرحلة؟؟؟؟
خليفة مستغرب من كلام امه.....شو السالفة يا جماعة.....والله بستخف....
خليفة: هه.......ااااا..رقدت من طارت الطيارة لين وصلت....اشحالج انتي اماية؟؟؟ ان شا الله مرتاحة...
ام خليفة: دام محمد سندي وعوني..وخليفة ولدي وصل بالسلامة.....انا بخير و سهالة......تبا تتريق؟؟
خليفة: اوف......ابا خبز سفاع و عسل...و جبن...و مممم و بلا لييط و بيض و لقيمات...و لا تنسين قهوة..
ام خليفة: شكلك يووعان ...شو تاكل اهناك غير السقم......تعال شوف طبخ امك كم يسوى...
خليفة: يسوى الدنيا و ما فيها...بسير اسبح و اشل هالخرابيط اللي لابسنها.....
و سار يدور على غرفته......
خليفة: حمود ويا هالراس.....وين غرفتي؟؟؟؟
مريم: خليفة؟؟؟؟ لا ما اصدق عيوني...خلوف اهنيه؟؟؟؟
خليفة: عيونج جذابة....صدقي ربيعتج فطوم ...
مريم: اشحالك اخوي.....مبيض و محلو...شو السالفة؟
خليفة: تراني اغسل ويهي بكلوروكس كل يوم....
مريم: صدج والله؟؟؟؟!!!!
محمد: لاتصدقينه......عاد خلوف.... بنشوف دبات كلوروكس في غرقة مريم.....اونها تبا تبيض....
خليفة: تسويها....المهم وين غرفتي؟؟
محمد: اخر الممر..على يسارك.....تسبح بسرعة....ريحتك فايحة...جلدي.....تقول اشرف هندي المطعم.....
خليفة: كوميندساي....(اسف بالياباني(
محمد: ناندا هي ما روا..؟؟(شو اللي يصير بالياباني(
خليفة: بروح اسبح .....برب..
محمد: تيت...
مريم: حوووو شو يالسين ترمسون؟؟؟؟؟؟
محمد: شييفرة.......
مريم: شكلكم سبيتوني....بخير عليكم اماية....
محمد: خبريها.......تشوفيها بالمطبخ تسوي اكل حق هالتنكر.....
خليفة و هو ساير الحمام......: و لا انت الحين تقول شاحنة سكس وييل.
محمد: شوف راسك تقول نيسان منجلب....
خليفة: و لا خشمك تقول مدعمية كروزر....
محمد: من شابه اخاه فما ظلم....
خليفة: بعدين برد...بسير اسبح....
ويلسوا مريم و محمد في الصالة و احتشروا...دشت عليهم ام خليفة..
ام خليفة: بلاكم حاشرين الدنيا.....من صباح الله خير......قومي غسلي ثياب محمد..تشوفيه ما عنده ثياب ..
محمد: اماية...ترا ثيابي في الدوبي......و بسير ايبها عقب ساعة..
ام خليفة: و شعنة توديها للدوبي......عندك اختك خلها تتعلم شغل البيت.....الله يعينك يا هزاع..
مريم: يوم بسير بيت ريلي.....بتعلم شغل البيت..
خليفة: بلا كلام زيادة....سوي لي قهوة....
مريم: بسم الله....انت من وين طلعت؟؟
محمد: توني مظهرنه من تحت الكنبة...شو رايج؟
مريم: بشو؟؟....
خليفة: فحلجج اللي شرات حلج البعير....
مريم: انت تتمنى شرات حلجي......فدييت ثمي صغير و حلو.....
خليفة: هب لسان عليج.......محمد....اني لارى بعض القمل المخطط في شعر هذه الشمطاء..
محمد: و ما نفعل بها يا ابا الحارث؟؟
خليفة: اني لارى شر الشياطين و لعنات الللات و العزى يظهر من هذه القميلات اللعينة....اقطع راس هذه الجارية فورا..
مريم: شوو قمل؟؟؟ وين؟؟؟
خليفة: ما تشوفيه تحتج....صدج انج مقصة......و لا اقول....ابرة خياطة احسن....
مريم: مالت عليك......تبا تقطع راسي.......بيلس فوق قلبك....و تطلع لسانها....
خليفة: شو قالوا لج...قلبي كرسي يقعد فيه الساير و الياي؟؟؟
ام خليفة دشت وياها الريوق....: كلوا بالعافية.....و بسكم من الحشرة...
خليفة: الله يعافيج اماية......يا ربي...هذا الاكل و لا بلاش.........وخر يا حمود الدب....هذا الاكل لي انا وبس..
محمد: علة فوق قلبك..........كله من اماية....حد قالها تسوي ريوق و لا اروع؟؟
ام خليفة: انا مسوية لنا كلنا......يالله مريم اقربي و كلي شوي....مستوية قب
محمد: خليفة....هالبيض حقي...خلك باللقيمات بس....
خليفة: حلم ابليس بالجنة.......بيع خبز احسن...
محمد: اماية...شوفي خليفة يرفسني....
خليفة: انا رفستك؟؟؟؟ بس قرصتك انا...
ام خليفة: انا جني قلت كلوا و بسكم من الحشرة....
مريم: اماية...هذيلا من يجتمعوا ما يسكتون....خليهم....ما ينفع وياهم الكلام......
خليفة: لا حووول....شل ايدك قبل لا اقصها لك.....
محمد: والله زين تفكني منها......شو رايك؟؟؟
خليفة: ما طلبت شي ابد......فالك الطيب..........وين الساطور؟؟
ام خليفة: الله يهديكم يا عيالي......شو بلاكم؟؟؟
محمد: اماية...شوفيه يبا يقص ايدي.............و
