ام منصور : وانته تقّر في البيت عسب اتشوفها ؟!
منصور : انزين خلاص يا اميه .. دومج تقطعيني فالرمسه.. الحين بسير صوبها ..
ام منصور : بتحصلها في حجرة شميم..
سار حمد صوب حجرة اخته شمه وكانت شمة ترتب كبتها وعنود كانت طايحه على الأرض وهيه تلّون ..
(( شمه أصغر عن منصور بسنه يعني اول ثنوي .. حبووبه وراعية سوالف بعد .. وعنوووود آخر العنقود وعمرها خمس سنين .. وايد متعلقه بمنصور لأنه دووووم يلعب وياها)) ..
أول ما شافته عنود قامت وربعت صوبه ولوت عليه .. ويلس منصووور يلعب وياها وتمت شمه تظحك عليهم ..
وشوي ان امهم داشة عليهم واول ما شافت منصور عصبت ..
ام منصور : ويدي.. منيصير شقايل المسيد صلى وانته بعدك هنيه؟؟
شاف منصور ساعته وانصدم ان الوقت خطف ومن دون ما يحس.. وانه وقت الصلاة صدق فاته ..
منصور : اوووه صدقج والله .. التهيت بعنوده ولا شفت ساعتيه
ام منصور : يالله قم صل فحجرتك وعقب تعال برع لانهم عقب شوي بيووون
منصور : اوكيييييييييييه
سار حمد حجرته عسب يصلي وقال حق شمه انه تييب عنود الحجرة عقب ما تخلص الصلاة ...
وعقب ما صلّت شمه ودّت عنود صوب منصور اللي كان توه مخلص صلاة ..
وردت شمه ويلست فيا امها في الحوي .. وشوي أن سيارتين داخلات البيت .. نزل حمد من سيارته ونزل مانع من سيارته ويا غيث .. وساروا صوبهم أول ما شافتهم ام منصور نشّت وشمه تحجبت ونشت وياها .. سلموا غيث وحمد عليهن كلهن ووايهوهن .. واما مانع سلم على ام منصور اللي يحبسها شرات خالته .. وشاف شمه عدالها ..
مانع : شحالج شمه ؟؟
شمه : يسرك الحال والله ..
ويلسوا كلهم يسولفون .. طلع منصوور من الفلة وشال عنوووووده على جتوفه .. وأول ما وصل عندهم نزّلها و سلم عليهم ويلس وياهم ..
منصور : شحالكم شباااب ؟؟
حمد : تمااام
مانع : وينك يا القاطع .. امرررررره مالك شووووف؟؟!!
منصور : والله موجوووووووووود ..
غيث : ما بتي ويانا؟؟
منصور : وين بعد ؟؟
غيث : بيتنا.. يعني وين بعد ؟؟
منصور : لا ما فيّه منو بييلس هنيه
غيث : عرااااااااحتك والله .. امبونا نبغيك ترّفه عن نفسك شوي .. وتسير فيانا العزبة ونلعب بذييييج البانشي .. بس بما انك ما تبغي ... كييييييييفك
أول ما سمع منصور طاري دراااااجات ارتبش
منصور : ومنو هاذا الخرّيييييييييط اللي قالك ما أبغي ..
حمد : أنته قلت بعد منووووووو غيرك؟؟
منصور : انا ما قلت ولا الله قاله.. أنا قلت حاظر وبالشوووووووووووووفه
وكلهم ظحكوا على منصوووور ..
منصور : متى بتسيرون؟؟
مانع : بااااجر العصر ..
غيث : اميه شو رايج باجر تووون بيتنا وتاخذون لكم كم يوم عندنا ؟؟
ام منصور : ما أدري والله ..
شمة : دخيلج اميه خلينا نسير .. تولهت عليهم هناك .. ومنّااااك نغير جو..
ام منصور : يصير خير ..
حمد : حد بييبكم ولا تبوني اييكم ؟؟
منصور : افاا والله افاا .. وأنا هب تارس عينك ..
حمد عقّد حياته) منصور ما شيء سواقه إلاّ يوم بتاخذ الليسن ..
منصور : اللي يسمعكم الحين يقووول بظرب بها خط لين دبي الا تراني في العين..
مانع : ولو .. وكااااااد يزخونك الشرطه .. بعدين شو بيفجّك منهم ؟؟
منصور : شو عليه .. انا بصبر الحين .. بس خل هالسنة تخطف ..
غيث : ما عليه خير لين ذاك اليوم ..
ام منصور : قومي بنتي قولي حق البشكارة تحط العشا
شمة : ان شاء الله
وعقب ما تعشوا الشباب رد كل واحد منهم داااااااااره .. وبالباجر الساعه تسع الصبح ظهروا قوم منصور ويا الدريول وويّهوا صوب قوم حمد بن سهيل .. وأول ما وصلوا حصلوا ام حمد وحمد غيث وعلاااااوي يتريونهم في الحوي ..ويوم نزلوا من السيارة ساروا صوبهم وسلموا عليهم وساروا الصاله اللي داخل الفله ويلسوا هناك ..
وكان منصور يالس عدال غيث ..
منصور : اقول غيث .. عيل وين حصيص؟!
غيث : داخل حجرتها
منصور : اوكييييه .. وسار صوب اخته شمة وقبظ ايدها وسحبها ويااااااااااه ..
ويوم وصلوا آخر الدري انتبه ان باب حجرة حصه مفتوووح .. صد منصور صوب شمه وحط صبعه جدام ثمه ويقصد بها (( لا تصدرين أي صووووت )) هزّت شمه راسها على انها فهمت اللي كان يقصده .. وشوي شوي يدخلون الحجره .. وقفت شمه عند الباب وكمل منصور طريجه صوب حصه اللي كانت عاطيه ظهرها للباب ومجابلة كبتها .. أول ما وصل منصور عندها حط ايده على عيوووونها ...
حصه : والله انك متفيج يا حمد .. خلني أخص شغلتيه قبل ما ايّووون ..
يوّد منصور ظحكته .. وقالها وهوه يقلد صوت عيوووووووز..
منصور : حاااااااولي مرة ثانيه ..
حصه : (مستااانسه) منصوووووووووووووووور
منصور : غلط .. عمج وشيخج وتاج راسج منصور ( وخوّز ايده عن عيونها )
سلمت حصه عليه وعلى اختها شمه ..
حصه : متى ييتوا ؟
شمه : الا من شوي ..
عطت حصه منصور بكس خفيف على خده ..
حصه : والله اشتقت للظرابه وياااااااك
منصور :ههههههه لاحقة انزين .. بطلع لج قرووووون .. بس هب اليوم .. اليوم كله بيزي ..
حصه : اوووه اوووه .. اونه الحين بزنس ماااااااان
منصور : لا بااااااات مان
ظحكن حصه شمة عليه ..
منصور : شو يالسه اتسوين ؟؟
حصه : ادورلي كندوره ..
دز منصور حصه عن الكبت ووقف جدامه وهو يناظر كندوره كندوووره .. وأول ما طاحت عينه على كندورة ومب أي كندوره .. كندووووووره عيناوية وبالقووو ..
منصور : هااااااااي المطلوبه
حصه : أي وحده ؟
طلع منصور الكندوره وحطها على السرير ..
أول ما شافنه حصه وشمه ظحكن..
حصه : هههههههه .. ده بعدك!! عناد فيك ما بلبسها ..
منصور : ( يطالع حصه بنظره بريئه مستصنعه ) افااا ذوقي مب حلو ؟؟
حصه : العب على غيري .. ما يخصها بالذوووووق .. انته تباني ألبسها لانها عيناويه .. بس عنااداا فيك بلبس هاذيج الصفرة .. فنانه
منصور : عيل ورفجه بو خليفه تلبسينها ..
شمه : حصوه لبسيها .. ومهما سويتي بتلبسينها غصبا عنج دام ان هذا عندج ؟؟
حصه : شوف انا بلبسها عسبة انك بس رفجت ولاّ أنها حرام ما طاحت ينبي ..
منصور : ( رافع حاجب ومنزل حاجب ويبتسم ) جذه ابااااااج
حصه : على امرك الشيخ .. والحين ممكن اطلب منك طلب؟؟
منصور : احم احم .. ليش لا ؟؟
حصه : ممكن تجلب ويهك وتطلع برع ..
منصور : افاااااااااااااا ليش ؟؟
حصه : بتلبس .. عندك مانع ؟؟
منصور : لا والله عندي حمد
حصه : ( عقب ما طفرها منصور قررت تجذب عليه ) أقول منصور على طاري حمد .. سير حجرته بتحصل في السدة اللي عداله شريط ميحد حمد اليديد ..
منصور : ههههه .. جديمه غناتي ..من أول ما نزل وهوه عندي .. خيرها فغيرها
حصه : ( طفرت من الخاطر ) منصوووووووووووووور
وطبعا بعناد منصور وغلاسته اللي ما ييوز عنها قرر يطفرها أكثر لانه يداني حصه يوم تتضيج منه ..
منصور : ( عقب ما يلس على السرير وحط ريل على ريل وشبك ايده وحطهن على ركبته ) هب ظاهر لين ما ترمسيني باحترام ..مثل ويقلد صوت حصه (( أقول الشيخ منصور بن سهيل .. غناتي .. فديتك ممكن تترخص عنا وتسير وين ما تبا لاني ابغي اتلبس.. وهاذا بعد موافقتك طبعا !!))
حصه : سير لا .. هاللي ناقص .. أتفداااااااك والله حاله ..
نش منصور من مكانه ووقف ..
منصور : شوفي .. انا الحين بطنّش وبسوي عمري ما سمعت شيء من رمسج .. وبطلع بكرامتي لان اللي تحت من ييت وهم يتمنون أيلس وياهم ..
وتمن البنات يظحكن على منصور وهوه طالع وبهيبة في مشتيه .. وسار ويلس في الصاله وياهم .. ويوم دخل الصاله حصل مانع موجود .. سلم منصور عليه ويلس في الكرسي اللي مجابلنه ..
وعقب ما تلبست حصه نزلت ويا شمه تحت ويوم وصلوا نص الدري سمعوا صوت مانع .. تحجبن وكملن طريجهن صوب الصاله .. ويوم دخلن سلمت حصه على امها وامها ام منصور..
(( حصة ما تتغشى من مانع لانه يوميا وياهم وتحسبه شرات أخوها وهو بعد يحس بأنهم أهله لأن الله ما عطاه خوان ولا خوات .. فلهاذا هوه متعلق فيهم وايد وايد ))
ويوم انتبه مانع لهن لانه كان يرمس ويا حمد ..
مانع : شحالكن بناااااات ..
شمه وحصه : بخير الحمدلله
وسارن ويلسن عدال منصور وتمّن يدّقن سوالف وياه ..
خطف الوقت وعقب العشا وطبعا عقب ما ردوا الشبيبه كلهم من العزبه وعقب ما لعبوا بالدراجات .. رد مانع بيته .. وكل واحد منهم سار الحجرة اللي بيرقد فيها .. وكان التوزيع كالتالي .. شمه عند حصه .. منصور عند غيث .. ام منصور وعنود في حجرة الضيوف وام حمد وعلاوي في حجرتهم وحمد بروحه في حجرته ..
ونرد لأجواء دبي وبالتحديد في حجرة رفيعه .. كانت رفيعه طايحه على السرير وهيه تقرا مجلة طالبتنها من اليازيه .. وفجأة تسمع حد يدق على الباب ..
رفيعه : ادخل
كان حد يحاول يفتح الباب بس ما قدر ..
رفيعه :أكيد هاذي رواضي..
وقامت رفيعه وفتحت لها الباب .. أول ما شافتها رفيعه حسّت أن شعر ينبها وقف .. وأن قلبها بيطلع من محله .. لأنها شافت روضه لاويةعلى الدبدوب البني اللي اشتراه حمد لروضه يوم كانوا في الستي .. شلت رفيعه روضه ويلستها وياها على السرير ويلست تلعب وياها ..وبعدين يت خدامة روضه تبغي روضه عسب ترّقدها .. وعقب ما طلعت الخدامة ووياها روضه انتبهت رفيعه للدبدوب اللي نسته روضه فوق السرير.. ما قدرت رفيعه تقاوم الدبدوب لانه شكله يجذب من الخاطر.. شلته رفيعه ولوت عليه وبندت عينها .. معقووووولة أنا أحب حمد ؟؟ لا لا !! ليش أنا أفكر بهالطريقه ..معقوووووله كلام ميره يكون صح ؟؟ مستحيييل طبعا .. فقدت سيطرتها على نفسها وتذكرت شكله وهوه يالس في السياره وعاق السفره على السيت اللي يالس عليه .. وتذكرت شكله وهو ايّول .. آآآآآآآآآآآآآآآآآآآآآآآآآ آآه يا كثر ما انذبح قلبي .. انتبهت حصلة لتفكيرها .. يالله هل انا أحب حمد ولا لا ؟؟ وهالشعور اللي أحسبه جداه .. هل هوه اللي يسموونه الحب ولا لا ؟؟ اووووووه انا شو يخصني بهالسوالف ؟؟ وحطت الدبدوب عدالها وطاحت وانسدحت على السرير ومن غير ما تحس استسلمت للرقااااااااد ..
وفي هالوقت وفي بيت ثاني بن محمد .. وعلى الساعه اثنعشر فليل ..مهره طايحه على السرير في حجرتها وكانت توها بترقد لولا ان اختها الحشره ميرووه يايتنها مفرفشه ..
ميره : اوووووه الديايه .. بترقدين ؟؟
مهره : انتي شو رايج ؟؟
ميره : رايي انج ما بترقدين لانج ما تبين تفوتين الفلم
مهره : أي فلم؟؟
ميره : فلم هندي .. رهييييييب .. أبطاله روعه
مهره : الله يهديج .. مهما استوا معروفه النهايه البطل بياخذ البطله طبعا ما بيقضي البطل على أعوان الشر .. ولو حتى ماااات بتستوي معجزه وبيقوم بعد واقف .. سيري لا .. انا برقد هب متفيجه لخريطهم
ميره : هههه .. وشو الحل يعني .. أسهر بروحي ؟؟ طبع لا ..
مهره : سو بيستويبج يعني ..
ميره : بليز مهروه ما ابغي أسهر روحي
مهره : وانتي شو كاظنج تسهرين .. سيري وطي راسج ابرك لج .
ميره : ما ياني الرقااااااااد
مهره : عاد انا ياني .. شو تبيني اسوي يعني .. أقوله يالله اجلب ويهك ورد من وين ماييت ..
ميره : هههههههههه .. حلووووووووووووووه
مهره : يالله يالله .. جلبي ويهج
ميره : ( بنبرة بريئه ) بليز
مهره : افف .. بس على شرط
ميره : شوووو
مهره : امممم .. اذا شيء بيبسي وحب حق السهره بسير .. واذا ما شيء (( بإبتسامه مكر )) وكان الله غفورااااااا رحيماااااا
ميره : ههههه .. ما عندج عذر كله مجهزتنه ..هههههه وفوق هذا بعد كرتون كلينكس
مهره :هههههههه .. عنبوووووووو زاد .. ما يفوتج شيء صدق انج خراب دار..
ميره :هههههههه توج تدرين .. يالله فزي.. الحين بيبدأ الفلم
مهره : اوكيه ..
خطفن الأيام وياي يوم الأربعا.. وفي بيت حمد بن سهيل وعلى الساعه ثمان الصبح ..
حمد وشمه وحصه وام منصور وام حمد وعنود وعلاوي يالسين يتريقون في الصاله..
ام منصور : عيل وين منصوور وغيث ؟؟
حصه : البارحه رادين متأخرين ولين الحين راقديين..
ام حمد : الله يهديهم ..
حمد : أقول اميه .. تراني أنا ومانع بنسير دبي ويمكن نبات هناك ..
ام حمد : ان شاء الله غناتي .. برمس خالتك عليا وبقولها تزّهب لكم حجرة الضيووف ..
حمد : تسلمين أم حمد..
حصه : أقوووووول بو شهاب .. شو رايك تودينا أنا وشميم وياك نتحوّط ؟؟
حمد : وين تبن تسيرن ؟؟ أنا بسير فيا مانع وهناك بنتلاقا فيا شباب.. شو سايرات تدورن ؟؟
ام حمد : صدقه اخووووكن .. وين تبن؟؟ صكن التراااااااب ..
برطمن حصه وشمه ..
حمد : بس عااااااااد عن مد البوز .. بدور لي يوم بفضى فيه وبحوطكن في العين ..
حصه وشمه : والله
حمد : ههههه من متى أوعد ولا أوفي ..
حصه : وأنا أشهد ..
شمه : انزين عاااد متى ؟؟
حمد : يا بنات الحلال .. قلتلكن يوم بفضى .. لا تخّلني أكنسل ..
حصه : خلاص خلاص .. كله ولا انك تكنسل .. خلاص سكتنا ..
وكان حمد يالس بينهن .. سارت حصه وباست حمد على خده اللي من صوبها وشمه من الخد اللي صوبهاااااااا ..
حمد :ههههههههههه .. الحااااااااااايه بنت حرااااااااااااااااااام
ويلسن البناااااااات مستانسات .. خلاااااص ضمنن السيره ..
وعقب ما خلص حمد من الريوق سار ويا مانع عقب ما خطف عليه وشله وياه صوب دبي عسب يغيرون مكينة سيارة حمد .. يوم وصلوا دبي كانت الساعه 11 وربع الضحى ..
فساروا سيده صوب بيت خالتهم عسب يريحون شوي وعقب الغدا يسيرون يخلصووون شغلهم اللي يايين عشانه .. وأول ما وصلوا البيت دخلوا السيارة في الكرااااج وكانت سيارة راشد عدالهم .. ودخلوا وساروا صوب الميلس ويلسوا هناك .. وكل ما يدقون على راشد يحصلون تلفونه مشغول .. وعقب ربع ساعه طلع راشد من الفلة وحاط سفرته على جتفه ويفصص في تلفونه وما انتبه للنعول اللي جدام الميلس.. ويوم ظهر من البيت انتبه لسيارة حمد .. سار صوبها وشاف رقمها وتأكد انها هيه.. ويوم رد البيت سار صوب الميلس بعد ما انتبه لنعولهم ...
راشد : هلا والله .. أقول ليش دبي مظلمة أووه قصدي منوره ..
مانع : يا الخااااااااااااااااااام
وسلم عليهم ويلس عدالهم ..
حمد : علومك بو سنيده ؟؟
راشد : علوم الخير والله ..
مانع : يا الهرم من ربع ساعه نسويلك تلفون وكله مشغوول .. منو ترمس هالكثر ؟؟
راشد : كنت أرمس ربيعي علووه متصل من مصر..
حمد : وشو يسوي في مصر ؟؟
راشد : ابوه بيسووله عملية في عيونه ...
حمد : الله يردهم بالسلامة
مانع : آمين .. عيل وين خالتيه؟؟
راشد : شوف الساعه كم
شاف مانع ساعته ..
مانع : الساعه 12 الا ربع
راشد : والحين وقت الشو
حمد : وياااااا راسك قول في المطبخ وفكنا ..
راشد : هههه لازم بعد نطفر بكم شوي
وعقب ربع ساعه من السوالف صاح تلفون راشد وكانت امه مسويه تلفون ..
راشد : هلا والله بالغاليه
أم راشد : بالمهلي فديتك.. وين دارك الحين ؟
راشد : يالس ويا أهل العين ..
أم راشد : (معصبه) رويشد ..خل عنك الجذب ... اتحرااااه بيفيدك يا مسود الويه ..
راشد : افا وانا بو سنيده .. تجذبيني ؟!! ما هقيتها منج ام راشد .. بس ما عليه هاذوووه الدليل .. وعطا تلفونه لمانع لانه كان أقربله من حمد..
مانع : مرحبااااااااا ملايين ولا يسدن بشيخه دبي وضواحيها ..
وهنيه ام راشد استقطعت .. طلعت رمسة ولدها صدق ...
ام راشد : هلا ولديه مانع .. شحالك؟؟
مانع : يسرج الحال فديتج..
ويسحب راشد التلفون من مانع..
راشد : هاذا اللي ناقص .. تتغزل في اميه .. وحط التلفون على اذنه ..
راشد : ها شو الحين ؟؟!! صدقتيني
ام راشد : ما عليه يا الهرم .. خل ابوك ويدك ايوون عسب يأدبونك .. يا مسود الويه
راشد : وانا شو سويت؟؟
ام راشد : الا من فترة كنت داخل شو خلاك توصل هناك بسرعه .. أكيد كنت مسرع ؟؟
راشد : شوي ..
ام راشد : ما عليه انزين بيوصل الخبر عند ابووووك
راشد : ههههههه
ام راشد : يالله بند يا مسود الويه
راشد : ما عليه الحين ببند .. بس وين بتروحين الحين؟؟
ام راشد : ( معصبه ) وانته شو تبابي يالهرم
راشد : بس يا اميه من متى تسبيني ما شبعتي ؟؟
ام راشد : ما بشبع الا يوم ابوك بيدور لك صرفه .. عنبو شو كاظنك على السرعه .. لا سمح الله الحين نفدت بهالموتر الله يعدمه .. شو بيفيدك بعدين ؟؟
راشد : ( حط ايده على التلفون عسب امه ما تسمعه وهو يرمس حمد ومانع ) شو بيفكني من العيوز ..
حمد : محد قالك اجذب عليها ..
مانع : فك عمرك وقولها الصدق..
راااااااشد : ههههههه عقب هالسب والتهديد آخر شيء أقولها الصدق .. نووووو وييييييي.. ورد يرمس امه
ام راشد : رويشد وين ذلفت ؟
راشد : وياااااج .. انزين اميه ما قلتيلي وين بتسيرين الحين
ام راشد : وين بسير بعد تراني الا في المطبخ
راشد : والميلس ما بتسيرن صوبه
ام راشد : لا
وهنيه حس راشد أن خطته فشلت ومافي أمل تنجح .. اممم .. لا في أمل
راشد : اووووووه أقول غناتي .. بتحصلين بوكي فوق المكتبه .. نسيته هناك ابغيج تيودينه عندج لين ما ايي..
ام راشد : ما عليه الحين بسير .. بس هب تتحسب اني بنسى السالفه !!
راشد : ههههههههه ما عليه خبري ريلج؟؟
ام راشد : عنلاتك يالله بند
راشد : هههه مع السلامه..
أول ما بند راشد عن امه صد صوب حمد وغيث ..
راشد : ههههههههههههاي .. نجحت الخطه .. الحين بتيي
حمد : بتلقاها الحين
وشوي ان ام راشد داشه الميلس وهيه محتشرة حتى انها ما انتبهت للنعول..
وأول ما دشت شافت راشد يظحك من الخاطر وحمد ومانع يظحكون بس هب شرات راشد ..
ام راشد : ( معقده حياتها وتشوف راشد )عنلاااااااااااااااااااتك يالحمار
وسارت صوب حمد ومانع وسلمت عليهم ..
ويوم يلست وياهم قبظت مخدة صغيره كانت عدالها وفلعت راشد بها
ام راشد : أشوفك مره ثانيه تجذب..
راشد : آآآآآآآآآآي .. بس ما يعور هههههههههه
وسار راشد صوب امه وحبها على راسها ..
ويلسوا يسولفون ..
وعقب أذن الظهر .. ساروا الشباب المسيد وام راشد ردت الفله..
وعند مهره وميره ..
ميره كانت توها طالعه من الحمام متمسحه ومهرة كانت توها داشه عليها طبعا عقب ما صلت ..
مهره : ميرووه
ميره : شو..
مهره : خمني منو عندنا ..
ميرة : منو؟
مهره : انتي خمني قبل ..
ميره : ما ادري
يودت مهره ميره من ايدها وسارن صوب الدريشه .. واشرت مهره صوب الميلس.. أول ما شافت ميره النعوووول .. حطت ايدها على ثمها
ميره : حلفي
مهره : وحياااااتج..
ميره : من متى ؟؟
مهره : من ساعتين تقريبا
ميره : فدييييييييييييييييييييته والله (طبعا في قلبها) ..
مهره : وازيدج من الشعر بيت .. في احتماااااااااال يباتون بعد
ميره : زين زين ..
وتدخل عليهم امهم ..
ام راشد : بناتي عقب ما تخلصن تعالن المطبخ ابغيكن تفزعلي ..
مهره : انا خلصت غناتي ..
ميره : انا بصلي وبلحقكن ..
روحت ام راشد ويا مهره المطبخ وتمن يعابلن الغدا .. وعقب ما خلصت ميره من الصلاة تمت توايج من الدريشه عّل وعسى تشوف مانع في أي لحظه ... بس يا خساااااااره .. ما ظهر .. تململت ميره وهيه تترياه فقررت تلحق امها واختها في المطبخ..
وعقب الغدا ساروا قوم حمد ومانع يقضون حايتهم وسار راشد فيا ابوه يتابعون حلالهم .. وعلى الساعه 5 العصر في بيت حمد بن سهيل ..
شمه وحصه يعابلون في المطبخ يسوون كيكه .. ويدخل عليهم منصور لابس كندورة كويتيه ومتغتر وكان يسكر عقمته .. وكانت شمه عند الفرن وحصه كانت تسوي الكريمه..
منصور : شو تسوون ؟؟
حصه : نسوي قوزي .. ما تشوف انها كيكه يعني..
منصور : ( يبتسم) فديتج ليش تعّبتي عمرج ... والله ما يحتاي وانا مب غريب .. لا وبالكاكاو بعد .. المفضله عندي .. تسلمين الشيخه..
حصه : ( تضحك بمصخره ) لا وانته الصااااج ... حق الشيخ منصور بن سهيل..
منصور :احم حم .. اخجلتي تواضعي والله ..
حصه : سير لا هذا اللي ناقص بعد.. اسويها حقك جيه قّلوا العرب
منصور : لا يكووووون طايح من عينج غناتي ..
حصه : خل عنك انته الحين .. شو هالكشخه كلها .. على وين ؟؟
منصور : الله يسلمج بسير ويا اخوج المصووون المووووول...
حصه : اهااااااا وشو لكم من الحاية هناك
منصور : وانتي شو حارّنج ..
حصه : ههههههه .. وليش احتر الغالي .. ما في داعي ..
وشوي انا غيث داخل عليهم ..
غيث : يالله منصور .. روحنا..
منصور : يالله.. وراااااك
ويوم روح غيث السياره شغلها
عاد منصور لازم يغلس على حصه قبل ما يروح .. سار صوب صحن الكريمة اللي جدام حصه وحط صبعه وشل كريما وحطها على خشم حصه وشرد ..
منصور : واااااااااااحد صفر..
حصه : ما عليه ... وراك وراك والزمن طويل ...
وفي بيت ثاني بن محمد..
ميره ومهره ورفيعه يالسات في البلكونة اللي فوق ..
مهره : رفوع ليش ما يبتي رواضي وياج ..
رفيعه : سارت ويا امها الجمعيه وعقب بيسيرون بيبي شوب بيشترولها ثياب ..
ميره : اها .. يعني ما بتلحق عليه ..
رفيعه : على منو ؟
ميره : ( ترفع حاجبها وتنزل الثاني ) على حمد ..
رفيعه : ( مرتبكه شوي ) ما اظن ..
رفيعه كان في خاطرها تسأل ميره عند حمد ومتى يا؟؟ ومتى بيروح؟؟ ووينه الحين ؟؟.. بس طبعا ما قدرت لانا تخاف ميره تحس فيها أو بالأحرى تفهم الموضوع غلط.. على طوووول غيرت الموضوع وجلبت السالفه ..
رفيعه : شو الحين ؟؟ وين بتكملن دراستكن ؟؟
مهره : أنا أفكر في تقنيه دبي..
رفيعه : والله .. زين عيل .. وأخيرا بيكون حد منكن عندي في التقنيه ..
ميره : بما انج هناك عشان جيه غير وجهتيه لجامعة الإمارات ..
رفيعه :ههههه ويا ويهج .. ارمسج جد
ميره : صدق انزين .. انا بسير جامعة الإمارات
مهره : ومنو بيخليج اصلا ..
رفيعه : صدقها والله.. عمي ما بيخليج تسكنين عند حد غرب ..
ميره : ومنو قالج اني بسكن عند ناس غرب..
رفيعه :عيل وين بتسكنين ..
ميره : عند خالتيه موزه ..
مهره : وشاورتي اميه وابويه ..
ميره : ان وافق ابويه اميه بتوافق .. وخلوه عليّه بقردنه بالرمسه لين يوافق..
رفيعه : على قولتج ..
وعلى الساعه 10 فليل وفي بيت حمد بن سهيل ..
حصه وشمه يالسات في الصاله اللي فوق يشوفن برنامج الحوادث .. وكانت حصه منسدحة على الغنفه وشمه يالسه على الارض .. ودخلوا عليهم غيث ومنصور .. سار غيث حجرته عسب يبدل ثيابه و أول ما شاف منصور حصه يالسه ومستريحه طبعا هالمنظر لازم ما يخليه على حاله .. سار صوبها ووقف جدام التلفزيون ..
منصور : حصيص .. يبونج على التلفون ..
وحصه حتى ما فكرت ان منصور يجذب عليها .. واصلا التلفون ما صاح وهيه على نياتها قامت من مكانها وسارت صوب التلفزيون ومنصور أول ما شافها تقوم انسدح مكانها .. ويوم انتبهت انه مقلب ردت معصبه ووااااصله حدها ..
حصه : منصور
منصور : نعم
حصه : قوم من مكاني بالطيب يعني .. زين أني للحين قابظه أعصابي
منصور : اممم .. بقوم بس على شرط ..
حصه : لا والله ..
منصور: تيبيلي كوب عصير بارد وياريت يكون همبا ..
حصه : ( مبتسمه له ) حاااااااااااظر .. وسارت المطبخ
استغرب منصوووور من ردة فعلها .. بس يالله زين منها الصراحه مشتهي عصير ..
وعقب شوي حصه تدخل عليه وفي ايدها كوب عصير واحد حاطنه في الصينيه مالته ..
حصه : تفضل .. وسارت يلست على الغنفه اللي عدال الباب ..
شو هالأدب اللي نزل عليها مرة وحده .. حاظر وتفضل .. شو السالفه ؟!! ابد هب طبيعيه
عدل منصور يلسته وقبظ كوب العصير ويوم شربه العصير اللي شربه تففففففففففف برع ثمه ..
أول ما شافته حصه ظحكت عليه و قالتله واحد واحد .. وسيده عالحجرة وقفلت الباب ..
الأنسه حصة تعمدت تحط في العصير بدل السكر ملح.. وهنيه قام منصور من مكانه وسار صوب حجرة حصه ..وقالها..
منصور : مردووووووووووده الشيخه .. كل هذا وشمه تظحك عليهم ..
ونرد لدار الحي وعلى الساعه 12 .. حمد ومانع يالسين على الممزر يتريون الساعه وحدة توصل عسب يسيرون المطار ..
كان كل واحد منهم يشوف البحر ويفكر في حالته .. مانع يفكر في ميره .. ما يعرف كيف يبين لها شعوره .. واذا عرفت شو بتكون ردة فعلها .. يا ترا هل بتجرأ وبقولها ؟؟!! .. وحمد يفكر في حالته ويا رفيعه .. شو هالشعور الغريب اللي أحسبه كل ما اشوفها ؟؟ وليش كل ما ابتعد عنها اتوله لها واترقب شوفتها ؟؟ .. وكثير من التساؤلات اللي ما لقولها جواااااب ..
وعقب نص ساعه روحوا المطار ويوم وصلوا هناك كان باقي ربع ساعه عن الطياره فيلسوا في الكوفي شوب .. وعلى الساعه وحده ساروا صوب قسم الاستقبال .. وعقب عشر دقايق تقريبا يطلعون حارب وعيسى من البوابة .. ودارت عيونهم على الموجودين لين ما طاحت عينهم على مانع وحمد ..
سلموا عليهم ويابوا شنطهم وطلعوا برع المطار..
وفي سيارة حمد ..
حمد كان يسوق وكان حارب عداله ووراه عيسى سادح السيت وباخنها رقدة لان التعب كان مسيطر عليه وحارب كان بعد تعبان بس سيطر على عمره وخلى الرقاد للبيت..
حمد : يا حيكم والله وشو الدراسه هناك ؟؟
حارب : تمام والله .. انته شحالك وشحال الاهل يعلهم بخير ؟؟
حمد : يسرك حالهم والله .. كلهم بخير وسهاله ..
حارب : وانته مانع شحالك وشحال هلك ؟؟
مانع : والله طيبين..
حارب : شو بتكملون طريجكم ولا بتباتون هنيه
حمد : ما اظني انكمل يمكن نبات في بيت خالتيه عليا ..
حارب : عيل باجر غداكم عندنا في البيت ..
مانع : ما يحتاي تعبل عمرك ..
حارب : وانته شو يخصك أعبل ولا ما أعبل .. بتون انتوا بتون ..
حمد : ههههه خلاص تم ..
ويوم وصلوا بيت عيسى .. نزل عيسى من السيارة بعد ما خبرووه ان الغدا باجر في بيت حارب ونزل شنطه من ورا ودخل داخل بيتهم .. ويوم وصلوا بيت حارب .. نزل حارب ونزل شنطه من ورا بمساعده حمد .. ويوم ركب حمد السيارة ياه حارب عند دريشته وقاله ..
حارب : باجر ان الله راد بييكم في الميلس ..
حمد : اوكيه .. نترياك
وساروا قوم حمد بيت خالتهم عليا وساروا حجرة الضيوف اللي عدال الميلس .. وحصلوها جاهزه فرقدوا سيده من التعب .. أول ما دخل حارب بيتهم سار صوب الميلس وحط قشاره على طرف الميلس دخل الفله لان كان عنده مفتاحها .. دخل شوي شوي ركب الدري وسار حجرته وفتحها .. كانت الحجرة نظيفه لان الخدامة بين كل فتره وفتره تنظفها .. بدل ثيابه ولا اراديا اول ما انسدح على الشبريه رقد .. وباليوم الثاني في بيت سالم بن محمد .. وعلى الساعه ثمان الصبح ..كانت رفيعه وامها وابوها واخوها خليفة يالسين يتريقون في الصاله ..
ام خليفه : غربلاتها البشكارة ما ملحت البيض خلته تهم .. الله يعدم مونتها..
بو خليفه : أحسن .. والملح شو له من الحايه من يومين رافعليه ضغطيه يعلني بلاااااه ..
خليفه : اقول رفوع غسلي كوب الماي عن حد يشرب منه عقبيه .. مافيه أعادي حد بهالزجااااام ..
رفيعه : ان شاء الله
وقفت رفيعه و شلت الكوب وياها ويوم طلعت برع الصاله.. كان حارب توه نازل من الدري وأول ما شافها ابتسم وينزل حيّاته ويرفعهن .. عقت رفيعه الكوب من ايدها وربعت صوبه ولوت عليه وهيه تصيح .. (( حارب اخو رفيعه ووايد يحبها ووهوه أكبر عنها بسنتين .. يدرس في امريكا .. رفيعه تعتبره أقرب واحد لقلبها..)) زاغت ام خليفه من هالصياح .. شو بلاها البنت ؟؟ ربعت برع الصاله وأول ما شافت حارب تيبست محلها .. سار حارب صوبها وحبها على راسها ولوا عليها وهيه تصيح وحتى هوه نزلت من عينه دمعه لانه من الخاطر توله عليهم وبعدين ياه ابوه واخوه خليفه .. تخيلوا انه من سنة ونص ما شاف أهله .. عاد أنتووا الحين تخيلوا كيف بيكون اللقاء ...
وطبعا من شافوه ما فجووه الا عقب ساعه وشي وهم يتنشّدونه عن أخباره وأخبار الدراسه ووووو الخ .. وعقب ما تفجج عنهم وعقب طلعة رووح .. ترخص منهم وسار صوب ميلس عمه ثاني بس قبل لا يدخل خطف على المطبخ بيشرب ماي وبيكمل طريجه ويوم دش المطبخ حصل بنت عاطيتنه ظهره وتطلع شيء من السده ..
هنيه حارب تيبس محله.. ان شاء الله تكون مهره .. يا رب يارب .. يالله يا رب ما تكون ميره .. ياااااااااااااااااااااااا ااااااااااا رب
حارب : احم احم
أول ما سمعته سيدة تغشت ويوم صدت وراها انصدمت ما توقعت انه حارب .. متى يا من أمريكا..
حارب : السلام عليج
.......: وعليك السلام والرحمه
حارب : شحالج بنت عمي ؟؟
......: بخير وسهاله .. شخبارك انته ؟؟!! الحمد لله على السلامه
هنيه حس حارب بأن حد صفعه على ويهه .. اوووووه هاذي ميرووووه .. مهره مب جريئه .. يالله يالله ترد السلام .. يا ربي وين مهره ؟؟؟ والله اني مشتاقلها لدرجة ما تتصورها .. وهيه ابد ولا همهاااا..
حارب : الله يسلمج ميره ..
ميره : اووه غريبه .. أول مره حد يعرفني
حارب في خاطره ..( وانتي حد ما يعرفج .. ما شاء لله عليييييييييج)
حارب : بعد ربج ..
وعقب سار صوب ثلاجة المااااي وشرب منها ورد يكلمها ..
حارب : تامرين بشيء ..
ميره : سلامتك ولد عمي
طلع حارب من المطبخ وهوه متحسف لانه ما شاف مهره .. حارب يحب مهره حب صادق ومن قلبه بعد .. وحاط في باله انه ما يهمها .. بالعكس .. مهره تموووووت عليه بس في حياتها ما صارحت حد بهالشيء لان طبيعتها جذيه .. هاديه
وفي بيت ثاني بن محمد مهره وميره يالسات في الصاله ويا امهن ..
ميره : امييه متى بيون قوم خالتيه عوشه وموزه
ام راشد : والله ما أدلهم يا بنتي..
مهره : ليش ما تعزمينهم يا اميه ..
ام راشد : ما ادري والله ..
ميره : الحين بييبلج التلفون واعزميهم اليوم العصر..
ام راشد : ما شاء الله وانتي جاهزه .. يالله قومي هاتيه ..
ميره : حاااااظر من عيوني الثنتين
مهره : لازم .. هههههههه
طبعا ميره ما تسوي هالشيء الا بثمن .. والثمن هوه شوفه مانع طبعا .. والحين املها كبر بما ان امه بتي ..
اتصلت ام راشد ببيت حمد بن سهيل وعزمت اختها عوشه وموزه عندهم ويوم عرفت ان ( غايه ) أم منصور عندهم عزمتها بعد ويااهم .. وطبعا عقب محايل وافقوا ... وقرروا ايوون على دفعتين .. دفعة غيث اللي شل وياه شمة وحصه والقشار ودفعة منصور مع الدريول وام منصور وام حمد وام مانع وعلاوي وعنود اما بو مانع فما يا وياهم لانه كان مسافر قطر عسبة الركظ .. وعلى هذا الحال طلعوا مناك على الساعه 4 العصر.. وطبعا بما ان حمد ومانع محد وياهم فلذالك استفرد منصور بالدريول عقه عداله وهوه اللي ساق .. صح ان الحريم احتشرن شوي بس سكتن يوم شافن أن سواقته عدله .. ويوم عدااه وصل دبي وقف السياره على طرف الشارع وبدل مكانه مع الدريول بسرعه.. عاد أونه المسكين ما يخصه .. ولا جنه سوا شيء ..صح انه غيث شافه لاكن ما رام يسوي شيء لان منصور مستهتر اذا كان حاط شيء في راسه بيسويه ولو شو استوى وشاف بعد أن ما عليه شر لأن سواقته فنانه وواثق فيه .. ويوم وصلوا دبي حصلوا أهل دبي يتريوونهم .. ما عدا الشباب حمد ومانع وراشد وحارب وعيسى اللي كانوا يحوطون .. وطبعا أجلوا العزيمه لباجر..
كانن مهره وميره متغشيات ويسلمن على خالاتهن وشمه وحصه.. وكانت ميره لابسه كندوره عيناويه .. ومهره لابسه كندوره صفره .. وكله طبعا صدفه .. كانن الحرمات على طرف يكملن سلامهن .. امها حصه وشمه ومهره وميره كانن واقفات على طرف ..واما غيث تواعد ويا الشباب وروح وشوي ان منصور نازل من السياره وسار سلم على خالته عليا ورد صوب البنات .. عاد هوه من شاف وحده لابسه كندوره عيناويه ارتبش واستااااانس... منصور ما يستحي ابدا .. بالعكس كل ما يشوف حد لازم يطفربه مهما كان .. بنت او ولد ..عيوز أو شيبه كله واااااااحد ..
وطبعا ميره ومهره عرفنه ..
منصوره : مرحبا والله بالعيناويه .. شحالج؟
وطبعا مااستغربت ميره من جرأته عادي متعوده عليه .. وكانت تعرف انها هيه المقصووووده فما كان منها الا انها ردت عليه ..
ميره : يسرك الحال والله ؟؟ شحالك انته؟؟
منصور : نشقح ..
وانتبه لمهره وبما انها لابسه أصفر وهذا يمثله نادي الوصل اللي ما يدانيه بعيشه الله .. بس بالله لازم يطفربها شوي ..
منصور: وانتي يا العدوة اووه قصدي الوصلاويه .. شحالج بعد ؟؟
مهره ويهها عورها .. وهيه الا شراته تشجع العين وتبغض الوصل بس منصور فهمها غلط ..
مهره : الحمد لله بخير
منصور : عساه دوم .. انزين حصيص .. بتحصلين في دبة السيارة كيستين فيهن ثياب حمد ومانع نزليهن فيا وخليهن عندج ..
حصه : اوكيه ..
وحط السويج في ايد حصه وسار سيده وراغ الدريول من السياره وقاله ييلس عند ربيعه اللي هوه دريول قوم مهره وميره .. وانتهز فرصة غياب حمد ومانع .. وسار منصور بالسيارة العزبه عسب يسلم على بو راشد ومحمد ( يد راشد ) لان منصور متعلق فيه يعيب بسوالفه وياه وطبعا حتى الشيبه ما سلم من غلاسته ..
ومر الوقت وعلى الساعه ثمان المغرب رد كل من الشبيبه بيتهم يعني حارب رد بيتهم وعيسى رد بيتهم وحمد ومانع وراشد ردوا البيت .. وعند البنات .. مهره وميره وحصه يالسات في الصاله اللي فوق يشوفن التلفزيون .. والحريم كلهن تحت يالسات في الصالة التحتية يتقهوين .. ومنصور رد من العزبه وسار صوب الميلس ويلس ويا الشباب عقب ما نفى الشبهات عنه ..
وعند البنات ..
شمه كانت تتسبح في الحجرة و ميره منسدحة في الصاله عند التلفزيون وحصه ومهره يالسات يسولفن آخر الصاله .. وفجأة تبند ميره التلفزيون وتسير صوب البنات وتيلس عندهن .. كان ملامحها شرات الوحدة اللي تبا تقول كلام ..
ميره : ابغي اقولكن رايي في شيء ..
مهره : في الشو؟؟
ميره : نحن ليش نتغشى ؟؟
حصة : عسبة الرياييل ما يشوفونا ..
ميره : وأي رياييل بالضبط ؟؟
مهره : اممم الرياييل عامة..
ميره : وحتى من الأهل؟!!!!
حصه : ميروووووووه هاتيها من الآخر..
مهره : هيه والله .. ييبيها من الآخر
ميره : اوكييييه.. بإختصاااااااار ليش نحن نتغشى من أهلنا ..
مهره : لأن عاداتنا وتقاليدنا تقول جذيييه ..
ميره : مليت من هالعادات والتقاليد .. الصراااااحه مليت انا .. كل ما اشوف حد من العايله اتغشى .. مب حاله هاي.. دام اننا متحجبات والحمد لله.. الغشوة شو لها من الحايه ؟ ؟
حصه : اصلا انا ما أتغشى الا من شخص واحد واللي هوه اخوكن راشد أما مانع ولد خالتيه مانع من استويت ما أتغشى عنه ..
ميره ومهره منصدماااااااااااااااااااا اااااات
ميره ومهره : حلللللللللللفي
حصه : صح النووووووووووووووم توكن تدرن ..
ميره : الصراحه توني الا عرفت
مهره : وانا بعد
حصه : خلييكن مني الحين !! نرد لساااااااااالفتنا الأصلية ..
ميره : احين شو الحل ؟؟ الصرااحه الصراااحه ما مليتن من هالحاله ؟؟
مهره : انا تعودت على عالشيء .. يعني بالنسبة لي عادي
حصه : وانا عادي بعد
ميره : انا ما عليّه منكن .. برمس اميه وبااااخذ شورها
Is up to u!!مهره :
ميره : أدري .. بس مب الحين.. يوم بحصل الوقت المناااااسب..
وقامت وشغلت التلفزيون وانسدحت في مكانها المعتاد
حصه : عيل وين رفوع ؟؟
مهره : على ما أضن انها سارت ويا امها تسلم على خالتها .. أكيد الحين بتي ..
وشوي يسمعون صوت حد يمشي على الدري .. والا بهااااااا رفيعه
حصه : هلا والله .. بنت الحلاااااااااااااااااااال عند طااااااريها ..
رفيعه : بالخير ولا ؟!!
حصه : افااااا أكيد بالخير
وسلمت عليهن ويلست عدالهن ..
رفيعه : علومكن ؟!
مهره : تمام والله ..
ميره : انتي شخبارج يا الهوّاااامه ؟
رفيعه : ههههه والله ما شيء أخبار ..
حصه : يا حيج والله ..
رفيعه : الله يحييج .. والا انتوا من متى هنيه ؟؟
حصه : من العصر...
رفيعه : بتقيلون ولا بتباتون؟
حصه : بنبات ..
رفيعه : زين والله ..
ميره بعدها مصره على رايها .. وترد تفتح السالفه مع رفوووع..
ميره : اقوول رفوع .. انتي تتغشين من اهلج ..
رفيعه : لا .. ليش هالسؤال يعني ؟؟
ميره : عيل ليش نحن نتغشى منهم ؟!
رفيعه : الا روووحكن والله .. انا ما أتغشى من عيال أعمامي ولا عيال خالاتي وخوالي ..
ميره :اممم ..
رفيعه : بلاج ؟
ميره : ما شيء .. خلونا من هالسالفه الحين .. عيل وين رواضي ؟؟
رفيعه : يبتها ويايه .. شافها واحد كان ظاهر من الميلس وشلها عني ..
مهره : منو ؟؟
رفيعه : ما أدريبه والله ...
ميره : كيف شكله ؟؟
رفيعه : اممم طويل .. لابس كندوره بيظه وسفرة حمرا
حصه : اليوم حمد ومانع لا بسين كنادير بيض وسفرة حمرا
رفيعه : لا لا .. ولا واحد منهم ..
ميره : عي منو؟؟
رفيعه : يوم شاف رويضه لابسه بنطلون وقميص عيناوي .......
وقبل لا تكمل كلامها
حصه : اهااااااااااااااااااااااا ا .. هذا منصووووور
رفيعه : منو هذا بعد؟
حصه : هذا منصور اخويه من ابويه
رفيعه : قولي والله ..
حصه : والله
رفيعه : وايد تغير عن قبل .. واصلا نسيت ان عندج اخو من ابوج ..
حصه : عندي اخو واللي هوه منصور وخوات والل هن شمه و عنود..
رفيعه : يا حظج والله على الأقل عندج خوات .. هب انا
ميره : على طاري الاخوان .. على أي أساس يا آنسة رفوع ما تخبرينا ان حارب رد من السفر ..
رفيعه : اسمحيلي والله .. اصلا نحن ما درينابه الا اليوم الصبح وهوه ياي البارحه فليل .. ومره على الساعه عشر الضحى روحنا صوب خالتيه ولين ساعتج هاذي ..
فز قلب مهره من مكانه .. يالله متى رد؟؟ والله اني متولهه عليه .. يا ربي .. اباااا أشوفه .. مع هالوله والشوق كله ما ظهر منها الا هالجمله عشان ما تبين اللي في قلبها ..
مهره : الحمد لله على سلامته
رفيعه : الله يسلمج من الشر
وشوي ان شمه تدخل عليهن وسلمت على رفيعه ويلسن يسولفن .. قامت مهره من مكانها وسارت صوب البلكونة ويلست هنااااك .. وتنهدت بقووو..
آآآآآآآآآآآآآآه ما أصدق انك رديت .. يالله يا كثر ماني متوله عليك .. متى بشوووفك .. يالله وأخيرا بشوفك عقب سنة ونص بعاااااد .. يارب عجل لقانا .. وشوي تشوف منصور وغيث ظاهرين من الميلس ويوم وصلوا نص الحوي شافت حد داخل من الباب .. ويوم ركزت عدل طلع انه حارب.. اللي التقى ويا منصور وغيث ويلس يسولف وياهم شوي .. يلست مهره تراقب حركاته حركه حركه .. يا الله يا حاااارب بعدك على حركاتك ما تغيرت .. لا تغيرت طولت شوي .. زين اني شفتك والله .. بس هالشوفه ما تسد وايد بعيده .. هذا اللي في قلب مهره لا قصدي جزء منه .. لان اللي في قلبها شيء ما يوصف .. ما تروم تظهره لان طبيعتها وهدوءها يحكم عليها هالشيء .. بس ان شاء الله ايي اليوووم اللي راح تظهر مهره كل اللي في قلبها .. بس متى ؟؟ الله يعلم .. مع الأياااام بنعرف ...
ظنكم انهم بيتلاقون وجها لوجه؟
وشو هيه المقالب اللي راح يسويها منصور؟؟
هل حمد بيشوف رفيعه ؟؟
وشو بيستوي بينهم ؟؟
منصور : انزين خلاص يا اميه .. دومج تقطعيني فالرمسه.. الحين بسير صوبها ..
ام منصور : بتحصلها في حجرة شميم..
سار حمد صوب حجرة اخته شمه وكانت شمة ترتب كبتها وعنود كانت طايحه على الأرض وهيه تلّون ..
(( شمه أصغر عن منصور بسنه يعني اول ثنوي .. حبووبه وراعية سوالف بعد .. وعنوووود آخر العنقود وعمرها خمس سنين .. وايد متعلقه بمنصور لأنه دووووم يلعب وياها)) ..
أول ما شافته عنود قامت وربعت صوبه ولوت عليه .. ويلس منصووور يلعب وياها وتمت شمه تظحك عليهم ..
وشوي ان امهم داشة عليهم واول ما شافت منصور عصبت ..
ام منصور : ويدي.. منيصير شقايل المسيد صلى وانته بعدك هنيه؟؟
شاف منصور ساعته وانصدم ان الوقت خطف ومن دون ما يحس.. وانه وقت الصلاة صدق فاته ..
منصور : اوووه صدقج والله .. التهيت بعنوده ولا شفت ساعتيه
ام منصور : يالله قم صل فحجرتك وعقب تعال برع لانهم عقب شوي بيووون
منصور : اوكيييييييييييه
سار حمد حجرته عسب يصلي وقال حق شمه انه تييب عنود الحجرة عقب ما تخلص الصلاة ...
وعقب ما صلّت شمه ودّت عنود صوب منصور اللي كان توه مخلص صلاة ..
وردت شمه ويلست فيا امها في الحوي .. وشوي أن سيارتين داخلات البيت .. نزل حمد من سيارته ونزل مانع من سيارته ويا غيث .. وساروا صوبهم أول ما شافتهم ام منصور نشّت وشمه تحجبت ونشت وياها .. سلموا غيث وحمد عليهن كلهن ووايهوهن .. واما مانع سلم على ام منصور اللي يحبسها شرات خالته .. وشاف شمه عدالها ..
مانع : شحالج شمه ؟؟
شمه : يسرك الحال والله ..
ويلسوا كلهم يسولفون .. طلع منصوور من الفلة وشال عنوووووده على جتوفه .. وأول ما وصل عندهم نزّلها و سلم عليهم ويلس وياهم ..
منصور : شحالكم شباااب ؟؟
حمد : تمااام
مانع : وينك يا القاطع .. امرررررره مالك شووووف؟؟!!
منصور : والله موجوووووووووود ..
غيث : ما بتي ويانا؟؟
منصور : وين بعد ؟؟
غيث : بيتنا.. يعني وين بعد ؟؟
منصور : لا ما فيّه منو بييلس هنيه
غيث : عرااااااااحتك والله .. امبونا نبغيك ترّفه عن نفسك شوي .. وتسير فيانا العزبة ونلعب بذييييج البانشي .. بس بما انك ما تبغي ... كييييييييفك
أول ما سمع منصور طاري دراااااجات ارتبش
منصور : ومنو هاذا الخرّيييييييييط اللي قالك ما أبغي ..
حمد : أنته قلت بعد منووووووو غيرك؟؟
منصور : انا ما قلت ولا الله قاله.. أنا قلت حاظر وبالشوووووووووووووفه
وكلهم ظحكوا على منصوووور ..
منصور : متى بتسيرون؟؟
مانع : بااااجر العصر ..
غيث : اميه شو رايج باجر تووون بيتنا وتاخذون لكم كم يوم عندنا ؟؟
ام منصور : ما أدري والله ..
شمة : دخيلج اميه خلينا نسير .. تولهت عليهم هناك .. ومنّااااك نغير جو..
ام منصور : يصير خير ..
حمد : حد بييبكم ولا تبوني اييكم ؟؟
منصور : افاا والله افاا .. وأنا هب تارس عينك ..
حمد عقّد حياته) منصور ما شيء سواقه إلاّ يوم بتاخذ الليسن ..
منصور : اللي يسمعكم الحين يقووول بظرب بها خط لين دبي الا تراني في العين..
مانع : ولو .. وكااااااد يزخونك الشرطه .. بعدين شو بيفجّك منهم ؟؟
منصور : شو عليه .. انا بصبر الحين .. بس خل هالسنة تخطف ..
غيث : ما عليه خير لين ذاك اليوم ..
ام منصور : قومي بنتي قولي حق البشكارة تحط العشا
شمة : ان شاء الله
وعقب ما تعشوا الشباب رد كل واحد منهم داااااااااره .. وبالباجر الساعه تسع الصبح ظهروا قوم منصور ويا الدريول وويّهوا صوب قوم حمد بن سهيل .. وأول ما وصلوا حصلوا ام حمد وحمد غيث وعلاااااوي يتريونهم في الحوي ..ويوم نزلوا من السيارة ساروا صوبهم وسلموا عليهم وساروا الصاله اللي داخل الفله ويلسوا هناك ..
وكان منصور يالس عدال غيث ..
منصور : اقول غيث .. عيل وين حصيص؟!
غيث : داخل حجرتها
منصور : اوكييييه .. وسار صوب اخته شمة وقبظ ايدها وسحبها ويااااااااااه ..
ويوم وصلوا آخر الدري انتبه ان باب حجرة حصه مفتوووح .. صد منصور صوب شمه وحط صبعه جدام ثمه ويقصد بها (( لا تصدرين أي صووووت )) هزّت شمه راسها على انها فهمت اللي كان يقصده .. وشوي شوي يدخلون الحجره .. وقفت شمه عند الباب وكمل منصور طريجه صوب حصه اللي كانت عاطيه ظهرها للباب ومجابلة كبتها .. أول ما وصل منصور عندها حط ايده على عيوووونها ...
حصه : والله انك متفيج يا حمد .. خلني أخص شغلتيه قبل ما ايّووون ..
يوّد منصور ظحكته .. وقالها وهوه يقلد صوت عيوووووووز..
منصور : حاااااااولي مرة ثانيه ..
حصه : (مستااانسه) منصوووووووووووووووور
منصور : غلط .. عمج وشيخج وتاج راسج منصور ( وخوّز ايده عن عيونها )
سلمت حصه عليه وعلى اختها شمه ..
حصه : متى ييتوا ؟
شمه : الا من شوي ..
عطت حصه منصور بكس خفيف على خده ..
حصه : والله اشتقت للظرابه وياااااااك
منصور :ههههههه لاحقة انزين .. بطلع لج قرووووون .. بس هب اليوم .. اليوم كله بيزي ..
حصه : اوووه اوووه .. اونه الحين بزنس ماااااااان
منصور : لا بااااااات مان
ظحكن حصه شمة عليه ..
منصور : شو يالسه اتسوين ؟؟
حصه : ادورلي كندوره ..
دز منصور حصه عن الكبت ووقف جدامه وهو يناظر كندوره كندوووره .. وأول ما طاحت عينه على كندورة ومب أي كندوره .. كندووووووره عيناوية وبالقووو ..
منصور : هااااااااي المطلوبه
حصه : أي وحده ؟
طلع منصور الكندوره وحطها على السرير ..
أول ما شافنه حصه وشمه ظحكن..
حصه : هههههههه .. ده بعدك!! عناد فيك ما بلبسها ..
منصور : ( يطالع حصه بنظره بريئه مستصنعه ) افااا ذوقي مب حلو ؟؟
حصه : العب على غيري .. ما يخصها بالذوووووق .. انته تباني ألبسها لانها عيناويه .. بس عنااداا فيك بلبس هاذيج الصفرة .. فنانه
منصور : عيل ورفجه بو خليفه تلبسينها ..
شمه : حصوه لبسيها .. ومهما سويتي بتلبسينها غصبا عنج دام ان هذا عندج ؟؟
حصه : شوف انا بلبسها عسبة انك بس رفجت ولاّ أنها حرام ما طاحت ينبي ..
منصور : ( رافع حاجب ومنزل حاجب ويبتسم ) جذه ابااااااج
حصه : على امرك الشيخ .. والحين ممكن اطلب منك طلب؟؟
منصور : احم احم .. ليش لا ؟؟
حصه : ممكن تجلب ويهك وتطلع برع ..
منصور : افاااااااااااااا ليش ؟؟
حصه : بتلبس .. عندك مانع ؟؟
منصور : لا والله عندي حمد
حصه : ( عقب ما طفرها منصور قررت تجذب عليه ) أقول منصور على طاري حمد .. سير حجرته بتحصل في السدة اللي عداله شريط ميحد حمد اليديد ..
منصور : ههههه .. جديمه غناتي ..من أول ما نزل وهوه عندي .. خيرها فغيرها
حصه : ( طفرت من الخاطر ) منصوووووووووووووور
وطبعا بعناد منصور وغلاسته اللي ما ييوز عنها قرر يطفرها أكثر لانه يداني حصه يوم تتضيج منه ..
منصور : ( عقب ما يلس على السرير وحط ريل على ريل وشبك ايده وحطهن على ركبته ) هب ظاهر لين ما ترمسيني باحترام ..مثل ويقلد صوت حصه (( أقول الشيخ منصور بن سهيل .. غناتي .. فديتك ممكن تترخص عنا وتسير وين ما تبا لاني ابغي اتلبس.. وهاذا بعد موافقتك طبعا !!))
حصه : سير لا .. هاللي ناقص .. أتفداااااااك والله حاله ..
نش منصور من مكانه ووقف ..
منصور : شوفي .. انا الحين بطنّش وبسوي عمري ما سمعت شيء من رمسج .. وبطلع بكرامتي لان اللي تحت من ييت وهم يتمنون أيلس وياهم ..
وتمن البنات يظحكن على منصور وهوه طالع وبهيبة في مشتيه .. وسار ويلس في الصاله وياهم .. ويوم دخل الصاله حصل مانع موجود .. سلم منصور عليه ويلس في الكرسي اللي مجابلنه ..
وعقب ما تلبست حصه نزلت ويا شمه تحت ويوم وصلوا نص الدري سمعوا صوت مانع .. تحجبن وكملن طريجهن صوب الصاله .. ويوم دخلن سلمت حصه على امها وامها ام منصور..
(( حصة ما تتغشى من مانع لانه يوميا وياهم وتحسبه شرات أخوها وهو بعد يحس بأنهم أهله لأن الله ما عطاه خوان ولا خوات .. فلهاذا هوه متعلق فيهم وايد وايد ))
ويوم انتبه مانع لهن لانه كان يرمس ويا حمد ..
مانع : شحالكن بناااااات ..
شمه وحصه : بخير الحمدلله
وسارن ويلسن عدال منصور وتمّن يدّقن سوالف وياه ..
خطف الوقت وعقب العشا وطبعا عقب ما ردوا الشبيبه كلهم من العزبه وعقب ما لعبوا بالدراجات .. رد مانع بيته .. وكل واحد منهم سار الحجرة اللي بيرقد فيها .. وكان التوزيع كالتالي .. شمه عند حصه .. منصور عند غيث .. ام منصور وعنود في حجرة الضيوف وام حمد وعلاوي في حجرتهم وحمد بروحه في حجرته ..
ونرد لأجواء دبي وبالتحديد في حجرة رفيعه .. كانت رفيعه طايحه على السرير وهيه تقرا مجلة طالبتنها من اليازيه .. وفجأة تسمع حد يدق على الباب ..
رفيعه : ادخل
كان حد يحاول يفتح الباب بس ما قدر ..
رفيعه :أكيد هاذي رواضي..
وقامت رفيعه وفتحت لها الباب .. أول ما شافتها رفيعه حسّت أن شعر ينبها وقف .. وأن قلبها بيطلع من محله .. لأنها شافت روضه لاويةعلى الدبدوب البني اللي اشتراه حمد لروضه يوم كانوا في الستي .. شلت رفيعه روضه ويلستها وياها على السرير ويلست تلعب وياها ..وبعدين يت خدامة روضه تبغي روضه عسب ترّقدها .. وعقب ما طلعت الخدامة ووياها روضه انتبهت رفيعه للدبدوب اللي نسته روضه فوق السرير.. ما قدرت رفيعه تقاوم الدبدوب لانه شكله يجذب من الخاطر.. شلته رفيعه ولوت عليه وبندت عينها .. معقووووولة أنا أحب حمد ؟؟ لا لا !! ليش أنا أفكر بهالطريقه ..معقوووووله كلام ميره يكون صح ؟؟ مستحيييل طبعا .. فقدت سيطرتها على نفسها وتذكرت شكله وهوه يالس في السياره وعاق السفره على السيت اللي يالس عليه .. وتذكرت شكله وهو ايّول .. آآآآآآآآآآآآآآآآآآآآآآآآآ آآه يا كثر ما انذبح قلبي .. انتبهت حصلة لتفكيرها .. يالله هل انا أحب حمد ولا لا ؟؟ وهالشعور اللي أحسبه جداه .. هل هوه اللي يسموونه الحب ولا لا ؟؟ اووووووه انا شو يخصني بهالسوالف ؟؟ وحطت الدبدوب عدالها وطاحت وانسدحت على السرير ومن غير ما تحس استسلمت للرقااااااااد ..
وفي هالوقت وفي بيت ثاني بن محمد .. وعلى الساعه اثنعشر فليل ..مهره طايحه على السرير في حجرتها وكانت توها بترقد لولا ان اختها الحشره ميرووه يايتنها مفرفشه ..
ميره : اوووووه الديايه .. بترقدين ؟؟
مهره : انتي شو رايج ؟؟
ميره : رايي انج ما بترقدين لانج ما تبين تفوتين الفلم
مهره : أي فلم؟؟
ميره : فلم هندي .. رهييييييب .. أبطاله روعه
مهره : الله يهديج .. مهما استوا معروفه النهايه البطل بياخذ البطله طبعا ما بيقضي البطل على أعوان الشر .. ولو حتى ماااات بتستوي معجزه وبيقوم بعد واقف .. سيري لا .. انا برقد هب متفيجه لخريطهم
ميره : هههه .. وشو الحل يعني .. أسهر بروحي ؟؟ طبع لا ..
مهره : سو بيستويبج يعني ..
ميره : بليز مهروه ما ابغي أسهر روحي
مهره : وانتي شو كاظنج تسهرين .. سيري وطي راسج ابرك لج .
ميره : ما ياني الرقااااااااد
مهره : عاد انا ياني .. شو تبيني اسوي يعني .. أقوله يالله اجلب ويهك ورد من وين ماييت ..
ميره : هههههههههه .. حلووووووووووووووه
مهره : يالله يالله .. جلبي ويهج
ميره : ( بنبرة بريئه ) بليز
مهره : افف .. بس على شرط
ميره : شوووو
مهره : امممم .. اذا شيء بيبسي وحب حق السهره بسير .. واذا ما شيء (( بإبتسامه مكر )) وكان الله غفورااااااا رحيماااااا
ميره : ههههه .. ما عندج عذر كله مجهزتنه ..هههههه وفوق هذا بعد كرتون كلينكس
مهره :هههههههه .. عنبوووووووو زاد .. ما يفوتج شيء صدق انج خراب دار..
ميره :هههههههه توج تدرين .. يالله فزي.. الحين بيبدأ الفلم
مهره : اوكيه ..
خطفن الأيام وياي يوم الأربعا.. وفي بيت حمد بن سهيل وعلى الساعه ثمان الصبح ..
حمد وشمه وحصه وام منصور وام حمد وعنود وعلاوي يالسين يتريقون في الصاله..
ام منصور : عيل وين منصوور وغيث ؟؟
حصه : البارحه رادين متأخرين ولين الحين راقديين..
ام حمد : الله يهديهم ..
حمد : أقول اميه .. تراني أنا ومانع بنسير دبي ويمكن نبات هناك ..
ام حمد : ان شاء الله غناتي .. برمس خالتك عليا وبقولها تزّهب لكم حجرة الضيووف ..
حمد : تسلمين أم حمد..
حصه : أقوووووول بو شهاب .. شو رايك تودينا أنا وشميم وياك نتحوّط ؟؟
حمد : وين تبن تسيرن ؟؟ أنا بسير فيا مانع وهناك بنتلاقا فيا شباب.. شو سايرات تدورن ؟؟
ام حمد : صدقه اخووووكن .. وين تبن؟؟ صكن التراااااااب ..
برطمن حصه وشمه ..
حمد : بس عااااااااد عن مد البوز .. بدور لي يوم بفضى فيه وبحوطكن في العين ..
حصه وشمه : والله
حمد : ههههه من متى أوعد ولا أوفي ..
حصه : وأنا أشهد ..
شمه : انزين عاااد متى ؟؟
حمد : يا بنات الحلال .. قلتلكن يوم بفضى .. لا تخّلني أكنسل ..
حصه : خلاص خلاص .. كله ولا انك تكنسل .. خلاص سكتنا ..
وكان حمد يالس بينهن .. سارت حصه وباست حمد على خده اللي من صوبها وشمه من الخد اللي صوبهاااااااا ..
حمد :ههههههههههه .. الحااااااااااايه بنت حرااااااااااااااااااام
ويلسن البناااااااات مستانسات .. خلاااااص ضمنن السيره ..
وعقب ما خلص حمد من الريوق سار ويا مانع عقب ما خطف عليه وشله وياه صوب دبي عسب يغيرون مكينة سيارة حمد .. يوم وصلوا دبي كانت الساعه 11 وربع الضحى ..
فساروا سيده صوب بيت خالتهم عسب يريحون شوي وعقب الغدا يسيرون يخلصووون شغلهم اللي يايين عشانه .. وأول ما وصلوا البيت دخلوا السيارة في الكرااااج وكانت سيارة راشد عدالهم .. ودخلوا وساروا صوب الميلس ويلسوا هناك .. وكل ما يدقون على راشد يحصلون تلفونه مشغول .. وعقب ربع ساعه طلع راشد من الفلة وحاط سفرته على جتفه ويفصص في تلفونه وما انتبه للنعول اللي جدام الميلس.. ويوم ظهر من البيت انتبه لسيارة حمد .. سار صوبها وشاف رقمها وتأكد انها هيه.. ويوم رد البيت سار صوب الميلس بعد ما انتبه لنعولهم ...
راشد : هلا والله .. أقول ليش دبي مظلمة أووه قصدي منوره ..
مانع : يا الخااااااااااااااااااام
وسلم عليهم ويلس عدالهم ..
حمد : علومك بو سنيده ؟؟
راشد : علوم الخير والله ..
مانع : يا الهرم من ربع ساعه نسويلك تلفون وكله مشغوول .. منو ترمس هالكثر ؟؟
راشد : كنت أرمس ربيعي علووه متصل من مصر..
حمد : وشو يسوي في مصر ؟؟
راشد : ابوه بيسووله عملية في عيونه ...
حمد : الله يردهم بالسلامة
مانع : آمين .. عيل وين خالتيه؟؟
راشد : شوف الساعه كم
شاف مانع ساعته ..
مانع : الساعه 12 الا ربع
راشد : والحين وقت الشو
حمد : وياااااا راسك قول في المطبخ وفكنا ..
راشد : هههه لازم بعد نطفر بكم شوي
وعقب ربع ساعه من السوالف صاح تلفون راشد وكانت امه مسويه تلفون ..
راشد : هلا والله بالغاليه
أم راشد : بالمهلي فديتك.. وين دارك الحين ؟
راشد : يالس ويا أهل العين ..
أم راشد : (معصبه) رويشد ..خل عنك الجذب ... اتحرااااه بيفيدك يا مسود الويه ..
راشد : افا وانا بو سنيده .. تجذبيني ؟!! ما هقيتها منج ام راشد .. بس ما عليه هاذوووه الدليل .. وعطا تلفونه لمانع لانه كان أقربله من حمد..
مانع : مرحبااااااااا ملايين ولا يسدن بشيخه دبي وضواحيها ..
وهنيه ام راشد استقطعت .. طلعت رمسة ولدها صدق ...
ام راشد : هلا ولديه مانع .. شحالك؟؟
مانع : يسرج الحال فديتج..
ويسحب راشد التلفون من مانع..
راشد : هاذا اللي ناقص .. تتغزل في اميه .. وحط التلفون على اذنه ..
راشد : ها شو الحين ؟؟!! صدقتيني
ام راشد : ما عليه يا الهرم .. خل ابوك ويدك ايوون عسب يأدبونك .. يا مسود الويه
راشد : وانا شو سويت؟؟
ام راشد : الا من فترة كنت داخل شو خلاك توصل هناك بسرعه .. أكيد كنت مسرع ؟؟
راشد : شوي ..
ام راشد : ما عليه انزين بيوصل الخبر عند ابووووك
راشد : ههههههه
ام راشد : يالله بند يا مسود الويه
راشد : ما عليه الحين ببند .. بس وين بتروحين الحين؟؟
ام راشد : ( معصبه ) وانته شو تبابي يالهرم
راشد : بس يا اميه من متى تسبيني ما شبعتي ؟؟
ام راشد : ما بشبع الا يوم ابوك بيدور لك صرفه .. عنبو شو كاظنك على السرعه .. لا سمح الله الحين نفدت بهالموتر الله يعدمه .. شو بيفيدك بعدين ؟؟
راشد : ( حط ايده على التلفون عسب امه ما تسمعه وهو يرمس حمد ومانع ) شو بيفكني من العيوز ..
حمد : محد قالك اجذب عليها ..
مانع : فك عمرك وقولها الصدق..
راااااااشد : ههههههه عقب هالسب والتهديد آخر شيء أقولها الصدق .. نووووو وييييييي.. ورد يرمس امه
ام راشد : رويشد وين ذلفت ؟
راشد : وياااااج .. انزين اميه ما قلتيلي وين بتسيرين الحين
ام راشد : وين بسير بعد تراني الا في المطبخ
راشد : والميلس ما بتسيرن صوبه
ام راشد : لا
وهنيه حس راشد أن خطته فشلت ومافي أمل تنجح .. اممم .. لا في أمل
راشد : اووووووه أقول غناتي .. بتحصلين بوكي فوق المكتبه .. نسيته هناك ابغيج تيودينه عندج لين ما ايي..
ام راشد : ما عليه الحين بسير .. بس هب تتحسب اني بنسى السالفه !!
راشد : ههههههههه ما عليه خبري ريلج؟؟
ام راشد : عنلاتك يالله بند
راشد : هههه مع السلامه..
أول ما بند راشد عن امه صد صوب حمد وغيث ..
راشد : ههههههههههههاي .. نجحت الخطه .. الحين بتيي
حمد : بتلقاها الحين
وشوي ان ام راشد داشه الميلس وهيه محتشرة حتى انها ما انتبهت للنعول..
وأول ما دشت شافت راشد يظحك من الخاطر وحمد ومانع يظحكون بس هب شرات راشد ..
ام راشد : ( معقده حياتها وتشوف راشد )عنلاااااااااااااااااااتك يالحمار
وسارت صوب حمد ومانع وسلمت عليهم ..
ويوم يلست وياهم قبظت مخدة صغيره كانت عدالها وفلعت راشد بها
ام راشد : أشوفك مره ثانيه تجذب..
راشد : آآآآآآآآآآي .. بس ما يعور هههههههههه
وسار راشد صوب امه وحبها على راسها ..
ويلسوا يسولفون ..
وعقب أذن الظهر .. ساروا الشباب المسيد وام راشد ردت الفله..
وعند مهره وميره ..
ميره كانت توها طالعه من الحمام متمسحه ومهرة كانت توها داشه عليها طبعا عقب ما صلت ..
مهره : ميرووه
ميره : شو..
مهره : خمني منو عندنا ..
ميرة : منو؟
مهره : انتي خمني قبل ..
ميره : ما ادري
يودت مهره ميره من ايدها وسارن صوب الدريشه .. واشرت مهره صوب الميلس.. أول ما شافت ميره النعوووول .. حطت ايدها على ثمها
ميره : حلفي
مهره : وحياااااتج..
ميره : من متى ؟؟
مهره : من ساعتين تقريبا
ميره : فدييييييييييييييييييييته والله (طبعا في قلبها) ..
مهره : وازيدج من الشعر بيت .. في احتماااااااااال يباتون بعد
ميره : زين زين ..
وتدخل عليهم امهم ..
ام راشد : بناتي عقب ما تخلصن تعالن المطبخ ابغيكن تفزعلي ..
مهره : انا خلصت غناتي ..
ميره : انا بصلي وبلحقكن ..
روحت ام راشد ويا مهره المطبخ وتمن يعابلن الغدا .. وعقب ما خلصت ميره من الصلاة تمت توايج من الدريشه عّل وعسى تشوف مانع في أي لحظه ... بس يا خساااااااره .. ما ظهر .. تململت ميره وهيه تترياه فقررت تلحق امها واختها في المطبخ..
وعقب الغدا ساروا قوم حمد ومانع يقضون حايتهم وسار راشد فيا ابوه يتابعون حلالهم .. وعلى الساعه 5 العصر في بيت حمد بن سهيل ..
شمه وحصه يعابلون في المطبخ يسوون كيكه .. ويدخل عليهم منصور لابس كندورة كويتيه ومتغتر وكان يسكر عقمته .. وكانت شمه عند الفرن وحصه كانت تسوي الكريمه..
منصور : شو تسوون ؟؟
حصه : نسوي قوزي .. ما تشوف انها كيكه يعني..
منصور : ( يبتسم) فديتج ليش تعّبتي عمرج ... والله ما يحتاي وانا مب غريب .. لا وبالكاكاو بعد .. المفضله عندي .. تسلمين الشيخه..
حصه : ( تضحك بمصخره ) لا وانته الصااااج ... حق الشيخ منصور بن سهيل..
منصور :احم حم .. اخجلتي تواضعي والله ..
حصه : سير لا هذا اللي ناقص بعد.. اسويها حقك جيه قّلوا العرب
منصور : لا يكووووون طايح من عينج غناتي ..
حصه : خل عنك انته الحين .. شو هالكشخه كلها .. على وين ؟؟
منصور : الله يسلمج بسير ويا اخوج المصووون المووووول...
حصه : اهااااااا وشو لكم من الحاية هناك
منصور : وانتي شو حارّنج ..
حصه : ههههههه .. وليش احتر الغالي .. ما في داعي ..
وشوي انا غيث داخل عليهم ..
غيث : يالله منصور .. روحنا..
منصور : يالله.. وراااااك
ويوم روح غيث السياره شغلها
عاد منصور لازم يغلس على حصه قبل ما يروح .. سار صوب صحن الكريمة اللي جدام حصه وحط صبعه وشل كريما وحطها على خشم حصه وشرد ..
منصور : واااااااااااحد صفر..
حصه : ما عليه ... وراك وراك والزمن طويل ...
وفي بيت ثاني بن محمد..
ميره ومهره ورفيعه يالسات في البلكونة اللي فوق ..
مهره : رفوع ليش ما يبتي رواضي وياج ..
رفيعه : سارت ويا امها الجمعيه وعقب بيسيرون بيبي شوب بيشترولها ثياب ..
ميره : اها .. يعني ما بتلحق عليه ..
رفيعه : على منو ؟
ميره : ( ترفع حاجبها وتنزل الثاني ) على حمد ..
رفيعه : ( مرتبكه شوي ) ما اظن ..
رفيعه كان في خاطرها تسأل ميره عند حمد ومتى يا؟؟ ومتى بيروح؟؟ ووينه الحين ؟؟.. بس طبعا ما قدرت لانا تخاف ميره تحس فيها أو بالأحرى تفهم الموضوع غلط.. على طوووول غيرت الموضوع وجلبت السالفه ..
رفيعه : شو الحين ؟؟ وين بتكملن دراستكن ؟؟
مهره : أنا أفكر في تقنيه دبي..
رفيعه : والله .. زين عيل .. وأخيرا بيكون حد منكن عندي في التقنيه ..
ميره : بما انج هناك عشان جيه غير وجهتيه لجامعة الإمارات ..
رفيعه :ههههه ويا ويهج .. ارمسج جد
ميره : صدق انزين .. انا بسير جامعة الإمارات
مهره : ومنو بيخليج اصلا ..
رفيعه : صدقها والله.. عمي ما بيخليج تسكنين عند حد غرب ..
ميره : ومنو قالج اني بسكن عند ناس غرب..
رفيعه :عيل وين بتسكنين ..
ميره : عند خالتيه موزه ..
مهره : وشاورتي اميه وابويه ..
ميره : ان وافق ابويه اميه بتوافق .. وخلوه عليّه بقردنه بالرمسه لين يوافق..
رفيعه : على قولتج ..
وعلى الساعه 10 فليل وفي بيت حمد بن سهيل ..
حصه وشمه يالسات في الصاله اللي فوق يشوفن برنامج الحوادث .. وكانت حصه منسدحة على الغنفه وشمه يالسه على الارض .. ودخلوا عليهم غيث ومنصور .. سار غيث حجرته عسب يبدل ثيابه و أول ما شاف منصور حصه يالسه ومستريحه طبعا هالمنظر لازم ما يخليه على حاله .. سار صوبها ووقف جدام التلفزيون ..
منصور : حصيص .. يبونج على التلفون ..
وحصه حتى ما فكرت ان منصور يجذب عليها .. واصلا التلفون ما صاح وهيه على نياتها قامت من مكانها وسارت صوب التلفزيون ومنصور أول ما شافها تقوم انسدح مكانها .. ويوم انتبهت انه مقلب ردت معصبه ووااااصله حدها ..
حصه : منصور
منصور : نعم
حصه : قوم من مكاني بالطيب يعني .. زين أني للحين قابظه أعصابي
منصور : اممم .. بقوم بس على شرط ..
حصه : لا والله ..
منصور: تيبيلي كوب عصير بارد وياريت يكون همبا ..
حصه : ( مبتسمه له ) حاااااااااااظر .. وسارت المطبخ
استغرب منصوووور من ردة فعلها .. بس يالله زين منها الصراحه مشتهي عصير ..
وعقب شوي حصه تدخل عليه وفي ايدها كوب عصير واحد حاطنه في الصينيه مالته ..
حصه : تفضل .. وسارت يلست على الغنفه اللي عدال الباب ..
شو هالأدب اللي نزل عليها مرة وحده .. حاظر وتفضل .. شو السالفه ؟!! ابد هب طبيعيه
عدل منصور يلسته وقبظ كوب العصير ويوم شربه العصير اللي شربه تففففففففففف برع ثمه ..
أول ما شافته حصه ظحكت عليه و قالتله واحد واحد .. وسيده عالحجرة وقفلت الباب ..
الأنسه حصة تعمدت تحط في العصير بدل السكر ملح.. وهنيه قام منصور من مكانه وسار صوب حجرة حصه ..وقالها..
منصور : مردووووووووووده الشيخه .. كل هذا وشمه تظحك عليهم ..
ونرد لدار الحي وعلى الساعه 12 .. حمد ومانع يالسين على الممزر يتريون الساعه وحدة توصل عسب يسيرون المطار ..
كان كل واحد منهم يشوف البحر ويفكر في حالته .. مانع يفكر في ميره .. ما يعرف كيف يبين لها شعوره .. واذا عرفت شو بتكون ردة فعلها .. يا ترا هل بتجرأ وبقولها ؟؟!! .. وحمد يفكر في حالته ويا رفيعه .. شو هالشعور الغريب اللي أحسبه كل ما اشوفها ؟؟ وليش كل ما ابتعد عنها اتوله لها واترقب شوفتها ؟؟ .. وكثير من التساؤلات اللي ما لقولها جواااااب ..
وعقب نص ساعه روحوا المطار ويوم وصلوا هناك كان باقي ربع ساعه عن الطياره فيلسوا في الكوفي شوب .. وعلى الساعه وحده ساروا صوب قسم الاستقبال .. وعقب عشر دقايق تقريبا يطلعون حارب وعيسى من البوابة .. ودارت عيونهم على الموجودين لين ما طاحت عينهم على مانع وحمد ..
سلموا عليهم ويابوا شنطهم وطلعوا برع المطار..
وفي سيارة حمد ..
حمد كان يسوق وكان حارب عداله ووراه عيسى سادح السيت وباخنها رقدة لان التعب كان مسيطر عليه وحارب كان بعد تعبان بس سيطر على عمره وخلى الرقاد للبيت..
حمد : يا حيكم والله وشو الدراسه هناك ؟؟
حارب : تمام والله .. انته شحالك وشحال الاهل يعلهم بخير ؟؟
حمد : يسرك حالهم والله .. كلهم بخير وسهاله ..
حارب : وانته مانع شحالك وشحال هلك ؟؟
مانع : والله طيبين..
حارب : شو بتكملون طريجكم ولا بتباتون هنيه
حمد : ما اظني انكمل يمكن نبات في بيت خالتيه عليا ..
حارب : عيل باجر غداكم عندنا في البيت ..
مانع : ما يحتاي تعبل عمرك ..
حارب : وانته شو يخصك أعبل ولا ما أعبل .. بتون انتوا بتون ..
حمد : ههههه خلاص تم ..
ويوم وصلوا بيت عيسى .. نزل عيسى من السيارة بعد ما خبرووه ان الغدا باجر في بيت حارب ونزل شنطه من ورا ودخل داخل بيتهم .. ويوم وصلوا بيت حارب .. نزل حارب ونزل شنطه من ورا بمساعده حمد .. ويوم ركب حمد السيارة ياه حارب عند دريشته وقاله ..
حارب : باجر ان الله راد بييكم في الميلس ..
حمد : اوكيه .. نترياك
وساروا قوم حمد بيت خالتهم عليا وساروا حجرة الضيوف اللي عدال الميلس .. وحصلوها جاهزه فرقدوا سيده من التعب .. أول ما دخل حارب بيتهم سار صوب الميلس وحط قشاره على طرف الميلس دخل الفله لان كان عنده مفتاحها .. دخل شوي شوي ركب الدري وسار حجرته وفتحها .. كانت الحجرة نظيفه لان الخدامة بين كل فتره وفتره تنظفها .. بدل ثيابه ولا اراديا اول ما انسدح على الشبريه رقد .. وباليوم الثاني في بيت سالم بن محمد .. وعلى الساعه ثمان الصبح ..كانت رفيعه وامها وابوها واخوها خليفة يالسين يتريقون في الصاله ..
ام خليفه : غربلاتها البشكارة ما ملحت البيض خلته تهم .. الله يعدم مونتها..
بو خليفه : أحسن .. والملح شو له من الحايه من يومين رافعليه ضغطيه يعلني بلاااااه ..
خليفه : اقول رفوع غسلي كوب الماي عن حد يشرب منه عقبيه .. مافيه أعادي حد بهالزجااااام ..
رفيعه : ان شاء الله
وقفت رفيعه و شلت الكوب وياها ويوم طلعت برع الصاله.. كان حارب توه نازل من الدري وأول ما شافها ابتسم وينزل حيّاته ويرفعهن .. عقت رفيعه الكوب من ايدها وربعت صوبه ولوت عليه وهيه تصيح .. (( حارب اخو رفيعه ووايد يحبها ووهوه أكبر عنها بسنتين .. يدرس في امريكا .. رفيعه تعتبره أقرب واحد لقلبها..)) زاغت ام خليفه من هالصياح .. شو بلاها البنت ؟؟ ربعت برع الصاله وأول ما شافت حارب تيبست محلها .. سار حارب صوبها وحبها على راسها ولوا عليها وهيه تصيح وحتى هوه نزلت من عينه دمعه لانه من الخاطر توله عليهم وبعدين ياه ابوه واخوه خليفه .. تخيلوا انه من سنة ونص ما شاف أهله .. عاد أنتووا الحين تخيلوا كيف بيكون اللقاء ...
وطبعا من شافوه ما فجووه الا عقب ساعه وشي وهم يتنشّدونه عن أخباره وأخبار الدراسه ووووو الخ .. وعقب ما تفجج عنهم وعقب طلعة رووح .. ترخص منهم وسار صوب ميلس عمه ثاني بس قبل لا يدخل خطف على المطبخ بيشرب ماي وبيكمل طريجه ويوم دش المطبخ حصل بنت عاطيتنه ظهره وتطلع شيء من السده ..
هنيه حارب تيبس محله.. ان شاء الله تكون مهره .. يا رب يارب .. يالله يا رب ما تكون ميره .. ياااااااااااااااااااااااا ااااااااااا رب
حارب : احم احم
أول ما سمعته سيدة تغشت ويوم صدت وراها انصدمت ما توقعت انه حارب .. متى يا من أمريكا..
حارب : السلام عليج
.......: وعليك السلام والرحمه
حارب : شحالج بنت عمي ؟؟
......: بخير وسهاله .. شخبارك انته ؟؟!! الحمد لله على السلامه
هنيه حس حارب بأن حد صفعه على ويهه .. اوووووه هاذي ميرووووه .. مهره مب جريئه .. يالله يالله ترد السلام .. يا ربي وين مهره ؟؟؟ والله اني مشتاقلها لدرجة ما تتصورها .. وهيه ابد ولا همهاااا..
حارب : الله يسلمج ميره ..
ميره : اووه غريبه .. أول مره حد يعرفني
حارب في خاطره ..( وانتي حد ما يعرفج .. ما شاء لله عليييييييييج)
حارب : بعد ربج ..
وعقب سار صوب ثلاجة المااااي وشرب منها ورد يكلمها ..
حارب : تامرين بشيء ..
ميره : سلامتك ولد عمي
طلع حارب من المطبخ وهوه متحسف لانه ما شاف مهره .. حارب يحب مهره حب صادق ومن قلبه بعد .. وحاط في باله انه ما يهمها .. بالعكس .. مهره تموووووت عليه بس في حياتها ما صارحت حد بهالشيء لان طبيعتها جذيه .. هاديه
وفي بيت ثاني بن محمد مهره وميره يالسات في الصاله ويا امهن ..
ميره : امييه متى بيون قوم خالتيه عوشه وموزه
ام راشد : والله ما أدلهم يا بنتي..
مهره : ليش ما تعزمينهم يا اميه ..
ام راشد : ما ادري والله ..
ميره : الحين بييبلج التلفون واعزميهم اليوم العصر..
ام راشد : ما شاء الله وانتي جاهزه .. يالله قومي هاتيه ..
ميره : حاااااظر من عيوني الثنتين
مهره : لازم .. هههههههه
طبعا ميره ما تسوي هالشيء الا بثمن .. والثمن هوه شوفه مانع طبعا .. والحين املها كبر بما ان امه بتي ..
اتصلت ام راشد ببيت حمد بن سهيل وعزمت اختها عوشه وموزه عندهم ويوم عرفت ان ( غايه ) أم منصور عندهم عزمتها بعد ويااهم .. وطبعا عقب محايل وافقوا ... وقرروا ايوون على دفعتين .. دفعة غيث اللي شل وياه شمة وحصه والقشار ودفعة منصور مع الدريول وام منصور وام حمد وام مانع وعلاوي وعنود اما بو مانع فما يا وياهم لانه كان مسافر قطر عسبة الركظ .. وعلى هذا الحال طلعوا مناك على الساعه 4 العصر.. وطبعا بما ان حمد ومانع محد وياهم فلذالك استفرد منصور بالدريول عقه عداله وهوه اللي ساق .. صح ان الحريم احتشرن شوي بس سكتن يوم شافن أن سواقته عدله .. ويوم عدااه وصل دبي وقف السياره على طرف الشارع وبدل مكانه مع الدريول بسرعه.. عاد أونه المسكين ما يخصه .. ولا جنه سوا شيء ..صح انه غيث شافه لاكن ما رام يسوي شيء لان منصور مستهتر اذا كان حاط شيء في راسه بيسويه ولو شو استوى وشاف بعد أن ما عليه شر لأن سواقته فنانه وواثق فيه .. ويوم وصلوا دبي حصلوا أهل دبي يتريوونهم .. ما عدا الشباب حمد ومانع وراشد وحارب وعيسى اللي كانوا يحوطون .. وطبعا أجلوا العزيمه لباجر..
كانن مهره وميره متغشيات ويسلمن على خالاتهن وشمه وحصه.. وكانت ميره لابسه كندوره عيناويه .. ومهره لابسه كندوره صفره .. وكله طبعا صدفه .. كانن الحرمات على طرف يكملن سلامهن .. امها حصه وشمه ومهره وميره كانن واقفات على طرف ..واما غيث تواعد ويا الشباب وروح وشوي ان منصور نازل من السياره وسار سلم على خالته عليا ورد صوب البنات .. عاد هوه من شاف وحده لابسه كندوره عيناويه ارتبش واستااااانس... منصور ما يستحي ابدا .. بالعكس كل ما يشوف حد لازم يطفربه مهما كان .. بنت او ولد ..عيوز أو شيبه كله واااااااحد ..
وطبعا ميره ومهره عرفنه ..
منصوره : مرحبا والله بالعيناويه .. شحالج؟
وطبعا مااستغربت ميره من جرأته عادي متعوده عليه .. وكانت تعرف انها هيه المقصووووده فما كان منها الا انها ردت عليه ..
ميره : يسرك الحال والله ؟؟ شحالك انته؟؟
منصور : نشقح ..
وانتبه لمهره وبما انها لابسه أصفر وهذا يمثله نادي الوصل اللي ما يدانيه بعيشه الله .. بس بالله لازم يطفربها شوي ..
منصور: وانتي يا العدوة اووه قصدي الوصلاويه .. شحالج بعد ؟؟
مهره ويهها عورها .. وهيه الا شراته تشجع العين وتبغض الوصل بس منصور فهمها غلط ..
مهره : الحمد لله بخير
منصور : عساه دوم .. انزين حصيص .. بتحصلين في دبة السيارة كيستين فيهن ثياب حمد ومانع نزليهن فيا وخليهن عندج ..
حصه : اوكيه ..
وحط السويج في ايد حصه وسار سيده وراغ الدريول من السياره وقاله ييلس عند ربيعه اللي هوه دريول قوم مهره وميره .. وانتهز فرصة غياب حمد ومانع .. وسار منصور بالسيارة العزبه عسب يسلم على بو راشد ومحمد ( يد راشد ) لان منصور متعلق فيه يعيب بسوالفه وياه وطبعا حتى الشيبه ما سلم من غلاسته ..
ومر الوقت وعلى الساعه ثمان المغرب رد كل من الشبيبه بيتهم يعني حارب رد بيتهم وعيسى رد بيتهم وحمد ومانع وراشد ردوا البيت .. وعند البنات .. مهره وميره وحصه يالسات في الصاله اللي فوق يشوفن التلفزيون .. والحريم كلهن تحت يالسات في الصالة التحتية يتقهوين .. ومنصور رد من العزبه وسار صوب الميلس ويلس ويا الشباب عقب ما نفى الشبهات عنه ..
وعند البنات ..
شمه كانت تتسبح في الحجرة و ميره منسدحة في الصاله عند التلفزيون وحصه ومهره يالسات يسولفن آخر الصاله .. وفجأة تبند ميره التلفزيون وتسير صوب البنات وتيلس عندهن .. كان ملامحها شرات الوحدة اللي تبا تقول كلام ..
ميره : ابغي اقولكن رايي في شيء ..
مهره : في الشو؟؟
ميره : نحن ليش نتغشى ؟؟
حصة : عسبة الرياييل ما يشوفونا ..
ميره : وأي رياييل بالضبط ؟؟
مهره : اممم الرياييل عامة..
ميره : وحتى من الأهل؟!!!!
حصه : ميروووووووه هاتيها من الآخر..
مهره : هيه والله .. ييبيها من الآخر
ميره : اوكييييه.. بإختصاااااااار ليش نحن نتغشى من أهلنا ..
مهره : لأن عاداتنا وتقاليدنا تقول جذيييه ..
ميره : مليت من هالعادات والتقاليد .. الصراااااحه مليت انا .. كل ما اشوف حد من العايله اتغشى .. مب حاله هاي.. دام اننا متحجبات والحمد لله.. الغشوة شو لها من الحايه ؟ ؟
حصه : اصلا انا ما أتغشى الا من شخص واحد واللي هوه اخوكن راشد أما مانع ولد خالتيه مانع من استويت ما أتغشى عنه ..
ميره ومهره منصدماااااااااااااااااااا اااااات
ميره ومهره : حلللللللللللفي
حصه : صح النووووووووووووووم توكن تدرن ..
ميره : الصراحه توني الا عرفت
مهره : وانا بعد
حصه : خلييكن مني الحين !! نرد لساااااااااالفتنا الأصلية ..
ميره : احين شو الحل ؟؟ الصرااحه الصراااحه ما مليتن من هالحاله ؟؟
مهره : انا تعودت على عالشيء .. يعني بالنسبة لي عادي
حصه : وانا عادي بعد
ميره : انا ما عليّه منكن .. برمس اميه وبااااخذ شورها
Is up to u!!مهره :
ميره : أدري .. بس مب الحين.. يوم بحصل الوقت المناااااسب..
وقامت وشغلت التلفزيون وانسدحت في مكانها المعتاد
حصه : عيل وين رفوع ؟؟
مهره : على ما أضن انها سارت ويا امها تسلم على خالتها .. أكيد الحين بتي ..
وشوي يسمعون صوت حد يمشي على الدري .. والا بهااااااا رفيعه
حصه : هلا والله .. بنت الحلاااااااااااااااااااال عند طااااااريها ..
رفيعه : بالخير ولا ؟!!
حصه : افااااا أكيد بالخير
وسلمت عليهن ويلست عدالهن ..
رفيعه : علومكن ؟!
مهره : تمام والله ..
ميره : انتي شخبارج يا الهوّاااامه ؟
رفيعه : ههههه والله ما شيء أخبار ..
حصه : يا حيج والله ..
رفيعه : الله يحييج .. والا انتوا من متى هنيه ؟؟
حصه : من العصر...
رفيعه : بتقيلون ولا بتباتون؟
حصه : بنبات ..
رفيعه : زين والله ..
ميره بعدها مصره على رايها .. وترد تفتح السالفه مع رفوووع..
ميره : اقوول رفوع .. انتي تتغشين من اهلج ..
رفيعه : لا .. ليش هالسؤال يعني ؟؟
ميره : عيل ليش نحن نتغشى منهم ؟!
رفيعه : الا روووحكن والله .. انا ما أتغشى من عيال أعمامي ولا عيال خالاتي وخوالي ..
ميره :اممم ..
رفيعه : بلاج ؟
ميره : ما شيء .. خلونا من هالسالفه الحين .. عيل وين رواضي ؟؟
رفيعه : يبتها ويايه .. شافها واحد كان ظاهر من الميلس وشلها عني ..
مهره : منو ؟؟
رفيعه : ما أدريبه والله ...
ميره : كيف شكله ؟؟
رفيعه : اممم طويل .. لابس كندوره بيظه وسفرة حمرا
حصه : اليوم حمد ومانع لا بسين كنادير بيض وسفرة حمرا
رفيعه : لا لا .. ولا واحد منهم ..
ميره : عي منو؟؟
رفيعه : يوم شاف رويضه لابسه بنطلون وقميص عيناوي .......
وقبل لا تكمل كلامها
حصه : اهااااااااااااااااااااااا ا .. هذا منصووووور
رفيعه : منو هذا بعد؟
حصه : هذا منصور اخويه من ابويه
رفيعه : قولي والله ..
حصه : والله
رفيعه : وايد تغير عن قبل .. واصلا نسيت ان عندج اخو من ابوج ..
حصه : عندي اخو واللي هوه منصور وخوات والل هن شمه و عنود..
رفيعه : يا حظج والله على الأقل عندج خوات .. هب انا
ميره : على طاري الاخوان .. على أي أساس يا آنسة رفوع ما تخبرينا ان حارب رد من السفر ..
رفيعه : اسمحيلي والله .. اصلا نحن ما درينابه الا اليوم الصبح وهوه ياي البارحه فليل .. ومره على الساعه عشر الضحى روحنا صوب خالتيه ولين ساعتج هاذي ..
فز قلب مهره من مكانه .. يالله متى رد؟؟ والله اني متولهه عليه .. يا ربي .. اباااا أشوفه .. مع هالوله والشوق كله ما ظهر منها الا هالجمله عشان ما تبين اللي في قلبها ..
مهره : الحمد لله على سلامته
رفيعه : الله يسلمج من الشر
وشوي ان شمه تدخل عليهن وسلمت على رفيعه ويلسن يسولفن .. قامت مهره من مكانها وسارت صوب البلكونة ويلست هنااااك .. وتنهدت بقووو..
آآآآآآآآآآآآآآه ما أصدق انك رديت .. يالله يا كثر ماني متوله عليك .. متى بشوووفك .. يالله وأخيرا بشوفك عقب سنة ونص بعاااااد .. يارب عجل لقانا .. وشوي تشوف منصور وغيث ظاهرين من الميلس ويوم وصلوا نص الحوي شافت حد داخل من الباب .. ويوم ركزت عدل طلع انه حارب.. اللي التقى ويا منصور وغيث ويلس يسولف وياهم شوي .. يلست مهره تراقب حركاته حركه حركه .. يا الله يا حاااارب بعدك على حركاتك ما تغيرت .. لا تغيرت طولت شوي .. زين اني شفتك والله .. بس هالشوفه ما تسد وايد بعيده .. هذا اللي في قلب مهره لا قصدي جزء منه .. لان اللي في قلبها شيء ما يوصف .. ما تروم تظهره لان طبيعتها وهدوءها يحكم عليها هالشيء .. بس ان شاء الله ايي اليوووم اللي راح تظهر مهره كل اللي في قلبها .. بس متى ؟؟ الله يعلم .. مع الأياااام بنعرف ...
ظنكم انهم بيتلاقون وجها لوجه؟
وشو هيه المقالب اللي راح يسويها منصور؟؟
هل حمد بيشوف رفيعه ؟؟
وشو بيستوي بينهم ؟؟
